ദുബായിൽ ഗ്രീൻ വിസ കൈവശമുള്ളവർക്ക് ഇനി കുടുംബത്തെ എളുപ്പത്തിൽ രാജ്യത്തേക്കെത്തിക്കാം. ഫസ്റ്റ് ഡിഗ്രി കാറ്റഗറിയിൽ പെട്ട കുടുംബാംഗങ്ങളെയാണ് ഗ്രീൻ വിസ കൈവശമുള്ള പ്രവാസികൾക്ക് ദുബായിലേക്കെത്തിക്കാൻ സാധിക്കുക. വിദഗ്ധ തൊഴിലാളികള്‍, ഫ്രീലാന്‍സര്‍മാര്‍, സ്വയം തൊഴിലുകളില്‍ ഏര്‍പ്പെടുന്നവര്‍, നിക്ഷേപകര്‍, ബിസിനസ് പങ്കാളികൾ എന്നിവർക്കെല്ലാം ഗ്രീൻ വിസകൾക്കായി അപേക്ഷിക്കാവുന്നതാണ്

സ്പോൺസറോ തൊഴിലുടമയോ ഇല്ലാതെ അഞ്ച് വർഷം വരെ ദുബായിൽ ജോലി ചെയ്യാനും താമസിക്കാനും ഗ്രീൻ വിസ കൈവശമുള്ളവർക്ക് സാധിക്കും.ഗ്രീൻ വിസ ലഭിക്കാൻ വിദഗ്ധ തൊഴിലാളികൾക്ക് കുറഞ്ഞത് ബിരുദം ആവശ്യമാണ്. കൂടാതെ മാസം കുറഞ്ഞത് 15,000 ദിർഹം ശമ്പളം വേണം. ഇതിന് പുറമേ യു.എ.ഇയിൽ ഏതെങ്കിലും സ്ഥാപനവുമായി തൊഴിൽ കരാറുണ്ടായിരിക്കണം.

അഞ്ച് വർഷം കാലവധിയുള്ള ഗ്രീൻ വിസയ്ക്ക് വേറെ സ്പോൺസറിന്റെ ആവശ്യമില്ല. വിസയ്ക്ക് യോഗ്യരായവർക്ക് ജനറല്‍ ഡയറക്ടറേറ്റ് ഓഫ് റെസിഡന്‍സി ആന്റ് ഫോറിനേഴ്സ് അഫയേഴ്സ് 60 ദിവസത്തെ എന്‍ട്രി പെര്‍മിറ്റ് നല്‍കും. ഈ സമയത്ത് യുഎഇയിലെത്തി വിസ ലഭിക്കാനുള്ള നടപടി ക്രമങ്ങൾ പൂർത്തിയാക്കാവുന്നതാണ്. ഗോൾഡൻ വിസയ്ക്ക് അപേക്ഷിക്കാനായി യോഗ്യത നേടിയവർക്കും ആറ് മാസത്തേയ്ക്ക് മള്‍ട്ടിപ്പിള്‍ എന്‍ട്രി പെര്‍മിറ്റ് അനുവദിച്ച് കിട്ടാം.

ജി.ഡി.ആര്‍.എഫ്.എ വെബ്‍സൈറ്റ് വഴി തന്നെ ഗ്രീൻ വിസയ്ക്കായി അപേക്ഷിക്കുന്നവർക്ക് പെർമിറ്റ് നേടാം. ഇമെയിൽ മുഖാന്തരമായിരിക്കും പെർമിറ്റ് ലഭിക്കുക. ആമെർ സെന്ററുകൾ വഴിയും അപേക്ഷിക്കാം. 60 ദിവസത്തെ പെർമിറ്റിനായി ഫീയിനത്തിൽ 333.75 ദിർഹം നൽകണം. നിലവിൽ യുഎഇയിൽ താസമാക്കിയവർ 650 ദിർഹം അധികമായി അടയ്ക്കേണ്ടി വരും.

തൊഴിൽമന്ത്രാലയത്തിൽ നിന്ന് സ്വയം തൊഴിൽ അനുമതി നേടണം. ഡിഗ്രിയോ ഡിപ്ലോമയോ വേണം. മുൻവർഷം കുറഞ്ഞത് 3,60,000 ദിർഹം വരുമാനമുണ്ടാക്കിയിരിക്കണം എന്നിവയാണ് ഗ്രീൻ വിസ ലഭിക്കാനുള്ള നിബന്ധനകൾ. കമ്പനികളിലെ നിക്ഷേപകർകർക്കും പാർടണർമാക്കും അഞ്ച് വർഷത്തെ ഗ്രീൻവിസ ലഭിക്കും.

യു.എ.ഇയിലെ എമിറേറ്റുകളായ അബു ദാബി, ഷാർജ, അജ്മാൻ, റാസൽ ഖൈമ, ഫുജൈറ, ഉം അൽ ക്വയ്ൻ എന്നിവിടങ്ങളിൽ താമസിക്കുന്ന ഗ്രീൻ വിസ കൈവശമുള്ള പ്രവാസികൾക്ക് കുടുംബത്തെ യു.എ.യിലെത്തിക്കാൻ ഫെഡറൽ അതോറിറ്റി ഫോർ ഐഡൻറ്റിറ്റി, സിറ്റിസൺ ഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ICP) വഴി അപേക്ഷിക്കാം.

1, ഐ.സി.പി സ്മാർട്ട് സർവീസ് വെബ്സൈറ്റ് വഴി അപേക്ഷിക്കാം : smartservices.icp.gov.ae

2, ഐ.സി.പി മൊബൈൽ ആപ്പായ ‘UAEICP’ വഴിയും
3, ഐ.സി.പിയുടെ ടൈപ്പിങ്‌ സെന്ററുകൾ വഴിയും അപേക്ഷിക്കാവുന്നതാണു
icp.gov.ae/en/typing-offices/ എന്ന വെബ്സൈറ്റ് വഴിയാണ് ടൈപ്പിങ് സെന്റർ പരിശോധിക്കാൻ സാധിക്കുക.