നാട്ടിലേക്ക് വരാൻ ആ​ഗ്രഹിക്കുന്ന പ്രവാസികൾക്ക് ഇതാണ് നല്ല ബെസ്റ്റ് ടൈം. എയർ ഇന്ത്യ എക്സ്പ്രസ് ദുബായിൽ നിന്ന് കേരളത്തിലേക്കും അടക്കം11 കേന്ദ്രങ്ങളിലേക്ക് നിരക്ക് കുറച്ച വാർത്ത പുറത്തുവന്നിരുന്നു. ഇത് പ്രവാസി മലയാളികൾക്ക് ഏറെ സന്തോഷകരമായ വാർത്തയായിരുന്നു. ഇനി ഈ സന്തോഷം ഇരട്ടിയാകാൻ പോകുകയാണ്.

യു.എ.ഇ–കേരള സെക്ടറിൽ തിരക്ക് കുറഞ്ഞതോടെ യാത്രക്കാരെ ആകർഷിക്കാൻ ടിക്കറ്റ് നിരക്ക് കുറച്ചും ബാഗേജ് അലവൻസ് കൂട്ടിയും മത്സരിക്കുകയാണ് വിമാനക്കമ്പനികൾ. നികുതി ഉൾപ്പെടെ 269 ദിർഹത്തിന് അതായത് 6080 രൂപ വരെ വിമാനക്കമ്പനികൾ ടിക്കറ്റ് വാഗ്ദാനം ചെയ്യുന്നു.

എയർ ഇന്ത്യയ്ക്ക് പിന്നാലെ എയർ ഇന്ത്യ എക്സ്പ്രസ്, സ്പൈസ് ജെറ്റ്, ഇൻഡിഗോ, ഗോ ഫസ്റ്റ് തുടങ്ങി കേരളത്തിലേക്കു സർവീസ് നടത്തുന്ന ഇന്ത്യൻ വിമാന കമ്പനികളെല്ലാം നിരക്കു കുറച്ചു. ചില എയർലൈനുകൾ 40 കിലോ വരെ ലഗേജും അനുവദിക്കുന്നുണ്ട്. എയർ ഇന്ത്യയിൽ ദുബായിൽ നിന്നും ഷാർജയിൽ നിന്നും കോഴിക്കോട്ടേക്കും ദുബായിൽ നിന്ന് കൊച്ചിയിലേക്കും 300 ദിർഹത്തിന് (6781 രൂപ) പറക്കാം.

ഇക്കോണമി ക്ലാസിൽ ലഗേജ് 40 കിലോയും ബിസിനസ് ക്ലാസിൽ 50 കിലോയും അനുവദിക്കും. ഒരു പെട്ടിൽ 32 കിലോയിൽ കൂടരുത്. ഇപ്പോൾ ടിക്കറ്റ് എടുക്കുന്നവർക്ക് നവംബർ 30 വരെ യാത്ര ചെയ്യാം.എയർ ഇന്ത്യ എക്സ്പ്രസിൽ ദുബായിൽനിന്ന് കോഴിക്കോട്ടേക്ക് 269 ദിർഹവും കൊച്ചിയിലേക്ക് 380 ദിർഹവുമാണ് നിരക്ക്. തിരുവനന്തപുരം 445 ദിർഹം. മുംബൈ 279, ഡൽഹി 298, മംഗളൂരു 298 ദിർഹം, ജയ്പുർ 313, അമൃത് സർ–445, ലക്നൗ 449, തിരുച്ചിറപ്പള്ളി 570 ദിർഹം എന്നിങ്ങനെയാണ് മറ്റു സെക്ടറുകളിലെ നിരക്ക്. കൊച്ചിയിലേക്ക് ആഴ്ചയിൽ ഏഴും കോഴിക്കോട്ടേയ്ക്ക് 13ഉം സർവീസുണ്ട്.

ഗോ ഫസ്റ്റ് വിമാനത്തിൽ ദുബായിൽനിന്ന് കണ്ണൂരിലേക്ക് 316 ദിർഹമും അബുദാബിയിൽനിന്ന് കണ്ണൂരിലേക്ക് 337 ദിർഹമുമാണ് നിരക്ക്. അബുദാബിയിൽനിന്ന് മുംബൈയിലേക്കു 291 ദിർഹമും ഡൽഹിയിലേക്ക് 341 ദിർഹമും. 285 ദിർഹത്തിനു സ്പൈസ് ജെറ്റിൽ ദുബായിൽനിന്ന് കൊച്ചിയിലേക്കു പറക്കാം. 40 കിലോ ലഗേജും അനുവദിക്കും.

യാത്ര ഇൻഡിഗോയിലാണെങ്കിൽ 385 ദിർഹം. 30 കിലോ ലഗേജ് അനുവദിക്കും.
ഫ്ലൈ ദുബായ്, എയർ അറേബ്യ എന്നിവയ്ക്കും ശരാശരി ഇതേ നിരക്കാണ്.കഴിഞ്ഞ വർഷം ഒക്ടോബർ മുതൽ ഈ വർഷം സെപ്റ്റംബർ വരെയുള്ള കണക്കുകൾ പരിശോധിക്കുകയാണെങ്കിൽ ഏറ്റവും കൂടുതൽ പേർ ലോകത്തിന്റെ ഇതരഭാഗങ്ങളിൽ നിന്നു യാത്ര ചെയ്തതു ഗൾഫ് രാജ്യങ്ങളിലേക്കാണ്. യാത്രക്കാർ വർധിക്കുന്നതിനൊപ്പം യാത്രാനിരക്കും വിമാനക്കമ്പനികൾ കുത്തനെ ഉയർത്തിയിട്ടുണ്ട്.