കുവൈത്തിൽ ചികിത്സയിൽ കഴിയവേ പ്രവാസി മരിച്ചു. കോഴിക്കോട് കുന്ദമംഗലം സ്വദേശി മുഹമ്മദ് കുട്ടി പിലാശ്ശേരിയാണ് മരിച്ചത്.അസുഖബാധയെ തുടർന്ന് ഏറെ നാളായി ജഹ്റ ഹോസ്പിറ്റലിൽ ചികിത്സയിൽ കഴിയുകയായിരുന്നു. മൃതദേഹം നാട്ടിലേക്ക് കൊണ്ടുപോകാനുള്ള നടപടികൾ കുവൈത്ത് കെ.എം.സി.സിയുടെ നേതൃത്വത്തിൽ നടന്ന് വരികയാണ്.

അതേസമയം, യുഎഇയിൽ മലയാളി യുവാവിനെ മരിച്ച നിലയിൽ കണ്ടെത്തി. ആലപ്പുഴ തൃക്കുന്നപ്പുഴ പാനൂർ സ്വദേശിയായ യുവാവിനെ ദുബായിലാണ് മരിച്ച നിലയിൽ കണ്ടെത്തിയത്. പാനൂർ പാലപ്പിള്ളി കരിയിൽ മുസ്തഫയുടെ മകൻ മുനീറാണ് (22) മരിച്ചത്. കുളിമുറിയിൽ മരിച്ച നിലയിൽ കാണുകയായിരുന്നു.

ദുബായ് ജബൽ അലിയിലെ ഹൈപ്പർമാർക്കറ്റ് ജീവനക്കാരനാണ്. മൂന്ന് മാസം മുൻപാണ് ജോലിയിൽ പ്രവേശിച്ചത്. കബറടക്കം പിന്നീട്. മാതാവ്: ആബിദ. സഹോദരങ്ങൾ: ഹസൈനാർ, അൻസില, ഫാസില, ഫാത്തിമ.