പുതിയ സമയക്രമം..! റമദാൻ മാസത്തിൽ സ്വകാര്യ മേഖല ജീവനക്കാർക്കുള്ള ജോലിസമയത്തിൽ അടിമുടി മാറ്റം
റമദാനിൽ ഫെഡറല് സര്ക്കാര് ജീവനക്കാര്ക്ക് ബാധകമായ പ്രവൃത്തി സമയം പുറത്തുവന്ന പിന്നാലെ സ്വകാര്യ മേഖലയിലെ ജോലി സമയവും മാനവ വിഭവശേഷി മന്ത്രാലയം പ്രഖ്യാപിച്ചു. മുൻ മാസങ്ങളെ അപേക്ഷിച്ച് ദിവസത്തിൽ രണ്ട് മണിക്കൂർ കുറവായിരിക്കും റമദാനിലെ ജോലി സമയം.
യു.എ.ഇയിൽ സ്വകാര്യ മേഖലയിലെ ജോലി സമയം ദിവസം എട്ട് മണിക്കൂർ അല്ലെങ്കിൽ, ആഴ്ചയിൽ 48 മണിക്കൂർ എന്ന നിലയിലാണ്.റമദാനിൽ ഇത് ദിവസം ആറ് മണിക്കൂർ, ആഴ്ചയിൽ 36 മണിക്കൂർ എന്ന നിലയിലേക്ക് മാറും. ഇതിൽ കൂടുതൽ സമയം ജോലി ചെയ്താൽ ഓവർ ടൈം ആനുകൂല്യങ്ങൾ നൽകണം. സ്ഥാപനത്തിലെ ജോലിയുടെ സ്വഭാവം അനുസരിച്ച് വിദൂര ജോലി സംവിധാനം ഏർപ്പെടുത്താം.
ഫെഡറല് സര്ക്കാര് ജീവനക്കാര്ക്ക് യുഎഇ ക്യാബിനറ്റ് ഇത് സംബന്ധിച്ച് പുറപ്പെടുവിച്ചിട്ടുള്ള ഉത്തരവ് പ്രകാരം ഫെഡറല് അതോറിറ്റി ഫോര് ഗവണ്മെന്റ് ഹ്യൂമണ് റിസോഴ്സസാണ് പ്രവൃത്തി സമയം പുതുക്കി നിശ്ചയിച്ചത്. വെള്ളിയാഴ്ച പുറത്തിറങ്ങിയ സര്ക്കുലര് പ്രകാരം യുഎഇ മന്ത്രാലയങ്ങളിലും ഫെഡറല് സര്ക്കാര് ഓഫീസുകളിലും ജീവനക്കാര് രാവിലെ ഒന്പത് മണി മുതല് ഉച്ചയ്ക്ക് ശേഷം 2.30 വരെയാണ് തിങ്കള് മുതല് വ്യാഴം വരെയുള്ള ദിവസങ്ങളില് ജോലി ചെയ്യേണ്ടത്.
വെള്ളിയാഴ്ച ഒന്പത് മണി മുതല് 12 മണി വരെ ആയിരിക്കും പ്രവൃത്തി സമയം. റമദാനില് മന്ത്രാലയങ്ങള്ക്കും മറ്റ് സര്ക്കാര് ഓഫീസുകള്ക്കും അവരവരുടെ ആവശ്യങ്ങള്ക്ക് അനുസരിച്ച് ജോലി സമയത്തില് ഇളവോ അല്ലെങ്കില് വീടുകളില് ഇരുന്ന് ജോലി ചെയ്യാനുള്ള അനുമതിയോ കൊടുക്കാമെന്നും ഫെഡറല് അതോറിറ്റി ഫോര് ഗവണ്മെന്റ് ഹ്യൂമണ് റിസോഴ്സസ് അറിയിച്ചു.
യുഎഇ പ്രസിഡന്റ് ശൈഖ് മുഹമ്മദ് ബിന് സായിദ് അല് നഹ്യാന്, വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന് റാഷിദ് അല് മക്തൂം, സുപ്രീം കൗണ്സില് അംഗങ്ങള്, എമിറേറ്റുകളുടെ ഭരണാധികാരികള്, യുഎഇ പൗരന്മാര്, രാജ്യത്ത് താമസിക്കുന്നവര് എന്നിവര്ക്കെല്ലാം റമദാന് മാസം മുന്നിര്ത്തി ആശംസകള് നേരുന്നതായും ഫെഡറല് അതോറിറ്റി ഫോര് ഗവണ്മെന്റ് ഹ്യൂമണ് റിസോഴ്സസ് അറിയിച്ചു.
https://www.facebook.com/Malayalivartha
