ഇനി ഇഖാമ കാലവധി പ്രവാസികൾക്ക് കുടുംബത്തെ കൂടെകൂട്ടുന്നതിന് ഒരു തടസമാകില്ല. അതായത് പ്രവാസികളുടെ റസിഡന്‍സി പെര്‍മിറ്റായ ഇഖാമയുടെ കാലാവധി സന്ദര്‍ശക വിസ പുതുക്കുന്നതിന് തടസ്സമാകില്ലെന്ന് സൗദി അറേബ്യയുടെ ജനറല്‍ ഡയറക്ടറേറ്റ് ഓഫ് പാസ്പോര്‍ട്ട്. ഇഖാമ കാലാവധി കഴിഞ്ഞ ഒരു പ്രവാസിയുടെ ആശ്രിതരായ ഭാര്യ, മക്കള്‍ എന്നിവരുടെ സന്ദര്‍ശന വിസ ഇനിയും നീട്ടാന്‍ കഴിയുമോ എന്ന ചോദ്യത്തിനുള്ള മറുപടിയായാണ് സൗദി അധികൃതരുടെ വിശദീകരണം.

എന്നിരുന്നാലും, വിസിറ്റ് വിസ വിദേശികള്‍ക്കുള്ള സാധാരണ ഇഖാമയിലേക്ക് മാറ്റാന്‍ രാജ്യത്തിന്റെ ആഭ്യന്തര മന്ത്രാലയം സമ്മതിച്ചുവെന്ന് അവകാശപ്പെടുന്ന സോഷ്യല്‍ മീഡിയയിലെ റിപ്പോര്‍ട്ട് തെറ്റാണെന്ന് കഴിഞ്ഞ സെപ്റ്റംബറില്‍ സൗദി അധികൃതര്‍ തള്ളിക്കളഞ്ഞു.

അതുപോലെ വ്യക്തികൾക്കുള്ള സന്ദർശന വിസ കാലാവധി അവസാനിക്കുന്നതിന് ഏഴു ദിവസം മുമ്പുവരെ പുതുക്കാമെന്ന് സൗദി പാസ്പോർട്ട് ജനറൽ ഡയറക്ടറേറ്റ് വ്യക്തമാക്കി. സന്ദർശന വിസയെടുത്ത സ്പോൺസറുടെ 'അബ്ശിർ' അക്കൗണ്ട് വഴി വിസയുടെ കാലാവധി നീട്ടാൻ സാധിക്കും. നടപടിക്രമം പൂർത്തിയാക്കാൻ കാലാവധിയുള്ള ആരോഗ്യ ഇൻഷുറൻസ് നിർബന്ധമാണ്.

വിസ കാലാവധി ആറു മാസത്തിൽ കൂടുതൽ ദീർഘിപ്പിക്കാനും കഴിയില്ല. കാലാവധി അവസാനിച്ച് മൂന്നു ദിവസം കഴിഞ്ഞാൽ വിസ പുതുക്കണമെങ്കിൽ പിഴ ഒടുക്കേണ്ടിവരും. വിസയെടുത്ത സ്പോൺസർക്ക് ട്രാഫിക് ലംഘനങ്ങളുമായി ബന്ധപ്പെട്ട് പിഴയുണ്ടെങ്കിലും 'അബ്ശിർ' പ്ലാറ്റ്‌ഫോം വഴി പുതുക്കുന്നതിന് തടസ്സമുണ്ടാവില്ല. സ്പോൺസറുടെ ഇഖാമ കാലാവധി അവസാനിച്ചാലും വിസ പുതുക്കാൻ കഴിയുമെന്ന് ഡയറക്ടറേറ്റ് വ്യക്തമാക്കി.