നിയമ ലംഘനങ്ങളിൽ ഏർപ്പെടുന്നവരിൽ നിന്നും കടുത്ത പിഴയാണ് യുഎഇ ഈടാക്കുന്നത്. പ്രത്യേകിച്ച് ഗതാഗത നിയമങ്ങൾ ലംഘിച്ചാൽ. നിയമങ്ങൾ അറിഞ്ഞും അറിയാതെയും പ്രവാസികൾക്കും ഇത്തരത്തിൽ പിഴ അടയ്ക്കയ്ക്കേണ്ടതായി വന്നേക്കാം. ഉയർന്ന പിഴത്തുക സാമ്പത്തികമായും പ്രവാസികളെ ബാധിച്ചേക്കാം.

എന്നാൽ ഇപ്പോൾ മലയാളികൾ കൂടുതലായി താമസിക്കുന്ന യുഎഇയിലെ ഷാർജ എമിറേറ്റിൽ ഗതാഗത പിഴയിൽ ഇളവ് പ്രഖ്യാപിച്ചിരിക്കുകയാണ് അധികൃതർ. ഷാർജയിൽ ഗതാഗത പിഴയിൽ 35 ശതമാനം ഇളവാണ് പ്രഖ്യാപിച്ചരിക്കുന്നത്. ഷാർജ എക്സിക്യൂട്ടീവ് കൗൺസിൽ യോഗത്തിലാണ് തീരുമാനം. അബദ്ധത്തിൽ ഗതാഗത നിയമലംഘനം നടത്തിയ മലയാളികൾ അടക്കമുള്ള പ്രവാസികൾക്ക് ഏറെ ഗുണകരമാണ് ഷാർജ പ്രഖ്യാപിച്ച 35 ശതമാനം ഇളവ്.

അതിനാൽ മലയാളികൾ ഉൾപ്പെടെ ആയിരങ്ങൾക്ക് ഇതിന്റെ പ്രയോജനം ലഭിക്കുമെന്നാണ് കണക്കുകൂട്ടൽ. നിയമലംഘനം നടന്ന് 60 ദിവസത്തിനുള്ളിൽ ഫൈൻ അടക്കുന്നവർക്കാണ് 35 ശതമാനം ഇളവ് ഉണ്ടാവും. അതിനാൽ പിഴത്തുക ഉള്ളവർ എത്രയും പെട്ടെന്ന് തന്നെ അത് ക്ലിയർ ചെയ്യാൻ ശ്രദ്ധിക്കുക.

അതുപോലെ വാഹനം കണ്ടുകെട്ടിയതിന്‍റെ ഫീസിനും ഈ ഇളവ് ലഭിക്കും.60 ദിവസത്തിനും ഒരു വർഷത്തിനുമിടയിലാണ് ഫൈൻ തിരിച്ചടക്കുന്നതെങ്കിൽ 25 ശതമാനം ഇളവ് ലഭിക്കും. എന്നാൽ, വാഹനം കണ്ടുകെട്ടിയതിന്‍റെ ഫീസ് പൂർണമായും അടക്കേണ്ടി വരും. ഒരു വർഷം പിന്നിട്ടാണ് ഫൈൻ അടക്കുന്നതെങ്കിൽ ഇളവ് ഉണ്ടായിരിക്കില്ല എന്ന് പ്രത്യേകം ഓർക്കുക. അബൂദബിയിലും സമാനമായ ഇളവ് അടുത്തിടെ അനുവദിച്ചിരുന്നു.