സൗദിയിൽ വാഹനമിടിച്ച് കണ്ണൂര്‍ സ്വദേശി മരിച്ചു. കൂത്തുപറമ്പ് നരവൂര്‍ സ്വദേശി കൊറോത്തന്‍ ശിവദാസന്‍ (52) ആണ് റിയാദ് - ദമ്മാം റോഡിലെ ഒരു പെട്രോള്‍ പമ്പിലുണ്ടായ അപകടത്തിൽ മരിച്ചത്.

റസ്റ്റോറന്റിൽ നിന്ന് ഭക്ഷണം കഴിച്ച് പുറത്തിറങ്ങി നടക്കുമ്പോൾ ശിവദാസനെ വാഹനമിടിക്കുകയായിരുന്നു. സംഭവസ്ഥലത്ത് വെച്ചു തന്നെ മരണം സംഭവിച്ചിരുന്നു.

ദമ്മാം റോഡിലെ റെഡിമിക്‌സ് കമ്പനിയിലാണ് ശിവദാസന്‍ ജോലി ചെയ്‍തിരുന്നത്. നടപടികള്‍ പൂര്‍ത്തിയാക്കി മൃതദേഹം നാട്ടിലേക്ക് കൊണ്ടുപോകും. ഭാര്യ - സുമിത. മക്കൾ - ശരത്, ശ്യാംജിത്.