സമൃദ്ധിയുടെ വിഷു ആഘോഷവുമായി പ്രവാസി മലയാളികളും. തിരക്കുകള്‍ക്കിടയിലും വിഷു ആഘോഷങ്ങൾക്ക് പ്രവാസി കുടുംബങ്ങൾ ഒട്ടും മാറ്റുകുറയ്ക്കുന്നില്ല. പലരും വിഷുപ്രമാണിച്ച് കുടുംബസമേതം നാട്ടിലേക്ക് തിരിച്ചിരുന്നു. എന്നാൽ നാട്ടിലേക്ക് പോകാത്ത പ്രവാസികളെല്ലാം തന്നെ ഗൾഫ് രാഷ്ട്രങ്ങളിൽ തന്നെ വിഷു ആഘോഷിക്കുകയാണ്. വിഷുവെന്നാല്‍ കണിയും കൈനീട്ടവും, വിഷുസദ്യയും തന്നെയാണ് പ്രധാനം.

മലയാളികള്‍ക്കുള്ള ‘വിഷുവിഭവങ്ങള്‍’ നേരത്തെ തന്നെ കടല്‍കടന്നെത്തിയിരുന്നു.കഴിഞ്ഞ ദിവസം മുതൽ മിക്ക ഹൈപ്പർ -സൂപ്പർ മാർക്കറ്റുകളിലും വിഷു സദ്യ വട്ടം ഒരുക്കാനുള്ള സാധനങ്ങൾ വാങ്ങിക്കൂട്ടാനുള്ള തിരക്കുകളായിരുന്നു മിക്കവരും. കണിക്കൊന്നയും വെള്ളരിയും വാഴയിലയും മുല്ലപ്പൂവും വിഷു സദ്യ വിഭവങ്ങൾക്കും ,വെജിറ്റബിൾ എന്നിവയ്ക്ക് വൻ വിലക്കിഴിവും ഒരുക്കിയാണ് ഈ വർഷം വിപണികൾ ഉപഭോക്താക്കളെ സ്വീകരിച്ചത്.

ഹൈപ്പർ മാർക്കറ്റുകളിലെല്ലാം വിവിധ തരം പായസങ്ങളും ,കണിക്കൊന്നയും ,വിഷുക്കണി കിറ്റും വിഷു സദ്യ വിഭവങ്ങളുമെല്ലാം ഒരുക്കിയിരുന്നു.ഈ വർഷം റമദാൻ നാളിലാണ് വിഷു എത്തുന്നത് കൊണ്ട് തന്നെ , റസ്റ്റോറൻറ്റുകളിൽ നിന്നും മാറി കുടുംബ വീടുകളിലും ബാച്ചിലർ റൂമുകളിൽ മാത്രമായി ഒതുങ്ങും വിഷു സദ്യാ തിരക്കുകൾ . വീടുകളെക്കാൾ ‘ബാച്ചിലേഴ്സ്’ മുറികളിലാണ് ഓണവും വിഷുവും പെരുന്നാളും കേമമാക്കുന്ന പതിവുള്ളത്. വെള്ളിയാഴ്ച രാത്രിമുതൽതന്നെ വിഷുക്കണിയുടെ ഒരുക്കങ്ങളും വിഷുസദ്യയൊരുക്കുന്ന തിരക്കും തുടങ്ങിരുന്നു.

ഇനി സദ്യ ഒരുക്കാനും പാടുപെടേണ്ട. വിഷു സദ്യ രുചിസമൃദ്ധമാക്കാൻ യുഎഇയിലെ മലയാളി റസ്റ്ററന്റുകളുണ്ട്. കുറഞ്ഞ വിലയ്ക്ക് കൂടുതൽ വിഭവങ്ങൾ തയാറാക്കി നൽകിയാണ് മലയാളികളുടെ സദ്യപ്രേമത്തെ ഇവർ പ്രോത്സാഹിപ്പിക്കുന്നത്. റമസാനായതിനാൽ നേരത്തെ ഓർഡർ സ്വീകരിച്ച് പാഴ്സൽ സദ്യ വീട്ടിൽ എത്തിക്കുകയാണ് ഭൂരിഭാഗം ഹോട്ടലുകളും.

നിയന്ത്രിത തോതിൽ റസ്റ്ററന്റിനകത്ത് ഭക്ഷണം വിളമ്പുന്നവരുമുണ്ട്. പക്ഷേ തുറസ്സായ സ്ഥലത്തിരുന്ന് കഴിക്കാൻ പാടില്ല. 15നാണ് റസ്റ്ററന്റുകളിൽ സദ്യ ഒരുക്കുന്നതെങ്കിലും അപൂർവം ചില റസ്റ്ററന്റുകളിൽ 16ന് കൂടി സദ്യ ഉണ്ടാകും.നേരത്തെ ബുക്ക് ചെയ്താൽ ലുലു ഹൈപ്പർമാർക്കറ്റിൽ 28.90 ദിർഹത്തിന് സദ്യ ലഭിക്കും.

മറ്റു ചിലർ വാറ്റും പാർസൽ വീട്ടിൽ എത്തിക്കുന്നതിനും അധിക തുക ഈടാക്കുന്നുണ്ട്. റമസാനായതിനാൽ വിഷു സദ്യ നോമ്പുതുറയോടൊപ്പം ആക്കുന്നവരും ഏറെ. നോമ്പുതുറയ്ക്കുള്ള പ്രത്യേക വിഭവത്തോടൊപ്പം വിഷു സദ്യയും ചേർത്ത് 55 ദിർഹത്തിന് സദ്യ വീട്ടിലെത്തും.