ഇന്ത്യന്‍ രൂപ തകര്‍ച്ചയുടെ പുതിയ റെക്കോര്‍ഡുകള്‍ തീര്‍ത്തതോടെ നാട്ടിലേക്ക് പണം അയക്കുന്ന തിരക്കിലാണ് പ്രവാസികൾ. ഈ അവസരം പരമാവധി പ്രയോജനപ്പെടുത്തുകയാണ് പ്രവാസികൾ. വിനിമയ മാർക്കറ്റിൽ ഇന്ത്യൻ രൂപയുടെ മൂല്യത്തകർച്ച തുടർക്കഥയാകുന്ന കാഴ്ച്ചയാണ് കാണാൻ സാധിക്കുന്നത്. ഏറ്റവും പുതിയ റിപ്പോർട്ടുകൾ പ്രകാരം ഇന്ത്യൻ രൂപയുടെ മൂല്യം എക്കാലത്തേയും ഏറ്റവും താഴ്ന്ന നിലയിലേക്ക് വീണിരിക്കുകയാണ്. പ്രവചനങ്ങള്‍ കാറ്റില്‍ പറത്തിക്കൊണ്ട് US ഡോളറിന് മുന്‍പില്‍ കിതയ്ക്കുകയാണ് ഇന്ത്യന്‍ രൂപ.

ഇന്ത്യന്‍ കറന്‍സി 80 ന് മുകളിലേയ്ക്ക് ഇടിയില്ലെന്നായിരുന്നു സാമ്പത്തിക വിദഗ്ധര്‍ നടത്തിയ പ്രവചനം. എന്നാല്‍, ഡോളറിന് മുന്നില്‍ ഇപ്പോള്‍ കിതയ്ക്കുകയാണ് രൂപ.യുഎസ് ഡോളറിനെതിരെ 39 പൈസ ഇടിഞ്ഞ് 82.69 എന്ന റഎക്കോർഡ് താഴ്ചയേയും അഭിമുഖീകരിക്കുകയാണ് രൂപ. ഈ വീണുകിട്ടിയ അവസമാണ് ഒരോരുത്തരും പ്രയജനപ്പെടുത്തുന്നത്. വായ്‍പകള്‍ അടച്ചുതീര്‍ക്കാനുള്ളവര്‍ക്കും വിവിധ വായ്‍പകളുടെ ഇ.എം.ഐ അടയ്ക്കാനുള്ളവര്‍ക്കുമൊക്കെയാണ് ഇപ്പോഴത്തെ സാഹചര്യം ഏറ്റവുമധികം ഗുണം ചെയ്യുന്നത്.

യു.എ.ഇ ദിർഹത്തിനെതിരെ 22.53 രൂപയാണ് മൂല്യം. ഇന്‍റർബാങ്ക് ഫോറിൻ എക്സ്ചേഞ്ച് മാർക്കറ്റിൽ, രൂപ യുഎസ് ഡോളറിനെതിരെ 82.32 ൽ തുടങ്ങി, തുടർന്ന് 82.69 ആയി കുറഞ്ഞു, മുൻ ക്ലോസിംഗ് വിലയേക്കാൾ 39 പൈസയുടെ ഇടിവ് ആണ് കാണിക്കുന്നത്. അസംസ്‌കൃത എണ്ണവില ഉയർന്നതാണ് രൂപയുടെ മൂല്യത്തെ സാരമായി ബാധിക്കുന്നത്.

ക്രൂഡ് ഓയിൽ വിലയിലുണ്ടായ വര്‍ദ്ധനയും നിക്ഷേപകർ അപകടസാധ്യതകൾ തിരിച്ചറിഞ്ഞതും, ആഭ്യന്തര ഓഹരി വിപണിയിലെ ഇടിവും യുഎസ് കറൻസി ശക്തിപ്രാപിച്ചതും രൂപയ്ക്കുമേൽ അധിക സമ്മർദ്ദം ചെലുത്തിയതായി സാമ്പത്തിക വിദഗ്ധര്‍ പറയുന്നു. ആഗോള എണ്ണ സൂചികയായ ബ്രെന്‍റ് ക്രൂഡ് ബാരലിന് 0.87 ശതമാനം ഇടിഞ്ഞ് 97.07 ഡോളറിലെത്തി. രൂപയെ സംരക്ഷിക്കാൻ ആർബിഐയുടെ കൈവശം വിദേശനാണ്യ ശേഖരവും കുറവാണ്.

മുൻകാലങ്ങളിൽ നിന്ന് വ്യത്യസ്തമായി രൂപയുടെ മൂല്യത്തകർച്ച തടയാൻ റിസർവ് ബാങ്ക് ഓഫ് ഇന്ത്യ നടത്തുന്ന ഇടപെടലുകൾ ഫലം കാണുന്നില്ല എന്നും വിലയിരുത്തലുകള്‍ ഉണ്ട്. ഡോളറിനെതിരെ രൂപയുടെ മൂല്യം ഇനിയും ഇടിയാനുള്ള സാധ്യതയാണ് സാമ്പത്തിക വിദഗ്ധർ കാണുന്നത്. വരുംകാലത്ത് കറൻസി വീണ്ടും കൂടുതല്‍ ദുർബലമാകുമെന്നും മൂല്യം 83.5 രൂപ വരെ ഇടിയുമെന്ന ആശങ്കയാണ് സാമ്പത്തിക വിദഗ്ധര്‍ പങ്കുവയ്ക്കുന്നത്.

എന്നാല്‍, ഡോളറിന്‍റെ കുതിപ്പ് രൂപയെ മാത്രമല്ല, മറ്റ് ഏഷ്യന്‍ കറന്‍സികളേയും സാരമായി ബാധിച്ചിട്ടുണ്ട്. രൂപയ്ക്കൊപ്പം ഇവയുടെയും മൂല്യം കുത്തനെ ഇടിയുകയാണ്. യൂറോയും രണ്ടു പതിറ്റാണ്ടിലെ ഏറ്റവും താഴ്ന്ന നിലവാരത്തിൽ എത്തിയിരിയ്ക്കുകയാണ്. എന്തായാലും രൂപയുടെ വിലയിടിവ് പരമാവധി ഉപയോഗപ്പെടുത്താനുള്ള തിരക്കിലാണ് ഗള്‍ഫ് രാജ്യങ്ങളിലെ പ്രവാസികള്‍.