പ്രവാസികളുടെ ഭാഗ്യമായി മാറിയിരിക്കുകയാണ് ബിഗ് ടിക്കറ്റ്. ഇത് അടിക്കണമെങ്കിൽ അത് മലയാളി തന്നെ എടുക്കണം. ഇത് വെറും പാഴ് വാക്കല്ല. ഇത് വീണ്ടും അവർത്തിച്ചിരിക്കുകയാണ്. ബിഗ് ടിക്കറ്റ് നറുക്കെടുപ്പിലൂടെ വീണ്ടും മലയാളിയെ തേടി ഭാഗ്യമെത്തിയിരിക്കുകയാണ്. മലയാളിയായ സന്ദീപ് പൊന്തിപ്പറമ്പിലാണ് നറുക്കെടുപ്പിൽ വിജയിച്ചിരിക്കുന്നത്. ഖത്തറില്‍ പ്രവാസിയായ സന്ദീപിന് ഒരു കിലോഗ്രാം 24 ക്യാരറ്റ് സ്വര്‍ണം ആണ് സമ്മാനമായി ലഭിച്ചിരിക്കുന്നത്.

ഒരു കമ്പനിയിൽ സീനിയര്‍ അക്കൗണ്ടന്റായി ജോലി ചെയ്യുന്ന സന്ദീപിന് ഒക്ടോബറിലെ മൂന്നാമത്തെ പ്രതിവാര നറുക്കെടുപ്പിലാണ് ഭാഗ്യദേവത കടാക്ഷിച്ചത്. സമ്മാനം ലഭിച്ച വിവരം ബിഗ് ടിക്കറ്റ് പ്രതിനിധികള്‍ ഫോണിൽ വിളിച്ചാണ് സന്ദീപിനെ അറിയിച്ചത്. വര്‍ഷങ്ങള്‍ നീണ്ട പരിശ്രമത്തിനൊടുവില്‍ ആണ് അദ്ദേഹത്തിന് സമ്മാനം ലഭിച്ചിരിക്കുന്നത്.

13 വര്‍ഷമായി സന്ദീപ് ഗൾഫിൽ എത്തിയ ഇദ്ദേഹം കഴിഞ്ഞ ആറ് വര്‍ഷം തുടർച്ചയായി ടിക്കറ്റ് എടുക്കുന്നയാളാണ്. സോഷ്യല്‍ മീഡിയ വഴിയാണ് ബിഗ്ടിക്കറ്റ് നറുക്കെടുപ്പിനെ കുറിച്ച് സന്ദീപ് അറിയുന്നത്. ഇങ്ങനെയാണ് നറുക്കെടുപ്പിൽ പങ്കെടുക്കാൻ തീരുമാനിച്ചത്. 20 സുഹൃത്തുക്കള്‍ക്കൊപ്പം ആണ് അദ്ദേഹം ടിക്കറ്റ് എടുക്കുന്നത്.

ഒരിക്കൽ സമ്മാനം ലഭിച്ചെന്ന് കരുതി ബിഗ് ടിക്കറ്റിലൂടെയുള്ള ഭാഗ്യ പരീക്ഷണം നിർത്താൻ സന്ദീപ് തീരുമാനിച്ചിട്ടില്ല. ഗ്രാന്റ് പ്രൈസ് ലഭിക്കുമെന്ന പ്രതീക്ഷയിൽ ഇനിയും ടിക്കറ്റ് വാങ്ങാൻ തന്നെയാണ് പദ്ധതി. ഒക്ടോബര്‍ മാസത്തില്‍ ബിഗ് ടിക്കറ്റെടുക്കുന്ന എല്ലാവരും പ്രതിവാര ഇലക്ട്രോണിക് നറുക്കെടുപ്പിലും ഉൾപ്പെടും. ഒരാള്‍ക്ക് ഒരു കിലോഗ്രാം സ്വര്‍ണമാണ് ഇവിടെ സമ്മാനമായി ലഭിക്കുന്നത്.

ഈ മാസം 16 ന് എടുത്ത ടിക്കറ്റിന് അബുദാബിയിൽ ജോലി ചെയ്യുന്ന സോഫ്റ്റ്വെയർ എൻജിനിയർ ജയകുമാറിന് ഒരു കിലോ ഗ്രാം 24 കാരറ്റ് സ്വർണം ലഭിച്ചിരുന്നു. സുഹൃത്തുക്കളായ 18 പേര്‍ക്കൊപ്പമായിരുന്നു ഒക്ടോബർ 16 ന് ജയകുമാർ ടിക്കറ്റ് എടുത്തത്. രണ്ട് ബിഗ് ടിക്കറ്റുകള്‍ ഒരുമിച്ച് എടുത്താല്‍ മൂന്നാമതൊരു ടിക്കറ്റ് സൗജന്യമായി ലഭിക്കുന്ന 'ബൈ റ്റു, ഗെറ്റ് വണ്‍ ഫ്രീ' ഓഫറിലായിരുന്നു ജയകുമാർ ഈ ടിക്കറ്റുകൾ വാങ്ങിയത്.

എന്നാൽ ഭാഗ്യം ജയകുമാറിനെ കൈവിട്ടില്ല. സൗജന്യമായി ലഭിച്ച ടിക്കറ്റിന് നറുക്ക് വീഴുകയും ഒരു കിലോ ഗ്രാം സ്വർണം സമ്മാനമായി ലഭിക്കുകയും ചെയ്തു. എന്നാൽ സ്വർണം അടിച്ചെങ്കിലും ഗ്രാന്റ് പ്രൈസ് തന്നെയാണ് ലക്ഷ്യമെന്നാണ് ജയകുമാറും പ്രതികരിച്ചത്. ഒരിക്കൽ അത് ലഭിക്കുമെന്ന പ്രതീക്ഷയിലാണ് താനെന്നും ഇനിയും ടിക്കറ്റുകൾ എടുക്കുമെന്നും അദ്ദേഹം വ്യക്തമാക്കിയിരുന്നു.