സൗദിയിൽ അടുത്തിടെയായി നിരവധി വാഹനാപകടങ്ങളാണ് ഉണ്ടായത്. ഇതിന്റെ നടുക്കത്തിലാണ് പ്രവാസികൾ കാരണം, മലയാളികൾ ഉൾപ്പെടെ നിരവധി പേരാണ് അടുത്തിടെ ഉണ്ടായ വാഹനാപകടത്തിൽ മരണപ്പെട്ടത്. എന്നാൽ വീണ്ടും അപകടങ്ങൾ ആവർത്തിക്കപ്പെടുകയാണ്. സൗദി തലസ്ഥാന നഗരമായ റിയാദിലാണ് ഇപ്പോൾ അപകടം ഉണ്ടായിരിക്കുന്നത്. പാലത്തിന്റെ മുകളിൽ നിന്ന് ബസ് താഴേക്ക് വീണുണ്ടായ അപകടത്തിൽ ഒരാൾ മരിച്ചു.

നിരവധി പേർക്ക് പരിക്കേറ്റു. കഴിഞ്ഞ വ്യാഴാഴ്ച്ചയാണ് സംഭവം. റിയാദിലെ ഒരു പാലത്തിന് മകളിൽ നിന്നാണ് ബസ് താഴേക്ക് മറിഞ്ഞതെന്ന് സിവിൽ ഡിഫൻസ് അറിയിച്ചു. മരിച്ചത് ഏത് രാജ്യക്കാരനാണെന്ന വിവരം ലഭ്യമായിട്ടില്ല. പരിക്കേറ്റവരെ ആശുപത്രിയിൽ പ്രവേശിപ്പിച്ചു. ട്രാഫിക് വകുപ്പിന്റെ സഹകരണത്തോടെ ആവശ്യമായ രക്ഷാപ്രവർത്തനങ്ങൾ നടത്തിയതായും സിവിൽ ഡിഫൻസ് പറഞ്ഞു.

ഒരാഴ്ച്ച മുമ്പാണ് സൗദിയിൽ ബസ് മറിഞ്ഞുണ്ടായ അപകടത്തിൽ ഒരാൾ മരിക്കുകയും 41 പേർക്ക് പരിക്കേൽക്കുകയും ചെയ്തത്. ഉംറ തീർത്ഥാടകർ സഞ്ചരിച്ച ബസാണ് അപകടത്തിൽപ്പെട്ടത്. ത്വാഇഫിലെ അൽസൈൽ റോഡിൽ 10 തീയതി തിങ്കളാഴ്ച രാവിലെ പതിനൊന്ന് മണിയോടെയാണ് അപകടമുണ്ടായത്. അപകടത്തിൽ മരിച്ചത് ഏഷ്യക്കാരിയാണെന്നാണ് വിവരം. പരിക്കേറ്റവരെ എല്ലാം ആശുപത്രികളിൽ പ്രവേശിപ്പിച്ചു.

എന്നാൽ ഇവരില്‍ ചിലരുടെ നില ഗുരുതരമാണെന്ന വിവരം മാത്രമാണ് പുറത്തുവന്നിരുന്നത്. പരിക്കേറ്റവരെ കുറിച്ചുള്ള വിവരങ്ങൾ അധികൃതർ പുറത്തുവിട്ടിട്ടില്ല. ഉംറ നിർവഹിച്ച് മക്കയിൽ നിന്ന് മടങ്ങുകയായിരുന്നു സംഘം. വിവിധ രാജ്യങ്ങളിൽ നിന്നുള്ള തീർഥാടകരായിരുന്നു ബസിലുണ്ടായിരുന്നത്. ബന്ധപ്പെട്ട വകുപ്പുകൾ ഉടൻ സ്ഥലത്തെത്തി രക്ഷാപ്രവർത്തനം നടത്തി പരുക്കേറ്റവരെ ആശുപത്രിയിലേക്ക് മാറ്റുകയായിരുന്നു. നിയന്ത്രണം നഷ്ടപ്പെട്ടതാണോ അതോ സ്ക്വിഡായതാണോ അപകട കാരണം എന്നത് വ്യക്തമല്ല.

അതേസമയം, കഴിഞ്ഞ ദിവസം സൗദിയുടെ തെക്കൻ പ്രവിശ്യയിലെ ഖമീസ് മുശൈത്ത്-ബിഷ റോഡിൽ ഖൈബര്‍ ജനൂബിലുണ്ടായ വാഹനാപകടത്തില്‍ മരിച്ച ആലപ്പുഴ ചേര്‍ത്തല സ്വദേശി തറയില്‍ അബ്ദുല്‍ സലാമിന്റെ മൃതദേഹം ഖബറടക്കി. 56 വയസായിരുന്നു.വെള്ളിയാഴ്ച ഖമീസ് മുശൈത്തിലെ തഹ്ലിയ ഡിസ്ട്രിക്ടിലെ സല്‍മാന്‍ മസ്ജിദില്‍ ജുമുഅ നമസ്ക്കാരത്തിന് ശേഷം ജനാസ നമസ്കാരം നടത്തി മഹാല റോഡിലുള്ള കറാമ മഖ്ബറയിൽ മൃതദേഹം ഖബറടക്കി.

ചൊവ്വാഴ്ച ജോലി ആവശ്യാര്‍ത്ഥം ഖമീസില്‍ നിന്ന് ബിഷയിലേക്കുള്ള യാത്രയില്‍ ഇദ്ദേഹത്തിന്റെ കാറിൽ ഖൈബര്‍ ജനൂബില്‍ വെച്ച്, സ്വദേശി പൗരൻ ഓടിച്ച എതിര്‍ ദിശയില്‍നിന്ന് വന്ന പിക്കപ്പ് ഇടിച്ചായിരുന്നു അപകടം. അബ്ദുൽ സലാം സംഭവസ്ഥലത്ത് തന്നെ മരിച്ചു. അറേബ്യന്‍ ട്രേഡിങ്ങ് സപ്ലൈസ് കമ്പനിയില്‍ ഗാലക്‌സി വിഭാഗം സെയില്‍സ്‍മാനായിരുന്നു. ചേർത്തല കുറ്റിയത്തോട് തറയിൽ കൊച്ചു മുഹമ്മദിന്റേയും - സഹറത്തിന്റേയും മകനാണ് അബ്ദുൽ സലാം. രണ്ട് മക്കളുണ്ട്.