യുഎഇയില്‍ താമസവിസ എമിറേറ്റ്സ് ഐഡിയില്‍‍ രേഖപ്പെടുത്തി തുടങ്ങിയിരുന്നു. രാജ്യത്തെ മറ്റ് എമിറേറ്റുകളിൽ പാസ്പോർട്ട് രഹിത സൗകര്യം കഴിഞ്ഞ മേയ് മുതൽ നിലവിൽ വന്നിരുന്നു. എന്നാൽ പാസ്പോർട്ടിൽ വീസ പതിക്കുന്നത് ഇപ്പോൾ ദുബായിലും പൂർണമായി നിർത്തലാക്കിയിരിക്കുകയാണ്. കഴിഞ്ഞ ആഴ്ചയാണ് ദുബായിൽ വീസ പതിപ്പിക്കുന്നത് നിർത്തിയത്. ഇതോടെ യുഎഇയിൽ റസിഡന്റ് വിസയുള്ള പ്രവാസികൾക്ക് ഇനി മുതൽ പാസ്പോർട്ടിന് പകരം എമിറേറ്റ്സ് ഐഡി ഉപയോഗിക്കാവുന്നതാണ്.

യുഎഇയിലേക്കുള്ള വരവും തിരിച്ചുപോക്കും എളുപ്പമാക്കാൻ ലക്ഷ്യമാക്കിയുള്ളതാണ് പരിഷ്കാരം. അതോടെ റസിഡന്റ് വിസയുള്ളവർക്ക് ലോകത്തെവിടെ നിന്നും ഏത് എമിറേറ്റിലേക്കും പാസ്പോർട്ടില്ലാതെ വിമാനയാത്ര ചെയ്യാം. വ്യക്തിഗത വിവരങ്ങൾക്ക് പുറമേ, ജോലി ചെയ്യുന്ന കമ്പനിയുടെ പേര്, തസ്തിക, കാർഡ് നമ്പർ, കാലാവധി, ഇഷ്യൂ ചെയ്ത എമിറേറ്റ് തുടങ്ങി വിസയിലെ വിവരങ്ങളെല്ലാം എമിറേറ്റ്സ് ഐഡിയിലും ഉണ്ട്. വിസയ്ക്ക് അപേക്ഷിക്കുന്നവർക്കും നിലവിലെ വീസ പുതുക്കുന്നവർക്കും എല്ലാ വിവരങ്ങളും ഉൾപ്പെടുത്തിയ എമിറേറ്റ്സ് ഐഡിയാണ് ലഭിക്കുക.

എന്നാൽ, നിലവിൽ കാലാവധിയുള്ള വീസക്കാർക്ക് പാസ്പോർട്ട് ഉപയോഗിച്ചും യാത്രചെയ്യാം. പാസ്‌പോർട്ട് നമ്പറോ എമിറേറ്റ്‌സ് ഐഡിയോ ഉപയോഗിച്ച് എയർലൈനുകൾക്ക് യാത്രക്കാരന്റെ റസിഡൻസി സ്റ്റേറ്റസ് പരിശോധിക്കാം. മറ്റു വിദേശ രാജ്യങ്ങളിലെ എമിഗ്രേഷനിൽ പാസ്പോർട്ട് റീഡർ മുഖേന എമിറേറ്റ്സ് ഐഡി കാർഡിലെ വിവരങ്ങൾ ലഭിക്കുമെന്നതിനാൽ യാത്രയ്ക്കും തടസ്സമുണ്ടാകില്ല..

യുഎഇയില്‍ താമസവിസ എമിറേറ്റ്സ് ഐഡിയില്‍‍ രേഖപ്പെടുത്തി തുടങ്ങിയതോടെ പണമിടപാടുകള്‍ക്ക് ഐഡി മതിയെന്ന് യുഎഇ സെന്‍ട്രല്‍ ബാങ്ക് നിർദ്ദേശിച്ചിരുന്നു. രാജ്യത്തെ ബാങ്കുകള്‍ക്കും പണമിടപാട് സ്ഥാപനങ്ങള്‍ക്കുമാണ് നിർദ്ദേശം നല്‍കിയിട്ടുളളത്. യുഎഇയില്‍ താമസ തൊഴില്‍ വിസയുളളവർക്ക് എമിറേറ്റ്സ് ഐഡിയുണ്ടെങ്കില്‍ ബാങ്കുകളിലും പണമിടപാട് സ്ഥാപനങ്ങളിലും പണമിടപാട് നടത്താം. ഏപ്രില്‍ 11 മുതലാണ് എമിറേറ്റ്സ് ഐഡിയില്‍ താമസ വിസ രേഖപ്പെടുത്തുന്നത് യുഎഇ ആരംഭിച്ചത്. യുഎഇയ്ക്ക് പുറത്തുള്ളവര്‍ തിരിച്ചെത്തുമ്പോള്‍ വിമാനത്താവളങ്ങളില്‍ പാസ്‌പോര്‍ട്ടിനൊപ്പം ഐഡി കാര്‍ഡ് കാണിക്കേണ്ടതാണ്.

ഐഡിയില്ലെങ്കില്‍ ഫെഡറല്‍ അതോറിറ്റി ഫോര്‍ ഐഡന്റിറ്റി സിറ്റിസണ്‍ഷിപ്പ്, കസ്റ്റംസ് ആന്റ് പോര്‍ട്ട് സെക്യൂരിറ്റി വെബ്‌സൈറ്റില്‍ നിന്നോ ആപ്പ് വഴിയോ പകര്‍പ്പെടുക്കാം. വിസ, എമിറേറ്റ്സ് ഐഡി പകര്‍പ്പിന് അപേക്ഷിച്ചാല്‍ ഇമെയില്‍ വഴിയും ലഭിക്കും. പാസ്പോര്‍ട്ട് നമ്പറും എമിറേറ്റ്സ് ഐഡിയും ഉപയോഗിച്ച് എയര്‍ലൈനുകള്‍ക്ക് താമസ വിസയുടെ നിജസ്ഥിതി പരിശോധിക്കാന്‍ സാധിക്കും. ഇതു സംബന്ധിച്ച വിവരങ്ങള്‍ വിമാനക്കമ്പനികള്‍ക്ക് കൈമാറിയിട്ടുണ്ട്. ഏപ്രില്‍ 11 മുതല്‍ നിലവില്‍ വന്ന താമസ വിസ മാറ്റത്തിലൂടെ ഇതിനു ശേഷം പാസ്പോര്‍ട്ടില്‍ സ്റ്റാമ്പ് ചെയ്യുന്ന പതിവ് യുഎഇ നിര്‍ത്തലാക്കുകയാണെന്ന് അധികൃതര്‍ അറിയിച്ചിരുന്നു. താമസവിസ കാണിക്കേണ്ട സാഹചര്യങ്ങളിലെല്ലാം ഇനിമുതൽ എമിറേറ്റ്സ് ഐഡി ഉപയോഗിച്ചാല്‍ മതി.

ഫെഡറൽ അതോറിറ്റി ഓഫ് ഐഡന്റിറ്റി ആന്റ് സിറ്റിസൻഷിപ്പ് പുറത്തിറക്കുന്ന തിരിച്ചറിയൽ രേഖയാണ് എമിറേറ്റ്‌സ് ഐഡി എന്നത്. യുഎഇ പൗരന്മാർക്കും പ്രവാസികൾക്കും ഈ ഐഡി നിർബന്ധമാക്കിയിരിക്കുകയാണ്. സർക്കാർ സർവീസുകൾ, ഫെഡറൽ നാഷണൽ കൗൺസിൽ തെരഞ്ഞെടുപ്പിൽ വോട്ടു ചെയ്യൽ, യുഎഇ പൗരന്മാർക്ക് ജിസിസി രാജ്യങ്ങൾക്കുള്ളിലെ യാത്ര, വിമാനത്താവളങ്ങൾക്കുള്ളിലെ സ്മാർട് ഗേറ്റ്, ഇ ഗേറ്റ് എന്നിവിടങ്ങളിലൂടെയുള്ള ഇമിഗ്രേഷൻ എന്നിവയ്ക്കും ഐഡി കാർഡ് നിർബന്ധമാക്കിയിട്ടുണ്ട്.