കൂടുതൽ വിമാന സർവീസുകൾ ഏർപ്പെടുത്താനൊരുങ്ങുകയാണ് വിസ്താര എയർലൈൻസ്. മിഡിൽ ഈസ്റ്റ് ​രാജ്യങ്ങളെ ലക്ഷ്യമിട്ട് ഇന്ത്യയിൽ നിന്ന്​ വിമാന സർവീസുകൾ വ്യാപിപ്പിക്കും. ഇതിന്‍റെ ഭാഗമായി മുംബൈ-മസ്കത്ത്​ പ്രതിദിന സര്‍വീസ് ആരംഭിച്ചതായി വിസ്താര എയർലൈൻ അറിയിച്ചു.

ഗൾഫിലെ നാലാമത്തെ ലക്ഷ്യസ്ഥാനമാണിത്​. ആഴ്ചയിൽ ഏഴ് സർവീസുകൾ വീതം നടത്തും . എ320 നിയോ എയർക്രാഫ്റ്റ് ആയിരിക്കും സർവീസിന് ഉപയോഗിക്കുന്നത്. എല്ലാ ദിവസവും രാത്രി 8.30ന് മുംബൈയിൽ നിന്ന് പുറപ്പെടുന്ന വിമാനം പ്രാദേശിക സമയം രാത്രി 9.35ന് മസ്‌കത്ത് രാജ്യാന്തര വിമാനത്താവളത്തില്‍ എത്തും.

രാത്രി 10.55ന് മസ്‌കത്തിൽ നിന്ന് പുറപ്പെടുന്ന വിമാനം ഇന്ത്യൻ സമയം പുലർച്ചെ 3.10ന് മുംബൈയിൽ മടങ്ങിയെത്തും.ടാറ്റ ഗ്രൂപ്പിന്‍റെയും സിംഗപ്പൂര്‍ എയര്‍ലൈന്‍സിന്‍റെയും സംയുക്ത സംരംഭമായ വിസ്താര വർധിച്ച ഡിമാന്‍റ്​ പരിഗണിച്ചാണ് നെറ്റ്‌വര്‍ക്ക്​ വിപുലപ്പെടുത്തുന്നത്​. നാല് മാസത്തിനുള്ളില്‍ വിസ്താര നെറ്റ്‌വര്‍ക്കിലേക്ക് ചേര്‍ത്ത മൂന്നാമത്തെ ഗള്‍ഫ് നഗരമാണ് മസ്‌കത്ത്. ജിദ്ദയും അബുദാബിയും നേരത്തെ സർവീസ് തുടങ്ങിയിരുന്നു.