സൗദിയിൽ കാലാവസ്ഥമാറ്റം സംഭവിച്ചുകൊണ്ടിരിക്കുകയാണ്. നേരത്തേ പുറത്തുവിട്ട മുന്നറിയിപ്പ് പ്രകാരം സൗദിയിലെ വിവിധ പ്രദേശങ്ങളിൽ മഴ ശക്തമായി തുടരുകയാണ്. ആർത്തലച്ച് പെയ്തത് മഴയിൽ വാഹനം വെള്ളക്കെട്ടിൽ അകപ്പെട്ട് ജിസാനിൽ രണ്ട് കുട്ടികൾ മരിച്ചു. വാദി വാസിഇലായിരുന്നു സംഭവം. നാല് പേരടങ്ങുന്ന കുടുംബം സഞ്ചരിച്ചിരുന്ന പിക്കപ്പ് വാഹനം മലവെള്ളപ്പാച്ചിലിൽ അകപ്പെട്ട് കാണാതാവുകയായിരുന്നു.

കുട്ടികളുടെ കൂടെ മാതാപിതാക്കളും ഉണ്ടായിരുന്നു. മാതാപിതാക്കളുടെ കൺമുന്നിൽവെച്ചാണ് കുട്ടികൾ ഒഴിക്കിൽപ്പെട്ട് കാണാതാകുന്നത്. കാണാതായ കുട്ടികളിൽ രണ്ട് പേരുടെ മൃതദേഹം കണ്ടെത്തി. ഒരു ആൺകുട്ടിയുടേയും ഒരു പെൺകുട്ടിയുടേയും മൃതദേഹം ആണ് കണ്ടെത്തിയിരിക്കുന്നത്.അപകടത്തിൽപ്പെട്ട കുട്ടികളുടെ പിതാവ് ആശുപത്രിയിൽ ചികിത്സയിൽ കഴിയുകയാണ്. ജിസാനിലെ സ്വബ്‍യയിലുള്ള ഗ്രാമത്തിലെ വീട്ടിലേക്ക് കുടംബം മടങ്ങുമ്പോൾ ആണ് അപകടം സംഭവിച്ചത്.

നേരത്തെയും ഈ പ്രദേശത്ത് ഇത്തരത്തിലുള്ള അപകടങ്ങൾ സംഭവിച്ചിട്ടുണ്ട്. സൗദി അറേബ്യയുടെ വിവിധ പ്രദേശങ്ങളിൽ രണ്ട് ദിസമായി വലിയ മഴയാണ് ലഭിക്കുന്നത്. ജിസാനിലെ അൽ ഹഷ്‍ർ മലനിരകളിൽ ശക്തമായ വെള്ളക്കെട്ടുകൾ ആണ് ഉണ്ടായത്. ജനങ്ങൾ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകിയിട്ടുണ്ട്.

റിയാദിൽ ഇന്നലെ ആലിപ്പഴ വർഷം ഉണ്ടായി. വൈകുന്നേരത്തോടെ റിയാദിൽ ആർത്തലച്ച് പെയ്ത മഴയിൽ നഗരത്തിന്റെ പലഭാഗത്തും വെള്ളമുയർന്നു. റിയാദ് അസീസിയ ഭാഗത്ത് ഇതായിരുന്നു സ്ഥിതി. സൗദിയിലെ കിഴക്കൻ പ്രവിശ്യയിലും മഴയെത്തുമെന്ന് മുന്നറിയിപ്പുണ്ട്. നഗരത്തിന്റെ പലഭാഗത്തും വെള്ളക്കെട്ട് രൂപപ്പെട്ടു.

മഴയ്ക്ക് പുറമെ പലയിടങ്ങളിലും കാറ്റും മിന്നലും ഉണ്ടായിരുന്നു. വ്യാഴാഴ്ച വരെ സൗദിയുടെ വിവിധ ഭാഗങ്ങളിൽ മഴ തുടരുമെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിപ്പ് നൽകിയിട്ടുണ്ട്. റിയാദ് ഉൾപ്പെടെ രാജ്യത്തിന്റെ വിവിധ ഭാഗങ്ങളിൽ മഴ പെയ്യുമെന്ന് നേരത്തെ കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പുണ്ടായിരുന്നു. കനത്ത മഴയ്‌ക്കൊപ്പം ഇടിമിന്നലുണ്ടാകുമെന്നതിനാൽ കിഴക്കൻ മേഖലയിൽ കേന്ദ്രം ജാഗ്രതാ നിർദേശം നൽകി.