യുഎഇ ഭരണാധികാരികളുടെ അനൗദ്യോഗിക സന്ദർശനങ്ങൾ വളരെ കൗതുകത്തോടെ ആണ് പ്രവാസികൾ ഉൾപ്പെടെ നോക്കി കാണുന്നത്. അത് പിന്നെ ആരാണ് അല്ലേ ഓർക്കാപ്പുറത്ത് ഇവരെ കണ്ടാൽ ആശ്ചര്യപ്പെടാത്തത്. എന്നാൽ ഇത്തവണ ദുബായ് ഭരണാധികാരിയും യുഎഇ വൈസ് പ്രസിഡൻ്റും പ്രധാനമന്ത്രിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം എല്ലാവരെയും ഞെട്ടിച്ചിരിക്കുകയാണ്. ദുബായിലെ ഒരു ലോക്കൽ ഹൈപ്പർ മാർക്കറ്റിൽ എത്തിയ അദ്ദേഹത്തിന്റെ വീഡിയോ ഇപ്പോൾ സമൂഹമാധ്യമങ്ങളിൽ വൈറലായി മാറിയിരിക്കുകയാണ്.

ഹൈപ്പർമാർക്കറ്റിൻ്റെ അൽ ഖൗനീജ് ഔട്ട്ലെറ്റിൽ ആളുകൾക്കിടയിലൂടെ സാധാരണ ഒരു പൗരനെ പോലെ സാധനങ്ങൾ നോക്കി നടക്കുന്ന ദുബായ് ഭരണാധികാരിയെ കണ്ടവർക്ക് അത്ഭുതമായിരുന്നു. പ്രിയപ്പെട്ട നേതാവിനെ അടുത്തുകാണാൻ കഴിഞ്ഞ ആവേശത്തിലായിരുന്നു ഷോപ്പിലെത്തിയവർ. അദ്ദേഹത്തിൻ്റെ ചിത്രങ്ങളും വീഡിയോയും സമൂഹമാധ്യമങ്ങളിൽ വൈകാതെ വൈറലാവുകയും ചെയ്തു. അദ്ദേഹത്തെ സ്വാഗതം ചെയ്യാൻ കഴിഞ്ഞത് ബഹുമതിയായി കാണുന്നുവെന്നായിരുന്നു ദുബായ് ഭരണാധികാരിയുടെ സന്ദർശനത്തെക്കുറിച്ച് ജിഎംജി കമ്പനിയുടെ സിഇഒ മുഹമ്മദ് എ ബേക്കർ ട്വീറ്റ് ചെയ്തത്.

ഇതാദ്യമായല്ല ദുബായ് ഭരണാധികാരി ഇത്തരത്തിൽ കടകളിൽ അനൗദ്യോഗിക സന്ദർശനം നടത്തുന്നത്. കഴിഞ്ഞ വർഷം ഏപ്രിലിൽ സമാനമായി മറ്റൊരു സൂപ്പർ മാർക്കറ്റും സന്ദർശിച്ചിരുന്നു. യൂണിയൻ കോപ് സൂപ്പർമാർക്കറ്റ് സന്ദർശിച്ച് വിലവിവരങ്ങളും സാധനങ്ങളും പരിശോധിച്ചാണ് ഭരണാധികാരി അന്ന് മടങ്ങിയത്. ഇതിനു മുൻപും സമാനമായ രീതിയിൽ പ്രാദേശിക ഹൈപ്പർമാർക്കറ്റുകൾ സന്ദർശിച്ച് പ്രദേശവാസികളെ ദുബായ് ഭരണാധികാരി അത്ഭുതപ്പെടുത്തിയിട്ടുണ്ട്. 2021ൽ ഇംപ്രോംപ്റ്റ് സൂപ്പർമാർക്കറ്റില്‍ അപ്രതീക്ഷിത സന്ദർശനം നടത്തിയിരിന്നു. ആ സമയത്ത് സൂപ്പർമാർക്കറ്റിലുണ്ടായിരുന്നവർ പങ്കുവച്ച വീഡിയോയിലൂടെയാണ് ഇക്കാര്യം ലോകമറിഞ്ഞത്.

2021 ജൂണ് 18 നാണ് സഹപ്രവർത്തകർക്കൊപ്പം എത്തിയ ദുബായ് ഭരണാധികാരിയുടെ വീഡിയോ പോസ്റ്റ് ചെ്യതിരിരുന്നത്. അദ്ദേഹത്തിന്റെ അപ്രതീക്ഷിത സന്ദർശന വീഡിയോ അന്നും സമൂഹ മാധ്യമങ്ങൾ ഏറ്റെടുത്തിരുന്നു ഇതിനും മുന്‍പും ഇത്തരം അപ്രതീക്ഷിത സന്ദ‍ർശനങ്ങള്‍ ദുബായ് ഭരണാധികാരി നടത്തിയിട്ടുണ്ട്. 2019 ല്‍ കോവിഡ് കാലത്തിന് മുന്‍പ് ദുബായ് ക്രീക്കില്‍ അപ്രതീക്ഷിതമായി എത്തി അബ്രയില്‍ സഞ്ചരിച്ചു. ദേരയിലെ ഗോള്‍ഡ് സൂഖിലും അദ്ദേഹം എത്തിയിരുന്നു.ദുബായ് ഫ്രയിം, സിറ്റി വാക്ക്, ഗ്ലോബല്‍ വില്ലേജ്, അപ്രതീക്ഷിതമായി ദുബായ് ഭരണാധികാരിയെത്തിയ മറ്റിടങ്ങളാണ്. 2016ൽ സർക്കാർ ഓഫിസിലും അദ്ദേഹം അപ്രതീക്ഷിത സന്ദർശനം നടത്തിയിരുന്നു.