വളരെ ആശ്വാസകരമായ നടപടിയുമായി എത്തിയിരിക്കുകയാണ് സൗദി. സന്ദർശന വിസ കാലാവധി അവസാനിക്കുന്നതിന് ഏഴു ദിവസം മുമ്പുവരെ പുതുക്കാമെന്ന തീരുമാനത്തിന് പിന്നാലെ ഉംറ വിസയില്‍ വിദേശ രാജ്യങ്ങളില്‍ നിന്ന് എത്തുന്നവര്‍ക്കുള്ള താമസ കാലാവധി ഉയര്‍ത്തിയിരിക്കുകയാണ്. 30 ദിവസത്തില്‍ നിന്ന് താമസ കാലാവധി 90 ദിവസമായി ഉയര്‍ത്തിയതായി ഹജ്ജ് ഉംറ മന്ത്രാലയം അറിയിച്ചു.

അതേസമയം, വിദേശ ഉംറ തീര്‍ഥാടകര്‍ വിസ കാലാവധി അവസാനിക്കുന്നതിന് മുമ്പ് സൗദിയില്‍ നിന്ന് തിരികെ പോകണമെന്ന് ഹജ്ജ് - ഉംറ മന്ത്രാലയം ആവശ്യപ്പെട്ടു. വിസ കാലാവധി അവസാനിക്കുന്നതിന് മുമ്പ് ഉംറ കര്‍മങ്ങള്‍ പൂര്‍ത്തിയാക്കിയിരിക്കണം. 90 ദിവസത്തെ കാലാവധി കഴിഞ്ഞ ശേഷം രാജ്യത്ത് താമസിക്കുന്നത് ചട്ടങ്ങളുടെ ലംഘനമാണെന്നും അധികൃതര്‍ മുന്നറിയിപ്പ് നല്‍കി.

എന്നാൽ പറഞ്ഞിരിക്കുന്ന കാലയളവില്‍ തീര്‍ഥാടകര്‍ക്ക് മക്ക, മദീന എന്നിവ കൂടാതെ സൗദിയിലെ മറ്റെല്ലാ നഗരങ്ങളിലേക്കും ടൂറിസം കേന്ദ്രങ്ങളിലേക്കും സഞ്ചരിക്കാനുള്ള സ്വാതന്ത്ര്യമുണ്ട്. തീര്‍ഥാടകന് സൗദി അറേബ്യയിലെ അന്താരാഷ്ട്ര, ആഭ്യന്തര വിമാനത്താവളങ്ങളില്‍ ഏതിലൂടെയും രാജ്യത്തേക്ക് പ്രവേശിക്കാനും തീര്‍ഥാടനം കഴിഞ്ഞ് തിരികെ പോവാനും അനുവാദമുണ്ടായിരിക്കുമെന്നും മന്ത്രാലയം അധികൃതര്‍ അറിയിച്ചു.

തീര്‍ഥാനടത്തിനായി വരുന്നവര്‍ സൗദി അറേബ്യയില്‍ എത്തിയാല്‍ മന്ത്രാലയത്തിന്റെ 'നുസുക്' ആപ്ലിക്കേഷനില്‍ രജിസ്റ്റര്‍ ചെയ്യുകയും ഉംറക്കുള്ള പെര്‍മിറ്റ് നേടുകയും വേണം. വിനോദ സഞ്ചാരം, സന്ദര്‍ശനം, ഉംറ തുടങ്ങി ഏതെങ്കിലും വിസ കൈവശമുള്ളവര്‍ക്ക് മാത്രമേ സൗദി അറേബ്യയില്‍ പ്രവേശനം ലഭിക്കൂ എന്നും മന്ത്രാലയം വ്യക്തമാക്കി.

അതേസമയം വ്യക്തികൾക്കുള്ള സന്ദർശന വിസ കാലാവധി അവസാനിക്കുന്നതിന് ഏഴു ദിവസം മുമ്പുവരെ പുതുക്കാമെന്ന് സൗദി പാസ്പോർട്ട് ജനറൽ ഡയറക്ടറേറ്റ് നേരത്തെ വ്യക്തമാക്കിയിരുന്നു. സന്ദർശന വിസയെടുത്ത സ്പോൺസറുടെ 'അബ്ശിർ' അക്കൗണ്ട് വഴി വിസയുടെ കാലാവധി നീട്ടാൻ സാധിക്കും. നടപടിക്രമം പൂർത്തിയാക്കാൻ കാലാവധിയുള്ള ആരോഗ്യ ഇൻഷുറൻസ് നിർബന്ധമാണ്.

വിസ കാലാവധി ആറു മാസത്തിൽ കൂടുതൽ ദീർഘിപ്പിക്കാനും കഴിയില്ല. കാലാവധി അവസാനിച്ച് മൂന്നു ദിവസം കഴിഞ്ഞാൽ വിസ പുതുക്കണമെങ്കിൽ പിഴ ഒടുക്കേണ്ടിവരും. വിസയെടുത്ത സ്പോൺസർക്ക് ട്രാഫിക് ലംഘനങ്ങളുമായി ബന്ധപ്പെട്ട് പിഴയുണ്ടെങ്കിലും 'അബ്ശിർ' പ്ലാറ്റ്‌ഫോം വഴി പുതുക്കുന്നതിന് തടസ്സമുണ്ടാവില്ല. അതുപോലെ സ്പോൺസറുടെ ഇഖാമ കാലാവധി അവസാനിച്ചാലും വിസ പുതുക്കാൻ കഴിയുമെന്ന് ഡയറക്ടറേറ്റ് വ്യക്തമാക്കി.