സൗദിയിൽ അടങ്ങാത്ത ആഘോഷം. യുഎഇയിലും താരമായി സൗദി. ഫിഫ ലോകകപ്പില്‍ വന്‍ അട്ടിമറിയിലൂടെ മെസ്സിപ്പടയെ തറപറ്റിച്ച് ചരിത്ര വിജയം സ്വന്തമാക്കിയ സൗദിയിൽ എങ്ങും വൻ ആഘോഷമാണ്. സൗദിയുടെ ഈ മിന്നും വിജയം അറബ് ലോകവും ആഘോഷമാക്കുകയാണ്. സഹോദര രാഷ്ട്രത്തിന്റെ വിജയം യു.എ.ഇയും ഏറ്റെടുത്തിരിക്കുകയാണ്. അവിടുത്തെ സ്വദേശികൾ മാത്രമല്ല പ്രവാസികളും ഒറ്റക്കെട്ടായി തന്നെ ഇതിൽ സന്തോഷം പങ്കിട്ടു.

അതിനിടയിൽ സാക്ഷാൽ ബുർജ് ഖലീഫയിൽ സൗദിയുടെ ദേശീയ പതാക പ്രദർശിപ്പിച്ചാണ് ദുബൈ വിജയാഘോഷത്തിൽ പങ്കുചേർന്നത്. ബുർജ് ഖലീഫയുടെ ഔദ്യോഗിക ഇൻസ്റ്റഗ്രാം അക്കൗണ്ടിൽ തന്നെ ഇന്നലെ രാത്രി സൗദി പതാക പ്രദർശിപ്പിക്കുന്ന വീഡിയോ പോസ്റ്റ് ചെയ്തിട്ടുണ്ട്. സൗദിയുടെ ഗംഭീര വിജയത്തെയും താരങ്ങളുടെ പ്രകടനത്തെയും ആരാധകർ പ്രശംസിച്ചു.

എന്നാൽ വിജയാഘോഷത്തിന്റെ കൊടുമുടിയിലാണ് സൗദി. വീണുകിട്ടിയ ഭാഗ്യമല്ല, പൊരുതി നേടിയ വിജയമാണ് സൌദിയുടെ വിജയത്തിന് മിഴിവേകുന്നത്. ആദ്യ മത്സരത്തില്‍ തന്നെ കരുത്തരായ അർജന്റീനയെ തകർത്തത് സൗദിയിൽ പൊതു അവധി പ്രഖ്യാപിച്ചുകൊണ്ടാണ് സൗദി ഭരണാധികാരി സൽമാൻ രാജാവ് വിജയത്തെ വരവേറ്റത്. എല്ലാ പൊതു, സ്വകാര്യ ജീവനക്കാർക്കും ഇന്ന് അവധിയായിരിക്കുമെന്ന് സൗദി ഭരണാധികാരി സൽമാൻ രാജാവ് അറിയിച്ചതായി സ്റ്റേറ്റ് മീഡിയയാണ് റിപ്പോർട്ട് ചെയ്തത്.

സ്കൂളുകളും അടഞ്ഞുകിടക്കും. ഗൾഫ് രാജ്യങ്ങളിലെ അവസാന പരീക്ഷകൾ നടക്കാനിരിക്കെയാണ് ഈ പൊതു അവധി പ്രഖ്യാപനം. ഇതോടെ പരീക്ഷികള്‍ മാറ്റിവെക്കേണ്ടി വരുമെങ്കിലും ടീമിന്റെ വിജയം ആഘോഷിക്കാന്‍ വിദ്യാർത്ഥികള്‍ക്കും അധികൃതർ അവസരം ഒരുക്കുകയായിരുന്നു. പൊതു സ്വകാര്യ സ്ഥാപനങ്ങൾക്കും സ്കൂളുകൾക്കും അവധി ബാധകമായിരിക്കും. ചൊവ്വാഴ്ച നഗരത്തിലെ പ്രധാന തീം പാർക്കുകളിലും വിനോദ കേന്ദ്രങ്ങളിലും പ്രവേശന ഫീസ് ഒഴിവാക്കുമെന്ന് റോയൽ കോർട്ടിലെ ഉപദേശകനും സൗദി അറേബ്യയുടെ ജനറൽ എന്റർടൈൻമെന്റ് അതോറിറ്റിയുടെ തലവനുമായ തുർക്കി അൽ ഷെയ്ഖ് അറിയിച്ചു.

അവധി മാത്രമല്ല കളിക്കാർക്കെല്ലാം റോൾസ് റോയ്സ് കാർ സമ്മാനിക്കുമോ എന്ന് ആകാംക്ഷയിലാണ് സമൂഹമാധ്യമങ്ങൾ. 1994 ലെ ലോകകപ്പിൽ ബൽജിയത്തിന് എതിരെ സെയിദ് അൽ ഓവ്എയ്റൻ നേടിയ അദ്ഭുത ഗോളിന് ശേഷം രാജാവ് റോൾസ് റോയ്സ് കാർ സമ്മാനിച്ചിരുന്നു. ഏറ്റവും മഹത്തായ ലോകകപ്പ് ഗോളുകളിലൊന്ന് എന്ന പേരും ആ ഗോളിന് ലഭിച്ചിരുന്നു. ഈ സംഭവമാണ് ഇത്തരമൊരു ചർച്ചയ്ക്ക് വഴിയൊരുക്കിയിരിക്കുന്നത്.

ഗോൾ അടിച്ചവർക്ക് മാത്രമല്ല, അർജന്റീനയെ പിടിച്ചു കെട്ടിയ എല്ലാവർക്കും പുതിയ റോൾസ് റോയ്സ് ഫാന്റം കാർ സമ്മാനിക്കുമോ എന്നാണ് സമൂഹമാധ്യമങ്ങളിലെ സൗദി ആരാധകരുടെ ചോദ്യം. എന്തായാലും കളിക്കാർക്കെല്ലാം എന്താണ് സമ്മാനമായി സാൽമാൻ രാജാവ് കരുതിവച്ചിരിക്കുന്നതെന്ന് ആകാക്ഷയിൽ തന്നെയാണ് എല്ലാവരും. റോൾസ് റോയ്സ് കാർ തന്നെ സമ്മാനിക്കുമോ അതോ അതിനും മീതെ എന്തെങ്കലുമാണോ എന്ന് അധികം വൈകാതെ തന്നെ അറിയാൻ സാധിക്കും.