ഈ വർഷത്തെ രണ്ടാമത്തെ കുഞ്ഞതിഥിയെ വളരെ സന്തോഷത്തോടെ വരവേറ്റിരിക്കുകയാണ് ദുബായ് രാജകുടുംബം. ദുബായ് ഭരണാധികാരി ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ മകൾ ഷെയ്ഖ ലത്തീഫ ബിന്‍ത് റാഷിദ് അൽ മക്തൂമിന് കുഞ്ഞ് പിറന്നു. സമൂഹമാധ്യമങ്ങളിലൂടെയാണ് കുഞ്ഞു ജനിച്ച സന്തോഷം ഷെയ്ഖ ലത്തീഫ പങ്കുവെച്ചത്. ഒരു പെൺകുട്ടിയാൽ തങ്ങൾ‌ അനുഗ്രഹിക്കപ്പെട്ടിരിക്കുന്നു എന്ന വാചകത്തോടെയായിരുന്നു മകളുടെ പേരെഴുതിയ ചിത്രം പങ്കുവെച്ചത്.

ഹിന്ദ് ബിൻത് ഫൈസൽ അൽക്വാസിമി എന്നാണു കുഞ്ഞിന്റെ പേര്. നിരവധി പേരാണു ആശംസകൾ നേർന്നിരിക്കുന്നത്. ദുബായ് കൾചർ ആൻഡ് ആർട്സ് അതോറിറ്റി ചെയർപേഴ്സണും ദുബായ് കൗൺസിൽ മെമ്പറുമാണ് ഷെയ്ഖ ലത്തീഫ. 2016 ലാണു ഷെയ്ഖ ലത്തീഫ‌ വിവാഹിതയായത്. ഷെയ്ഖ് ഫൈസൽ ബിൻ സൗദ് ബിൻ ഖാലിദ് അൽ ക്വാസിമാണ് ഭർത്താവ്. ഹിന്ദ് ബിൻത് ഫൈസൽ അൽക്വാസിമിയെ കൂടാതെ രണ്ടുമക്കൾ കൂടിയുണ്ട് ഇരുവർക്കും.

അതുപോലെ ഈ വർഷം മറ്റൊരു കുഞ്ഞതിഥിയെ കൂടെ രാജകുടുംബം വരവേറ്റിരുന്നു. മൂന്നാമതും അച്ഛനായ സന്തോഷം ദുബായ് കിരീടാവകാശിയും എക്സിക്യൂട്ടീവ് കൗൺസിൽ ചെയർമാനുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാശിദ് ആൽ മക്തൂം ഇൻസ്റ്റഗ്രാം സ്റ്റോറിയിലൂടെ ലോകത്തെ അറിയിക്കുകയായിരുന്നു. ആൺകുട്ടിയാണ് ജനിച്ചിരിക്കുന്നത്. ഇറ്റ്സ് എ ബോയി, മുഹമ്മദ് ബിൻ ഹംദാൻ ബിൻ മുഹമ്മദ് അൽമക്തൂം എന്ന് കുഞ്ഞിന് പേരിട്ടതായും പോസ്റ്റിൽ വ്യക്തമാക്കിയിരുന്നു.

നേരത്തേ ഇരട്ടകുട്ടികളുടെ പിതാവാണ് ശൈഖ് ഹംദാൻ. 2021 മെയ് 21 നാണ് ശൈഖ് ഹംദാനും ഭാര്യ ശൈഖ ശൈഖ് ബിൻത് സഈദ് ബിൻഥാനി അൽ മക്തൂമിനും ഇരട്ടകുട്ടികൾ പിറന്നത്. അന്നും തന്റെ ഇൻസ്റ്റഗ്രാം പോസ്റ്റിലൂടെയാണ് അദ്ദേഹം ഇക്കാര്യം അറിയിച്ചത്. ഇവരിൽ ആൺകുഞ്ഞിന് റാശിദെന്നും പെൺകുഞ്ഞിന് ശൈഖ എന്നുമാണ് പേരിട്ടത്.

മുത്തച്ഛൻ റാശിദിന്റെ പേരാണ് ആദ്യത്തെ മകന് നൽകിയതെങ്കിൽ പിതാവിന്റെ പേര് കൂടിയായ മുഹമ്മദ് എന്നാണ് പുതിയ കുഞ്ഞിന് നൽകിയത്. ഇൻസ്റ്റഗ്രാമിൽ മാത്രം 15.4 മില്യൺ ഫോളോവേഴ്‌സുള്ള കിരീടാവകാശി കുട്ടികളുമൊത്തുള്ളതും യാത്ര പോകുന്ന ചിത്രങ്ങളും പങ്കുവെക്കുകയും വെെറലാകുകയും ചെയ്തിട്ടുണ്ട്. ഇരട്ടക്കുട്ടികളുടെ ഒന്നാം പിറന്നാൾ ദിനത്തിലും ഷെയ്ഖ് ഹംദാൻ ചിത്രങ്ങൾ പങ്കുവച്ചിരുന്നു.