സൗദി അറേബ്യയിൽ കാലാവസ്ഥ വ്യതിയാനം തുടരുകയാണ്. രാജ്യത്ത് വ്യത്യസ്ത ഭാഗങ്ങളിൽ മഴയുണ്ടാകുമെന്നും മുന്നറിയിപ്പാണ് പുറത്തുവരുന്നത്. 27 വരെയാണ് ഇത്തരത്തിൽ മഴ മുന്നറിയിപ്പ് നൽകിയിട്ടുള്ളത്. കനത്ത ചൂടിലേക്ക് കടക്കുന്നതിന് മുന്നോടിയായാണ് മഴയെന്ന് കാലാവസ്ഥാ നിരീക്ഷകർ ചൂണ്ടിക്കാട്ടുന്നത്. മഴയ്ക്കൊപ്പം ഇടിമിന്നലും തുടരുമെന്ന് ദേശീയ കാലാവസ്ഥ നിരീക്ഷണ വിഭാഗം അറിയിച്ചു.

അസീർ, അൽബാഹ, ജിസാൻ, മക്ക, നജ്‌റാൻ, അൽ ഖാസിം, റിയാദ്, ഹായിൽ മേഖലകളിൽ മണിക്കൂറിൽ 55 കിലോമീറ്ററിൽ കൂടുതൽ വേഗതയുള്ള പൊടിക്കാറ്റിനും സാധ്യതയുണ്ട്. തബൂക്ക്, മദീന, അൽജൗഫ്, വടക്കൻ അതിർത്തികൾ എന്നിവടങ്ങളിലും കാറ്റിനും ആലിപ്പഴ വർഷത്തിനും സാധ്യതയുണ്ട്. പൊതുജനങ്ങൾ ശ്രദ്ധിക്കണമെന്നും ആവശ്യമായ മുൻ കരുതലുകൾ സ്വീകരിക്കണമെന്നും കാലാവസ്ഥാ വിഭാഗം അറിയിച്ചു.

അസീറിലെ കുന്നുകളിലും ആലിപ്പഴ വീഴ്ചയുണ്ടാകും. അവധി ദിനങ്ങളിൽ പ്രവാസി കുടുംബങ്ങളും യാത്രയിലുണ്ട്. മഴയ്ക്കനുസരിച്ച് യാത്രയിൽ മുൻകരുതൽ സ്വീകരിക്കണം. വാഹനത്തിൽ അവശ്യ വസ്തുക്കളും മെയിന്റനൻസ് വസ്തുക്കളും ഉറപ്പു വരുത്തുകയും വേണം.