ചെറിയ പെരുന്നാളിന് മുന്നോടിയായി യുഎഇയിലെ വിവിധ എമിറേറ്റികളിൽ കനത്ത സുരക്ഷയാണ് ഏപ്പെടുത്തുന്നത്. ഇതിന് പിന്നാലെ
പെരുന്നാൾ അവധി ദിനങ്ങളുമായി ബന്ധപ്പെട്ട് പൊതുഗതാഗത സമയക്രമങ്ങളില്‍ മാറ്റം വരുത്തിയിട്ടുമുണ്ട്. റമസാൻ 29 മുതൽ ഷവ്വാൽ മൂന്ന് വരെയാണ് പുതിയ ക്രമീകരണമെന്ന് ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (ആർടിഎ) പ്രഖ്യാപിച്ചു .

കസ്റ്റമർ ഹാപ്പിനസ് സെന്ററുകൾ, പെയ്ഡ് പാർക്കിങ് സ്ഥലങ്ങൾ, പൊതു ബസ് സർവീസ്, ദുബായ് മെട്രോ, ട്രാം തുടങ്ങി വിവിധ മേഖലകളില്‍ പുതിയ സമയക്രമം വരും. വാഹന ടെസ്റ്റിങ്ങ് സെന്ററുകളിലെ കസ്റ്റമർ സർവീസ് കൗണ്ടറുകൾ റമസാൻ 29 മുതൽ ഷവ്വാൽ മൂന്നു വരെ പ്രവർത്തിക്കില്ല.

ഷവ്വാൽ നാലു മുതൽ സാധാരണ സമയത്ത് പ്രവർത്തിക്കുമെന്ന് ആർടിഎ അധികൃതർ അറിയിച്ചു. ഉം റമൂൽ, ദെയ്റ, അൽ ബർഷ, അൽ മനാര, അൽ കിയാഫ് തുടങ്ങിയ സ്ഥലങ്ങളിലെ സ്മാർട്ട് കസ്റ്റമർ ഹാപ്പിനസ് സെന്ററുകളുും ആർടിഎ ഹെഡ്ഓഫീസും സാധാരണ പോലെ മുഴുവൻ സമയവും പ്രവർത്തിക്കും.

അതേസമയം, പെരുന്നാൾ അവധി ദിനങ്ങളിൽ പൊതു സ്ഥലങ്ങളിലെ പാർക്കിങ് സൗജന്യമായിരിക്കുമെന്ന് ആർടിഎ അറിയിച്ചു. റമസാൻ 29 മുതൽ ഷവ്വാൽ മൂന്നു വരെയാണ് മൾട്ടി ലെവൽ പാർക്കിങ്ങ് ടെർമിനൽസ് ഒഴികെയുള്ള സ്ഥലങ്ങളിൽ സൗജന്യ പാർക്കിങ്. ഷവ്വാൽ നാലു മുതൽ പാർക്കിങ്ങ് ഫീസ് നൽകണം.