തെക്കന്‍ ഇറാനില്‍ അനുഭവപ്പെട്ട ഭൂചലനത്തിന്‍റെ പ്രകമ്ബനം യുഎഇ ഉള്‍പ്പെടെയുള്ള ഗള്‍ഫ് രാജ്യങ്ങളില്‍ അനുഭവപ്പെട്ടതായി റിപ്പോര്‍ട്ടുകള്‍. വ്യാഴാഴ്ച വൈകുന്നേരം 5.59നാണ് റിക്ടര്‍ സ്കെയിലില്‍ 5.3 രേഖപ്പെടുത്തിയ ഭൂചലനം ദക്ഷിണ ഇറാനില്‍ ഉണ്ടായത്. യുഎഇയിൽ ദുബൈ, ഷാര്‍ജ എന്നിവിടങ്ങളില്‍ പലര്‍ക്കും ഇതിന്‍റെ പ്രകമ്പനം അനുഭവപ്പെട്ടതായി സമൂഹമാധ്യമങ്ങളില്‍ ആശങ്ക പങ്കുവെച്ചിട്ടുണ്ട്.

തുടരെ തുടരെ ഇറാനിലുണ്ടാകുന്ന ഭൂചലനത്തിന്റെ പ്രകമ്പനം യുഎഇയിൽ അനുഭവപ്പെടുന്നത് പ്രവാസികളെയും ആശങ്കയിലാക്കിയിരിക്കുകയാണ്. ഭൂചലനം ഉണ്ടായത് യുഎഇയിലെ ദേശീയ കാലാവസ്ഥാ നിരീക്ഷണ കേന്ദ്രവും സ്ഥിരീകരിച്ചു. മുമ്പും തെക്കന്‍ ഇറാനിലുണ്ടായ ഭൂചലനങ്ങളുടെ പ്രകമ്പനം യു.എ.ഇയില്‍ അനുഭവപ്പെട്ടിട്ടുണ്ട്. യുഎഇയ്ക്ക് പുറമേ, ബഹ്റൈന്‍, സൗദി അറേബ്യ, ഖത്തര്‍ എന്നീ രാജ്യങ്ങളില്‍ ഭൂചലനം അനുഭവപ്പെട്ടുവെന്ന് അമേരിക്കന്‍ ജിയോളജിക്കല്‍ ഏജന്‍സി അറിയിച്ചു.

യുഎഇയിലെ പ്രാദേശിക സമയം വൈകുന്നേരം 5.59നായിരുന്നു ഭൂചലനം അനുഭവപ്പെട്ടത്. റിക്ടര്‍ സ്‍കെയിലില്‍ 5.3 ആണ് തീവ്രത രേഖപ്പെടുത്തിയത്. ദക്ഷിണ ഇറാനിലെ ഇറാനിലെ ബന്ദര്‍ - ഇ- ലേങിന് സമീപം ആയിരുന്നു പ്രഭവ കേന്ദ്രം. ഭൗമ ഉപരിതലത്തില്‍ നിന്ന് 10 കിലോമീറ്റര്‍ ആഴത്തിലായിരുന്നു ചലനം.

അതേസമയം യുഎഇയില്‍ എവിടെയും നാശനഷ്ടങ്ങള്‍ റിപ്പോര്‍ട്ട് ചെയ്യപ്പെട്ടിട്ടില്ലെന്ന് ഔദ്യോഗിക അറിയിപ്പ് വ്യക്തമാക്കി. എന്നാല്‍, എവിടെയും ആശങ്കപ്പെടേണ്ട സാഹചര്യമില്ലെന്ന് അധികൃതര്‍ അറിയിച്ചു. ഇറാനിലും മറ്റ് ഗള്‍ഫ് രാജ്യങ്ങളിലും ഈ വര്‍ഷം നേരത്തെ പലതവണ ചെറിയ ഭൂചലനങ്ങള്‍ റിപ്പോര്‍ട്ട് ചെയ്യപ്പെട്ടിരുന്നു.

ദക്ഷിണ ഇറാനില്‍ ജൂലൈയിൽ ഉണ്ടായ ഭൂചലനത്തിൽ മൂന്ന് മരണം റിപ്പോർട്ട് ചെയ്തിരുന്നു. 19 പേര്‍ക്ക് പരുക്കേൾക്കുകയും ചെയ്തിരുന്നു. പലയിടത്തും നശനഷ്ടങ്ങളുണ്ടായാതായും റിപ്പോര്‍ട്ടുകളുണ്ടായിരുന്നു. ദക്ഷിണ ഇറാനില്‍ ഗള്‍ഫ് തീരത്തോട് ചേര്‍ന്നുള്ള ബന്ദര്‍ ഖമീറായിരുന്നു ഭൂകമ്പത്തിന്റെ പ്രഭവകേന്ദ്രം. പ്രാദേശിക സമയം പുലര്‍ച്ചെ 1.32നാണ് 10 കി.മീറ്റര്‍ ദൂരത്തില്‍ ആദ്യം ഭൂചലനം അനുഭവപ്പെട്ടത്. ഇത് റിക്ടര്‍ സ്‌കെയിലില്‍ 6.3 തീവ്രത രേഖപ്പെടുത്തി. പിന്നാലെ, 3.24ഓടെ മറ്റൊരു ഭൂകമ്പം കൂടി അനുഭവപ്പെടുകയായിരുന്നു. ഭൂകമ്പത്തിന്റെ പ്രകമ്പനം യു എ ഇ, സൗദി അറേബ്യ, ബഹ്റൈന്‍, ഒമാന്‍, ഖത്തര്‍, പാകിസ്ഥാന്‍, അഫ്ഗാനിസ്താന്‍ എന്നിവിടങ്ങളിലെല്ലാം അനുഭവപ്പെട്ടതായി ‘ഗള്‍ഫ് ന്യൂസ്’ റിപ്പോര്‍ട്ട് ചെയ്തിരുന്നു.