യുഎഇയിൽ ചെറിയ പെരുന്നാളിന് മുന്നോടിയായി ജീവനക്കാർക്ക് ശമ്പളം ഇത്തവണ നേരത്തെ ലഭിക്കും. ഫെഡറല്‍ സര്‍ക്കാര്‍ ജീവനക്കാര്‍ക്കാണ് ശമ്പളം ഇത്തവണ നേരത്തെ കിട്ടുക. യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന്‍ റാഷിദ് അല്‍ മക്തൂമിന്റെതാണ് ഈ തീരുമാനം. ശമ്പളം നേരത്തെ നല്‍കാന്‍ സര്‍ക്കാര്‍ വകുപ്പുകള്‍ക്ക് അദ്ദേഹം നിര്‍ദേശം നല്‍കി കഴിഞ്ഞു. ഇതുപ്രകാരം ഈ മാസത്തെ ശമ്പളം ഏപ്രില്‍ 17 തിങ്കളാള്ച വിതരണം ചെയ്യും.

വരാനിരിക്കുന്ന ചെറിയ പെരുന്നാള്‍ ആഘോഷങ്ങള്‍ക്കു വേണ്ടി ജീവനക്കാര്‍ക്ക് തയ്യാറെടുക്കുന്നതിനും നീണ്ട അവധിക്കാലം ആഘോഷിക്കുന്നതിനും വേണ്ടിയാണ് സര്‍ക്കാര്‍ തലത്തില്‍ ഇത്തരമൊരു തീരുമാനമെടുത്തത്.യുഎഇയില്‍ ഈ വര്‍ഷം മാര്‍ച്ച് 23നാണ് റമദാന്‍ വ്രതാനുഷ്ഠാനം ആരംഭിച്ചത്. റമദാനില്‍ 29 നോമ്പുകള്‍ പൂര്‍ത്തിയാവുന്ന ദിവസം മാസപ്പിറവി ദൃശ്യമാവുകയാണെങ്കില്‍ അതിന്റെ പിറ്റേ ദിവസമോ അതല്ലെങ്കില്‍ റമദാനില്‍ 30 നോമ്പുകള്‍ പൂര്‍ത്തിയാക്കിയ ശേഷം തൊട്ടടുത്ത ദിവസമോ ആയിരിക്കും ചെറിയ പെരുന്നാള്‍ ആഘോഷിക്കുക.

ഏപ്രില്‍ 20 മുതല്‍ 23വരെയാണ് യുഎഇയില്‍ ഈദുല്‍ഫിത്തറിന്റെ അവധി. ഈദുല്‍ഫിത്തര്‍ ദിനത്തിന് അനുസരിച്ച് അവധിയിലും മാറ്റം വന്നേക്കാം. ജ്യോതിശാസ്‍ത്ര കണക്കുകൂട്ടലുകള്‍ പ്രകാരം ഈ വര്‍ഷം റമദാന്‍ 29ദിവസമായിരിക്കും.അതേസമയം, ദിവസങ്ങള്‍ക്ക് മുന്‍പ് വേതന സുരക്ഷാ പദ്ധതി വഴി ശമ്പളം നല്‍കാതിരുന്ന മൂവായിരത്തിലേറെ സ്ഥാപനങ്ങള്‍ക്കെതിരെ യു എ ഇ നിയമനടപടി സ്വീകരിച്ചിരുന്നു.

തൊഴിലാളികള്‍ക്ക് കൃത്യസമയത്ത് ശമ്പളം നല്‍കാത്ത സ്ഥാപനങ്ങള്‍ക്കെതിരെ നടപടി സ്വീകരിക്കും എന്ന് കഴിഞ്ഞ വര്‍ഷം തന്നെ യു എ ഇ വ്യക്തമാക്കിയിരുന്നു. ഡബ്ല്യുപിഎസ് മുഖേനെ വേതനം നല്‍കണമെന്നായിരുന്നു യു എ ഇ ഭരണകൂടം കമ്പനികളോട് പറഞ്ഞിരുന്നത്. അംഗീകൃത പണമിടപാട് സ്ഥാപനങ്ങൾ വഴി ശമ്പളം നൽകുന്ന സംവിധാനമാണിത്.

സ്ഥാപനങ്ങളിൽ നേരിട്ടെത്തിയ പരിശോധനയിലാണ് വീഴ്ച കണ്ടെത്തിയത്. കഴിഞ്ഞവർഷം സ്വകാര്യ മേഖലയിൽ നടത്തിയ പരിശോധനയിൽ വീഴ്ച കണ്ടെത്തിയ പന്ത്രണ്ടായിരത്തിലേറെ സ്ഥാപനങ്ങൾക്ക് പിഴ ചുമത്തിയിരുന്നു. ഹ്യൂമൻ റിസോഴ്‌സസ് ആൻഡ് എമിറേറ്റൈസേഷൻ മന്ത്രാലയം അതിന്റെ ഡാറ്റാബേസിൽ രജിസ്റ്റർ ചെയ്തിട്ടുള്ള സ്ഥാപനങ്ങളെ ഫീൽഡ് സന്ദർശനങ്ങളിലൂടെ നിരന്തരം നിരീക്ഷിക്കുന്നുണ്ട്.