യുഎഇയില്‍ ഭാഗ്യ പരീക്ഷണത്തിന്‍റെ കാര്യത്തില്‍ പ്രവാസികള്‍ കുതിക്കുകയാണ്. അതിപ്പോള്‍ അബുദാബി ബിഗ് ടിക്കറ്റിന്‍റെ കാര്യത്തിലായാലും, ദുബായ് ഡ്യൂട്ടി ഫ്രീ മില്ലേനിയം നറുക്കെടുപ്പില്‍ ആയാലും പ്രവാസികള്‍ക്ക് ഭാഗ്യം ഉറപ്പാണ്. ഇത് അറബികളെ പോലും അസൂയപ്പെടുത്തുകയാണ്. ഇപ്പോൾ വീണ്ടും പ്രവാസി ഇന്ത്യക്കാരനെ തേടി ഭാഗ്യം എത്തിയിരിക്കുകയാണ്. ബിഗ് ടിക്കറ്റിന്റെ നവംബര്‍ മാസത്തെ അവസാനത്തെ പ്രതിവാര ഇ-നറുക്കെടുപ്പില്‍ കോടികൾ സമ്മാനം നേടിയിരിക്കുകയാണ് പ്രവാസി ഇന്ത്യക്കാരൻ.

ഭാര്യയുമായി ചേര്‍ന്ന് ബിഗ് ടിക്കറ്റെടുത്ത ഇന്ത്യക്കാരനായ ഷംശുദ്ദീന്‍ മുഹമ്മദിനാണ് ബിഗ് ടിക്കറ്റിലൂടെ 10 ലക്ഷം ദിര്‍ഹം അതായത് രണ്ട് കോടിയിലധികം ഇന്ത്യന്‍ രൂപ സമ്മാനമായി ലഭിച്ചത്. കുവൈത്തിൽ താമസമാക്കിയ ഷംശുദ്ദീന് അഞ്ച് മക്കളാണ് ഉള്ളത്. നറുക്കെടുപ്പിൽ വിജയിച്ചാല്‍ ലഭിക്കുന്ന സമ്മാനത്തുക തങ്ങളുടെ അഞ്ച് മക്കളുടെ ഭാവിക്കായി നിക്ഷേപിക്കാമെന്ന കണക്കുക്കൂട്ടലിലാണ് അദ്ദേഹം ബിഗ് ടിക്കറ്റില്‍ പങ്കെടുത്ത് തുടങ്ങിയത്.

സമ്മാന വിവരം അറിയിക്കാന്‍ ബിഗ് ടിക്കറ്റ് പ്രതിനിധികള്‍ വിളിച്ചപ്പോള്‍ അദ്ദേഹത്തിന് സന്തോഷം അടക്കാനായില്ല. നറുക്കെടുപ്പില്‍ വെറും ആറാമത്തെ ശ്രമത്തിന് ശേഷമാണ് ഷംസുദ്ദീനെ തേടി സമ്മാനവിവരം അറിയിച്ചുള്ള ഫോണ്‍ കോളെത്തിയത്. തുടര്‍ന്നും ബിഗ് ടിക്കറ്റില്‍ പങ്കെടുക്കുമെന്നും എന്നെങ്കിലും ഒരിക്കല്‍ ബിഗ് ടിക്കറ്റിന്റെ വന്‍തുകയുടെ ഗ്രാന്‍ഡ് പ്രൈസ് സ്വന്തമാക്കാനാകുമെന്നുമാണ് ഷംസുദ്ദീന്‍ പറയുന്നത്.

മാത്രമല്ല ദുബായ് ഡ്യൂട്ടി ഫ്രീ മില്ലേനിയം നറുക്കെടുപ്പില്‍ ആയാലും പ്രവാസികള്‍ക്ക് ഭാഗ്യം ഉറപ്പാണ്. ഇത്തവണയും ദുബായ് ഡ്യൂട്ടി ഫ്രീ മില്ലേനിയം 407 സീരിസ് നറുക്കെടുപ്പില്‍ പ്രവാസി മലയാളിയെ തേടി തന്നെയാണ് ഭാഗ്യദേവത എത്തിയത്. 10 ലക്ഷം ഡോളര്‍ സമ്മാനമായി ഈ മലയാളി നേടിയത്. അതായത് ഏഴ് കോടിയിലധികം രൂപ. ദുബായില്‍ താമസമാക്കിയ 46 കാരനായ ജയകൃഷ്ണനാണ് ഈ കോടികളുടെ ഭാഗ്യശാലി.

ഒരു യാത്രക്കായി വിമാനത്താവളത്തില്‍ എത്തിയപ്പോള്‍ അദ്ദേഹം എടുത്ത ടിക്കറ്റിനാണ് ഏഴ് കോടിയിലധികം രൂപ ഇപ്പോള്‍ ലഭിച്ചിരിക്കുന്നത്. ദുബായ് വിമാനത്താവളത്തില്‍ വെച്ചാണ് ജയകൃഷ്ണന്‍ ടിക്കറ്റ് എടുത്തത്.നവംബര്‍ എട്ടാം തീയതി ഭാര്യയോടൊപ്പം ലണ്ടനിലേക്കുള്ള യാത്രയ്ക്കിടെ ദുബായ് അന്താരാഷ്ട്ര വിമാനത്താവളത്തില്‍ വെച്ച് എടുത്ത ടിക്കറ്റിനാണ് സമ്മാനം ലഭിച്ചത്. ബുധനാഴ്ച വൈകുന്നേരം ദുബായ് വിമാനത്താവളത്തിലെ മൂന്നാം ടെര്‍മിനലിലുള്ള കോണ്‍കോഴ്‌സ് ബിയില്‍ വെച്ചായിരുന്നു നറുക്കെടുപ്പ്.

ദേറയില്‍ ഇന്റെഗ്രല്‍ നെറ്റ് വര്‍ക്ക് എല്‍എല്‍സി എന്ന കമ്പനിയില്‍ ഓപ്പറേഷന്‍സ് മാനേജറായി ജോലി ചെയ്യുകയാണ് മലയാളിയായ ജയകൃഷ്ണന്‍. ഏറെ നാളായി ദുബായ് ഡ്യൂട്ടി ഫ്രീയില്‍ പങ്കെടുക്കുന്നയാളാണ് ജയകൃഷ്ണന്‍. എന്നാല്‍, വിജയിയായപ്പോള്‍ അതൊരു അവിശ്വസനീയമായ അനുഭവം ആയിരുന്നെന്ന് അദ്ദേഹം പറഞ്ഞു. നിരവധി പേരുടെ ജീവിതത്തിലാണ് ദുബായ് ഡ്യൂട്ടി ഫ്രീ മാറ്റം വരുത്തുന്നതെന്നും അവരില്‍ ഒരാളാകാന്‍ കഴിഞ്ഞതില്‍ സന്തോഷമുണ്ടെന്നും അദ്ദേഹം പറഞ്ഞു. മില്ലേനിയം മില്യനയര്‍ നറുക്കെടുപ്പിന് ശേഷം രണ്ട് ആഡംബര വാഹനങ്ങള്‍ക്ക് വേണ്ടിയുള്ള ഫൈനസ്റ്റ് സര്‍പ്രൈസ് നറുക്കെടുപ്പും നടന്നു.