യുഎഇയിലെ പുതിയ വിസ ചട്ടം കൂടുതല്‍ ലളിതമായ വിസ, പാസ്‍പോര്‍ട്ട് സേവനങ്ങൾ ലക്ഷ്യമിട്ടുള്ളതാണ്. ലോകത്തെ ഏറ്റവും വലിയ ടൂറിസ്റ്റ് കേന്ദ്രമാക്കി യുഎഇ മാറ്റുക എന്ന ലക്ഷ്യത്തോടുകൂടിയാണ് ലോകത്തിൻറെ വിവിധ ഭാഗങ്ങളിൽ നിന്നുള്ള രാജ്യക്കാർക്ക് വിസ കാര്യത്തിൽ ഇത്തരം ഉദാര നിലപാട് രാജ്യം സ്വീകരിച്ചിരിക്കുന്നത്. 73 രാജ്യങ്ങളിലെ പൗരന്മാര്‍ക്ക് യുഎഇ സന്ദര്‍ശിക്കാന്‍ ഓണ്‍ അറൈവല്‍ വിസ നല്‍കുന്നുണ്ട്. ഇതിൽ 50 ഓളം രാജ്യങ്ങൾക്ക് ആറുമാസം വരെ രാജ്യത്ത് തുടരാം.

എമിറേറ്റ്സ്, ഫ്ലൈ ദുബായ്, ഇതിഹാദ് എയർവെയ്സ് എന്നീ കമ്പനികളുടെ വെബ്സൈറ്റിൽ നൽകിയിരിക്കുന്ന വിവരമനുസരിച്ച് ഇരുപതോളം രാജ്യങ്ങൾക്ക് 30 ദിവസത്തെ വിസ ഓൺ അറൈവലില്‍ സൗജന്യമായി ലഭിക്കും. 14 ദിവസം മുതല്‍ 180 ദിവസം വരെ കാലാവധിയുള്ള ഓണ്‍ അറൈവല്‍ വിസകളാണ് വിവിധ കാറ്റഗറികളില്‍ യുഎഇ അനുവദിക്കുന്നത്. 73 രാജ്യങ്ങള്‍ക്ക് പുറമെ ജി.സി.സി രാജ്യങ്ങളിലെ പൗരന്മാര്‍ക്ക് യുഎഇ സന്ദര്‍ശിക്കാന്‍ വിസ ആവശ്യമില്ല. യുഎഇയില്‍ ഇന്ത്യക്കാര്‍ക്ക് ഓണ്‍ അറൈവല്‍ വിസ ലഭിക്കുമെങ്കിലും അത് നാല് സാഹചര്യങ്ങളില്‍ മാത്രമാക്കി പരിമിതപ്പെടുത്തിയിട്ടുണ്ട്.

യു.കെയില്‍ താമസ വിസയുള്ളവര്‍ക്ക്, യൂറോപ്യന്‍ യൂണിയന്റെ താമസ വിസയുള്ളവര്‍ക്ക്, അമേരിക്കയിലേക്കുള്ള സന്ദര്‍ശക വിസ ഉള്ളവര്‍ക്ക്, അമേരിക്കയിലെ ഗ്രീന്‍ കാര്‍ഡ് ഉള്ളവര്‍ക്ക്. ഈ നാല് സാഹചര്യങ്ങളില്‍ 14 ദിവസം രാജ്യത്ത് തങ്ങാനുള്ള ഓണ്‍ അറൈവല്‍ വിസയാണ് ഇന്ത്യക്കാര്‍ക്ക് യുഎഇ അനുവദിക്കുക.

ആവശ്യമെങ്കില്‍ ഈ വിസ പിന്നീട് 14 ദിവസത്തേക്ക് കൂടി നീട്ടാനും സാധിക്കും. ഇങ്ങനെ യുഎഇയിലേക്ക് വരുന്നവരുടെ യു.കെ, യു.എസ്, യൂറോപ്യന്‍ യൂണിയന്‍ വിസകള്‍ക്കോ ഗ്രീന്‍ കാര്‍ഡിനോ കുറഞ്ഞത് ആറ് മാസമെങ്കിലും കാലാവധി ഉണ്ടായിരിക്കണം. അതോടൊപ്പം ഇവരുടെ പാസ്‍പോര്‍ട്ടിനും ആറ് മാസം കാലാവധി വേണം. യുഎഇയില്‍ പ്രവേശിക്കുന്ന തീയ്യതി മുതലായിരിക്കും ഈ കാലാവധി കണക്കാക്കുക.

വിമാനക്കമ്പനിയായ എമിറേറ്റ്സ്, തങ്ങളുടെ വെബ്‍സൈറ്റില്‍ ലഭ്യമാക്കിയിരിക്കുന്ന വിവരമനുസരിച്ച് ഇന്ത്യക്കാര്‍ക്ക് 14 ദിവസത്തേക്ക് യുഎഇയില്‍ ലഭിക്കുന്ന ഓണ്‍ അറൈവല്‍ വിസയ്ക്ക് 120 ദിര്‍ഹമാണ് നല്‍കേണ്ടത്. പിന്നീട് 14 ദിവസത്തേക്ക് കൂടി വിസാ കാലാവധി ദീര്‍ഘിപ്പിക്കണമെങ്കില്‍ 250 ദിര്‍ഹം കൂടി നല്‍കണമെന്നും അറിയിപ്പില്‍ പറയുന്നു.

അതേസമയം ഒക്ടോബർ മൂന്ന് മുതൽ യുഎഇയിലെ പുതിയ വിസ ചട്ടം നിലവിൽ വന്നത്. പല തരത്തിലുള്ള വിസിറ്റ് വിസകൾ ആണ് യുഎഇ പുറത്തിറക്കിയിരിക്കുന്നത്. സിംഗിള്‍, മള്‍ട്ടിപ്പിള്‍ എന്‍ട്രി സൗകര്യമുള്ള വിസകൾ ലഭ്യമാണ്. ഇപ്പോൾ യു.എ.ഇയിൽ 60 ദിവസത്തെ വിസ വീണ്ടും അനുവദിച്ച് തുടങ്ങി. നേരത്തെ നിർത്തിവെച്ചിരുന്ന വിസയാണ് ആവശ്യക്കാർക്ക് വീണ്ടും ലഭിച്ചു തുടങ്ങിയത്. 90 ദിവസത്തെ ടൂറിസ്റ്റ് വിസ നിർത്തലാക്കിയതിന് പിന്നാലെയാണ് 60 ദിവസ വിസ അനുവദിച്ചു കൊണ്ടുള്ള യുഎഇയുടെ ഈ നടപടി.

60 ദിവസത്തെ വിസ ദീർഘിപ്പിക്കാൻ കഴിയില്ല. എന്നാൽ, 30 ദിവസത്തെ വിസ ആവശ്യമെങ്കിൽ നീട്ടാൻ കഴിയും. രക്ഷിതാക്കൾക്കൊപ്പം എത്തുന്ന കുട്ടികൾക്ക് ഒരു മാസത്തെ സന്ദർശക വിസ സൗജന്യമാക്കിയത് ഇപ്പോഴും തുടരുന്നുണ്ട്. എന്നാൽ, രണ്ട് മാസം വിസയെടുക്കുന്നവർക്ക് ഈ സൗജന്യം ലഭിക്കില്ല. 60 ദിവസ വിസയിൽ ഗ്രേസ് പിരീഡും കാണിക്കുന്നില്ല. സാധാരണ സന്ദർശക വിസക്ക് 10 ദിവസം ഗ്രേസ്പിരീഡ് ലഭിക്കാറുണ്ട്. എന്നാൽ, വരും ദിവസങ്ങളിൽ ഇതിൽ മാറ്റങ്ങളുണ്ടാകുമെന്നാണ് കരുതുന്നു.