യുഎഇയിൽ താപനില ഉയരുന്നതിനിടെ കഴിഞ്ഞ ദിവസം ആശ്വാസമായി ഇടിയോട് കൂടിയ മഴയാണ് രാജ്യത്തിന്റെ വിവിധ എമിറേറ്റുകളിൽ അനുഭവപ്പെടുന്നത്. അബുദാബി, ദുബായ്, റാസൽഖൈമ, ഫുജൈറ, ഷാർജ എന്നിവിടങ്ങളിൽ ശക്തമായതോ മിതമായതോ ആയ മഴയാണ് കഴിഞ്ഞ ദിവസം രാവിലെ പെയ്തത്. ഇതിന് പിന്നാലെ പൊതു ജനങ്ങൾക്ക് ജാഗ്രത നിർദ്ദേശവുമായി പോലീസും രംഗത്തെത്തിയിട്ടുണ്ട്.

കാലാവസ്ഥാ സംബന്ധമായ നിയമലംഘനത്തിൽ ഏർപ്പെടുന്നവർക്ക് പിഴ ചുമത്തുന്നതുമാണ് മുന്നറിയിപ്പ്. അതിനാൽ മഴ പെയ്യുന്ന സാഹചര്യത്തിൽ പൗരന്മാരും പ്രവാസികളും പുറത്തിറങ്ങുമ്പോൾ മുൻകരുതൽ സ്വീകരിക്കണമെന്ന് അധികൃതർ നിർദേശിച്ചു. സുരക്ഷയെ മുൻനിർത്തി വെള്ളപ്പൊക്കമുള്ള പ്രദേശങ്ങളും താഴ്‌വരകളും ആരും സന്ദർശിക്കരുത്.

അതുപോലെ വാഹനമോടിക്കുന്നവർ ഈ സമയങ്ങളിൽ പ്രത്യേകം ജാഗ്രത പുലർത്തേണ്ടതുണ്ട്. മഴ പെയ്യുമ്പോൾ സാവധാനം ഡ്രൈവ് ചെയ്യാൻ ശ്രദ്ധിക്കുക, അതുവഴി നിങ്ങൾക്ക് എല്ലായ്പ്പോഴും കാർ നിയന്ത്രിക്കാനും മറ്റ് വാഹനങ്ങൾക്ക് പിന്നിൽ പെട്ടെന്ന് നിർത്തേണ്ടിവരുമെന്ന ആശങ്ക ഒഴിവാക്കാനും കഴിയും. ഇലക്‌ട്രോണിക് ഇൻഫർമേഷൻ ബോർഡുകളിൽ പ്രദർശിപ്പിച്ചിരിക്കുന്ന മാറിക്കൊണ്ടിരിക്കുന്ന വേഗപരിധി പാലിക്കണമെന്ന് അബുദാബി പൊലീസ് അറിയിച്ചു.

വാഹനമോടിക്കുന്നവർ മാർഗനിർദ്ദേശങ്ങൾ പാലിക്കാൻ ദുബായിലെ റോഡ് ആൻഡ് ട്രാൻസ്‌പോർട്ട് അതോറിറ്റി (ആർ‌ടി‌എ) നിര്‍ദേശിച്ചു. വേഗം കുറയ്ക്കാനും ശ്രദ്ധാപൂർവം ഡ്രൈവ് ചെയ്യാനും ഹെഡ്‌ലൈറ്റുകൾ ഉപയോഗിക്കാനും പൊതു സുരക്ഷ ഉറപ്പാക്കാനും മാർഗനിർദേശം നൽകി. പ്രതികൂല കാലാവസ്ഥയിൽ സുരക്ഷിതമായ ഡ്രൈവിങ് പരിശീലിക്കേണ്ടത് പ്രധാനമാണ്.