വികസന കാര്യത്തിൽ യുഎഇ കുതിക്കുകയാണ്. അതിനാൽ തന്നെ പുതിയ സാങ്കേതികവിദ്യ രാജ്യത്ത് കൊണ്ടുവരുന്നതിലും അത് ഉപയോഗപ്പെടുത്തുന്നതിലും രാജ്യം പ്രത്യേകം ശ്രദ്ധ ചെലുത്താറുണ്ട്. പ്രത്യേകിച്ച് വിമാനത്താവളങ്ങളിൽ ന്യൂതന സാങ്കേതികവിദ്യകൾ കൂടുതലായി ഉപയോഗപ്പെടുത്തുന്നതായി കാണപ്പെടുന്നു. ഉദാഹരണത്തിന് ബയോ മെട്രിക് സംവിധാനം പോലുള്ളവ.

യാത്രക്കാർക്ക് ഏറെ സൗകര്യപ്രദമായ രീതിയിൽ നടപടിക്രമങ്ങൾ പൂർത്തിയാക്കാൻ ഇതുവഴി സാധിക്കും. എന്നാൽ ഇപ്പോൾ അതുക്കും മേലെ പ്രവാസികളെ അമ്പരിപ്പിച്ചിരിക്കുകയാണ് യുഎഇ. ലോകത്തിലെ ആദ്യത്തെ റോബട്ക്ക് ചെക്ക്- ഇൻ സൗകര്യം ദുബായ് രാജ്യാന്തര വിമാനത്താവളത്തിൽ ഏർപ്പെടുത്തി. ഇതുപ്രകാരം ഇനി നിങ്ങൾക്ക് ദുബായ് വിമാനത്താവളത്തിൽ എത്തിയാൽ ചെക്ക്–ഇൻ ചെയ്യാനായി സാറയെന്ന റോബട്ടിന്റെ സേവനം പ്രയോജനപ്പെടുത്താം.

നിലവിൽ എമിറേറ്റ്സ് എയർലൈൻ യാത്രക്കാർക്കാണ് ഈ സൗകര്യം ലഭ്യമാകുക. ദുബൈ ഇന്‍റർനാഷണൽ ഫിനാൻഷ്യൽ സെന്‍ററിലെ ഐ.സി.ഡി ബ്രൂക്ഫീൽഡിലാണ് ലോകത്തിലെ ആദ്യ ചെക്ക് ഇൻ റോബോട്ടിനെ എമിറേറ്റ്സ് സജ്ജീകരിച്ചിരിക്കുന്നത്. ഇനി സാറ എന്ന് പേരിട്ടിരിക്കുന്ന റോബോട്ടിന്‍റെ സഹായത്തോടെ യാത്രക്കാർക്ക് ഇവിടെയെത്തി മുൻകൂർ ചെക്ക് ഇൻ ചെയ്യാം. ചെക്ക് ഇൻ ചെയ്യാൻ റോബോട്ടിന്‍റെ സഹായം ഏർപെടുത്തുന്ന ആദ്യ എയർലൈനാണ് എമിറേറ്റ്സ്. യാത്രക്ക് നാല് മണിക്കൂർ മുതൽ 24 മണിക്കൂർ മുൻപ് വരെ ഇവിടെയെത്തി ചെക്ക് ഇൻ പൂർത്തിയാക്കാം.

രാവിലെ എട്ട് മുതൽ രാത്രി 10 വരെ ഈ സേവനം ലഭിക്കും. ഇവിടെ ചെക്ക് ഇൻ ചെയ്യുന്ന യാത്രക്കാർക്ക് വിമാനം പുറപ്പെടുന്നതിന് ഒരു മണിക്കൂർ മുൻപ് എയർപോർട്ടിൽ എത്തിയാൽ മതിയാകും. അറബിക്, ഇംഗ്ലിഷ് ഉൾപ്പെടെ 6 ഭാഷകളിൽ ആശയ വിനിമയം നടത്തുന്ന സാറ എളുപ്പത്തിലും വേഗത്തിലും നടപടിക്രമങ്ങൾ പൂർത്തിയാക്കി ബോഡിങ് പാസ് ഇ–മെയിൽ/സ്മാർട് ഫോൺ വഴി നൽകും. ചെക് ഇൻ സേവനം മുതൽ ഹോട്ടൽ ബുക്കിങ് വരെയുള്ള വിവിധ കാര്യങ്ങൾ റോബോട്ടിനെ ഉപയോഗിച്ച് പൂർത്തിയാക്കാനാവും. പോർട്ടബിൾ ചെക് ഇൻ റോബോട്ടുകൾ ഉപയോഗിക്കുന്ന ലോകത്തെ ആദ്യ വിമാനക്കമ്പനിയാണ് എമിറേറ്റ്സ്. തുടക്കത്തിൽ എമിറേറ്റ്സ് എയർലൈൻ യാത്രക്കാർക്കാണ് ഈ സൗകര്യമുള്ളതെങ്കിലും ഭാവിയിൽ 200ലധികം റോബട്ടുകളെ നിയമിച്ച് സേവനം വിപുലപ്പെടുത്താനാണ് അധികൃതരുടെ തീരുമാനം.നവീന സാങ്കേതിക വിദ്യ ഉപയോഗിച്ച് സേവനം മെച്ചപ്പെടുത്തുന്നതിന്റെ ഭാഗമായാണ് പരിഷ്ക്കാരമെന്ന് സിഇഒ ആദിൽ അൽ രിധ പറഞ്ഞു.

നടപടിക്രമങ്ങൾ

1. റോബട്ടിന്റെ സ്ക്രീൻപാഡിൽ പാസ്പോർട്ട് സ്കാൻ ചെയ്യുക

2. റോബട്ടിന്റെ സ്ക്രീനിൽ തെളിയുന്ന ചതുരത്തിന് മധ്യത്തിൽ മുഖം കാണുംവിധം നിൽക്കുക.

3. ടിക്കറ്റിലെയും പാസ്പോർട്ടിലെയും വിവരങ്ങൾ സാറ ഒത്തു നോക്കിയശേഷം ഇന്ന സമയത്ത് വിമാനം പുറപ്പെടും, ചെക്ക്–ഇൻ ചെയ്തോട്ടെ എന്ന് ചോദിക്കും.

4. യെസ് എന്ന നിർദേശം വാക്കാലോ സ്ക്രീനിൽ പ്രസ് ചെയ്തോ നൽകാം.

5. ചെക്ക്–ഇൻ വിജയകരമായി പൂർത്തിയായി. ബോഡിങ് പാസ് ഇ–മെയിലിലോ സ്മാർട് ഫോണിലോ ലഭിക്കുമെന്ന് അറിയിക്കും. ബോഡിങ് പാസും ബാഗേജ് ടാഗും പ്രിന്റ് ചെയ്യാനും റോബട്ടിൽ ഓപ്ഷനുണ്ട്. ബാഗേജ് കൗണ്ടറിൽ എത്തി ബാഗേജ് നൽകി യാത്ര തുടരാം.

ചെക്ക്–ഇൻ സൗകര്യത്തിന് പുറമേ യാത്രക്കാർക്ക് മാർഗനിർദേശം നൽകാനും സാറയ്ക്കാകും. കൂടുതൽ സേവനം ഉൾപ്പെടുത്താനും സംവിധാനമുണ്ട്.