യുഎഇയിൽ കഴിഞ്ഞ ദിവസമുണ്ടായ വാഹനാപകടത്തിൽ രണ്ട് മലയാളികൾക്ക് ദാരുണാന്ത്യം സംഭവിച്ച വാർത്ത പുറത്തുവന്നിരുന്നു. ഫുജൈറയിലായിരുന്നു പ്രവാസികളുടെ ജീവൻ നഷ്ടപ്പെടാനുണ്ടായ അപകടം സംഭവിച്ചത്. കണ്ണൂർ രാമന്തളി സ്വദേശി എം.എൻ.പി ജലീൽ (43), പയ്യന്നൂർ പെരളം സ്വദേശി സുബൈർ (43) എന്നിവരാണ് മരിച്ചത്.

മലീഹ റോഡിൽ ഇവർ സഞ്ചരിച്ച വാഹനം ടയർപൊട്ടി മറിഞ്ഞാണ് അപകടം ഉണ്ടായതെന്നാണ് റിപ്പോർട്ടുകൾ. ഫുജൈറയിൽ ഫാൻസി ആഭരണ ബിസിനസ് നടത്തിവരികയായിരുന്ന ഇരുവരും ആത്മാർഥ സുഹൃത്തുക്കളായിരുന്നു. ഇരുവരും മരണത്തിലും ഒരുമിച്ചപ്പോൾ അത് യുഎഇയിലെ പ്രവാസി സമൂഹത്തെ ദുഃഖത്തിലാഴ്ത്തി. കഴിഞ്ഞ 25 വർഷമായി പ്രവാസികളായ ഇരുവരും ഒന്നിച്ചു ബിസിനസ് നടത്തുന്ന ആത്മാർഥ സുഹൃത്തുക്കൾ ആയിരുന്നു.

ഉച്ചയ്ക്ക് ഇവർ ഫുജൈറയിൽ നിന്ന് ദുബായിലേയ്ക്ക് വരുമ്പോഴായിരുന്നു അപകടം ഇരുവരുടേയും ജീവൻ കവർന്നെടുത്തത്. കഴിഞ്ഞ 16 വർഷമായി ഫുജൈറയിൽ താമസിക്കുന്ന ഇരുവരും കോസ്‌മെറ്റിക്, ഫാൻസി ജ്വല്ലറി നടത്തുകയും ഒമാനിലും യുഎഇയിലും ബിസിനസ് നടത്തുകയുമായിരുന്നു. മോർച്ചറിയിൽ സൂക്ഷിച്ച മൃതദേഹങ്ങൾ നാട്ടിലേയ്ക്ക് കൊണ്ടുപോകാനുള്ള നടപടികൾ പൂർത്തിയായി വരുന്നു. പ്രവാസി സംഘടനകളുടെ നേതൃത്വത്തിൽ ഇതിനുള്ള ശ്രമം നടക്കുകയാണ്.