ഇനി പ്രവാസികൾക്ക് ഇതിൽ പരം എന്ത് സന്തോഷമാണ് വേണ്ടത്. പറഞ്ഞുവരുന്നത് വിസ നടപടികൾ കൂടുതൽ ലഘൂകരിച്ചുള്ള യുഎഇയുടെ നടപടിയെ കുറിച്ചാണ്. നടപടികൾ കൂടുതൽ ലഘൂകരിച്ചു എന്നത് മാത്രമല്ല, പുതിയ വിസകൾ പ്രഖ്യാപിക്കുകയും ചെയ്തിട്ടുണ്ട്. പ്രവാസികൾക്ക് കുടുംബത്തെ ഇടയ്ക്ക് ഇടയ്ക്ക് കൊണ്ടുവരാൻ അതായത് കുടുംബങ്ങൾക്ക് പലതവണ വന്നു പോകാവുന്ന തരത്തിലുള്ള 5 വർഷ ടൂറിസ്റ്റ് വീസ പ്രഖ്യാപിച്ച് യുഎഇ.

കുടുംബാംഗങ്ങളെ സന്ദർശിക്കുന്നതിനു മറ്റും സ്ഥിരമായി വന്നു പോകുന്നവർക്ക് ഓരോ തവണയും വീസയ്ക്ക് അപേക്ഷിക്കുന്ന ബുദ്ധിമുട്ട് ഇതിലൂടെ ഒഴിവാക്കാം. ഇത്തരം അപേക്ഷകളിൽ സ്പോൺസർമാരുടെ ആവശ്യമില്ല. ട്രാവൽ ഏജന്റു വഴി ബുക്ക് ചെയ്യാനും കഴിയില്ല. ഐഡന്റിറ്റി, സിറ്റിസൻസ്ഷിപ്, കസ്റ്റംസ് ആൻഡ് പോർട് ആണ് വീസ നൽകുന്നത്. ഓൺലൈൻ വഴി നേരിട്ട് ഐസിപിയെ സമീപിക്കണം.ഐസിപിയുടെ സൈറ്റിൽ നേരിട്ട് അപേക്ഷിക്കാം.

കളർ ഫോട്ടോ, പാസ്പോർട്ടിന്റെ പകർപ്പ്, മടക്ക യാത്രയ്ക്കുള്ള ടിക്കറ്റ്, മെഡിക്കൽ ഇൻഷുറൻസ്, മടക്ക യാത്രയ്ക്കുള്ള ടിക്കറ്റ്, 6 മാസത്തെ ബാങ്ക് സ്റ്റേറ്റ്മെന്റ്. കുറഞ്ഞത് 14,700 ദിർഹം (3.3 ലക്ഷം രൂപ) ബാലൻസ്. യുഎഇയിൽ താമസിക്കുന്ന സ്ഥലത്തിന്റെ തെളിവ്. ഹോട്ടൽ ബുക്കിങ് രേഖയോ താമസിക്കുന്ന വീടിന്റെ രേഖയോ എന്നിവയാണ് ആവശ്യമായ രേഖകൾ:

കുടുംബ ടൂറിസ്റ്റ് വീസ അപേക്ഷിക്കുന്നവർ ഇനി എല്ലാവരുടെയും വിവരങ്ങൾ ചേർത്ത് ഒറ്റ അപേക്ഷ സമർപ്പിച്ചാൽ മതിയാകും. ഇതുവരെ, വീസ ആവശ്യമുള്ള ഓരോരുത്തർക്കും പ്രത്യേകം പ്രത്യേകം അപേക്ഷ നൽകണമായിരുന്നു. ഒറ്റ അപേക്ഷയിൽ 5 വർഷത്തേക്കുള്ള മൾട്ടിപ്പിൾ എൻട്രി ടൂറിസ്റ്റ് വീസ ലഭിക്കും. ഒരുമിച്ചു യാത്ര ചെയ്യുന്നവർക്കാണ് ഈ സൗകര്യം ഏർപ്പെടുത്തിയിരിക്കുന്നത്.

കുടുംബ ടൂറിസ്റ്റ് വീസയിൽ കുട്ടികൾക്ക് 18 വയസ്സിൽ കൂടാൻ പാടില്ല. വീസയുള്ളവർക്ക് 3 മാസം വരെ ദുബായിൽ കഴിയാം. മൊത്തം 6 മാസം വരെ നീട്ടുകയും ചെയ്യാം.വീസയ്ക്ക് ഒരാൾക്ക് 750 ദിർഹം (16700 രൂപ) ചെലവുണ്ടാകുമെന്നാണ് ഐസിപി വെബ്സൈറ്റിൽ പറയുന്നത്. ഇതിനു പുറമേ സെക്യൂരിറ്റി ഡിപ്പോസിറ്റായി 3,025 ദിർഹവും (68000 രൂപ) ആവശ്യമുണ്ട്.

അതുപോലെ രാജ്യത്ത് കുടുംബത്തോടൊപ്പം എത്താന്‍ ആഗ്രഹിക്കുന്നവര്‍ക്കായി കുടുംബ ഗ്രൂപ്പ് വിസ യുഎഇ അനുവദിച്ചിരുന്നു. വിനോദത്തിനും ചികിത്സയ്ക്കും കുടുംബസമേതം രാജ്യത്തെത്താന്‍ ആഗ്രഹിക്കുന്നവര്‍ക്കാണ് കുടുംബ ഗ്രൂപ്പ് വിസ അനുവദിക്കുക. അറുപത്, നൂറ്റിയെന്‍പത് ദിവസ കാലാവധിയുള്ള സിംഗിള്‍, മള്‍ട്ടിപ്പിള്‍ എന്‍ട്രി വിസകളാണ് ഇവര്‍ക്ക് അനുവദിക്കുക.ചികില്‍സക്കായെത്തുന്ന രോഗികള്‍ക്കും അവരെ അനുഗമിക്കുന്നവര്‍ക്കും പ്രസ്തുത വിസയില്‍ രാജ്യത്തെത്താനാകുമെന്നതാണ് പ്രത്യേകത.

യുഎഇ താമസ വിസയുള്ള പ്രവാസികള്‍ക്ക് മാതാപിതാക്കള്‍, ജീവിത പങ്കാളി, മക്കള്‍ എന്നിവരെ സ്വന്തം സ്‌പോണ്‍സര്‍ഷിപ്പില്‍ കൊണ്ടുവരാനാകുമെന്നും വിസാ നിയമങ്ങളില്‍ വ്യക്തമാക്കുന്നു. തൊണ്ണൂറുദിവസ കാലാവധിയുള്ള വിസയാണ് ഇവര്‍ക്ക് അനുവദിക്കുന്നത്. എഴുന്നൂറ്റമ്പത് ദിര്‍ഹമാണ് പ്രസ്്തുത വിസയുടെ ഫീസ് നിരക്ക്. എണ്ണായിരം ദിര്‍ഹമോ അതില്‍ കൂടുതലോ ശമ്പളമുള്ളവര്‍ക്കാണ് വക്തിഗത വിസ എടുക്കാനാവുക.

സ്വന്തം പേരില്‍ കെട്ടിടവാടകക്കരാര്‍ ഉണ്ടായിരിക്കണമെന്നതും പ്രസ്തുത വിസ ലഭ്യമാകുന്നതിനുള്ള നിബന്ധനകളില്‍ ഉള്‍പ്പെടുന്നു. ബാങ്ക് ഗ്യാരന്റിയായി നിക്ഷേപിക്കുന്ന ആയിരം ദിര്‍ഹം വിസയുടമ മടങ്ങിയാല്‍ തിരിച്ചു ലഭിക്കും. യുഎഇ വിസാനിയമങ്ങളില്‍ ഇളവുകളും പ്രഖ്യാപിച്ചിട്ടുണ്ട്. മുപ്പത്, അറുപത്, തൊണ്ണൂറ് ദിവസ കാലാവധിയുള്ള വ്യക്തിഗത, സന്ദര്‍ശക വിസ രാജ്യം വിടാതെ പുതുക്കാനാകുമെന്നും അറിയിച്ചിട്ടുണ്ട്.