യുഎഇയിലേക്ക് ജോലി തേടിപോകുന്ന പ്രവാസികൾ തലവേദനയായി പുതിയ നിബന്ധന ഏർപ്പെടുത്തിയിരിക്കുകയാണ്. വിസിറ്റ് വിസക്കാരാണ് യുഎഇയുടെ പുതിയ നിബന്ധന കാരണം വട്ടംകറങ്ങാൻ പോകുന്നത്. അതായത് ഇനി പാസ്‌പോർട്ടിൽ ഒറ്റ പേരുള്ളവർക്ക് യുഎഇയിലേക്ക് വിസിറ്റ് വിസയിൽ വരാനാവില്ലെന്നാണ് മുന്നറിയിപ്പ്.

ഉദാഹരണത്തിന് നിങ്ങളുടെ പാസ്പോർട്ടിലെ പേര് പ്രവീൺ എന്ന ഒറ്റപ്പേരു മാത്രമാണെങ്കിൽ വിസ കിട്ടില്ല. പ്രവീൺകുമാർ എന്ന പേരിലെ പ്രവീൺ ഗിവൺ നെയിമും കുമാർ സർ നെയിം ആക്കുകയോ പ്രവീൺ കുമാർ എന്നു രണ്ടായി രേഖപ്പെടുത്തുകയോ ചെയ്യണം.

സർനെയിമോ, രണ്ടാം പേരോ പാസ്പോർട്ടിൽ വേണമെന്നാണ് നിബന്ധന. ഇതോടെ ഒറ്റ പേരുകാരായവർക്ക് മുന്നിൽ വാതിലടച്ചിരിക്കുകയാണ് യുഎഇ. എന്നാൽ താമസ, തൊഴിൽ വിസക്കാർക്ക് വിലക്ക് ബാധകമായിരിക്കില്ല. പുതിയ നിയന്ത്രണം എയർ ഇന്ത്യ സ്ഥിരീകരിച്ചിട്ടുണ്ട്. നിലവിൽ ഒറ്റപ്പേരുകാരായ റസിഡന്റ് വീസക്കാർക്ക് നിയമം ബാധകമല്ല. എന്നാൽ, പാസ്പോർട്ട് പുതുക്കുമ്പോൾ ഇവരും പേരു വിപുലീകരിക്കണം. രാജ്യാന്തര പാസ്പോർട്ട് നിയമപ്രകാരം ഗിവൺ നെയിം, സർ നെയിം എന്നിവ വേണമെന്നുണ്ടെങ്കിലും കർശനമായി നടപ്പാക്കിയിരുന്നില്ല. 

മറ്റൊരു പ്രധാനപ്പെട്ട കാര്യം ഇതിനകം വീസ ഇഷ്യു ചെയ്ത പാസ്പോർട്ടിൽ സിംഗിൾ നെയിം ഉള്ളവരെയും യുഎഇ എമിഗ്രേഷനുകൾ തടയും. കഴിഞ്ഞ രണ്ടു ദിവസമായി ഈ നിയമം പ്രാബല്യത്തിലായിട്ടുണ്ട്. ഇതിനകം വീസ ഇഷ്യു ചെയ്തവരെയെങ്കിലും ഈ നിയമത്തിൽ നിന്ന് ഒഴിവാക്കാനുള്ള ശ്രമം എയർലൈൻസുകളുടെ ഭാഗത്ത് നിന്ന് ആരംഭിച്ചിട്ടുണ്ടെന്നാണ് വിവരം. ഇത്തരം വീസക്കാർ രണ്ടു ദിവസമെങ്കിലും കാത്തിരിക്കണമെന്നുമാണ് ചില ട്രാവൽ ഏജന്റുമാർ അവരുടെ ഉപയോക്താക്കൾക്ക് നൽകുന്ന നിർദേശം.

അതേസമയം, സന്ദർശന വിസയിൽ രാജ്യത്ത് എത്തുന്നവർക്ക് വിസ പുതുക്കുന്നതിൽ സൗദി പുതിയ മാർഗനിർദേശങ്ങൾ പുറപ്പെടുവിച്ചിരുന്നു. വിസ പുതുക്കുന്നതിനായി പുതിയ ആരോഗ്യ ഇൻഷുറൻസ് പ്രീമിയം അടയ്ക്കണമെന്ന് ആരോഗ്യ ഇന്‍ഷൂറന്‍സ് കൗണ്‍സില്‍ അറിയിച്ചു. വിസിറ്റിംഗ് വിസ നീട്ടിനൽകാൻ അഭ്യർഥിക്കുന്ന സമയത്ത് പുതുക്കിയ വിസയോടൊപ്പം ഈ ഇൻഷുറൻസ് പരിരക്ഷ ലഭിക്കുന്നതായിരിക്കും.

തവുനിയ, ബൂപ, മെഡ്ഗള്‍ഫ്, ഗള്‍ഫ് യൂണിയന്‍, അറേബ്യന്‍ ഷീല്‍ഡ് കോഓപ്പറേറ്റീവ് ഇന്‍ഷൂറന്‍സ്, അറേബ്യന്‍ കോഓപ്പറേറ്റീവ് ഇന്‍ഷൂറന്‍സ്, അല്‍ ഇത്തിഹാദ് കോഓപ്പറേറ്റീവ്, അല്‍ സഗര്‍ കോഓപ്പറേറ്റീവ് ഹെല്‍ത്ത് ഇന്‍ഷൂറന്‍സ്, എഎക്‌സ്എ കോഓപ്പറേറ്റീവ്, അലൈഡ് കോഓപ്പറേറ്റീവ് ഇന്‍ഷൂറന്‍സ് ഗ്രൂപ്പ്, അല്‍ റാജ്ഹി തകാഫുല്‍, വലാ, സൗദി ഇനായ തുടങ്ങിയ സൗദിയിലെ ലൈസന്‍സുള്ള ഇന്‍ഷൂറന്‍സ് കമ്പനികളില്‍ നിന്ന് ആരോഗ്യ ഇന്‍ഷുറന്‍സ് പരിരക്ഷ ലഭിക്കും. ഇത്തരത്തിലുള്ള അംഗീകൃത കമ്പനികളിൽ നിന്ന് തന്നെ നിർബന്ധമായും ഇൻഷുറൻസ് നേടിയിരിക്കണം.

വിസിറ്റിംഗ് വിസയുടെ കാലാവധി പുതിയ നിർദേശപ്രകാരം 180 ദിവസം വരെ നീട്ടി നൽകുന്നതായിരിക്കും. വിസാ കാലാവധി 180 ദിവസത്തില്‍ കൂടുതലാകാത്ത നിലയിലായിരിക്കും വിസ ദീർഘിപ്പിച്ച് നൽകുക. സൗദിയില്‍ എത്തിയത് മുതലുള്ള കാലാവധിയാണ് ഇതിനായി പരിഗണിക്കുക. ഇതിനായി നിശ്ചിത തുക ഫീസിനത്തിൽ നൽകേണ്ടതുണ്ട്.

വിസിറ്റ് വിസയിൽ എത്തുന്നവരുടെ താമസക്കാലാവധിയും വർധിപ്പിച്ചിട്ടുണ്ട്. സിംഗിള്‍ എന്‍ട്രി വിസിറ്റ് വിസകളില്‍ സൗദിയില്‍ എത്തുന്നവര്‍ക്ക് രാജ്യത്ത് താമസിക്കാവുന്ന കാലാവധി മൂന്ന് മാസമായി വര്‍ധിപ്പിക്കാനുള്ള ശുപാര്‍ശയ്ക്ക് മന്ത്രിസഭാ യോഗം അംഗീകാരം നൽകി കഴിഞ്ഞു. ട്രാന്‍സിറ്റ് വിസകളില്‍ എത്തുന്നവരുടെ താമസ കാലാവധി 96 മണിക്കൂറായും വര്‍ധിപ്പിച്ചിട്ടുണ്ട്. വിസ ഘടനയിലെ ഭേദഗതികള്‍ അനുസരിച്ച്, സന്ദര്‍ശനത്തിനായുള്ള ട്രാന്‍സിറ്റ് വിസയുടെ സാധുത മൂന്ന് മാസമായിരിക്കും. ഈ വിസയില്‍ എത്തുന്നവര്‍ക്ക് സൗജന്യമായി 96 മണിക്കൂര്‍ വരെ സൗദിയില്‍ തങ്ങാം.വിസാ കാലാവധി കഴിഞ്ഞും രാജ്യത്ത് തങ്ങുന്നവർക്ക് കനത്ത പിഴയായിരിക്കും ഒടുക്കേണ്ടി വരിക.