സില്‍വർ ജൂബിലി ആഘോഷങ്ങളുടെ ഭാഗമായി ജീവനക്കാർക്കും കുടുംബാംഗങ്ങള്‍ക്കും 30 കോടി രൂപയുടെ സമ്മാനം പ്രഖ്യാപിച്ച് ഏരീസ് ഗ്രൂപ്പ് ഓഫ് കമ്പനീസ്. ആഘോഷങ്ങളുടെ ഭാഗമായി തെരഞ്ഞെടുക്കപ്പെട്ട 25 ജീവനക്കാരുടെ മാതാപിതാക്കള്‍ക്ക് സൗജന്യ ദുബായ് യാത്ര ഒരുക്കിയിട്ടുണ്ട്. ജീവനക്കാർക്കും കുടുംബങ്ങള്‍ക്കും മാതാപിതാക്കള്‍ക്കും മറ്റ് കുടുംബാംഗങ്ങള്‍ക്കുമായാണ് 30 കോടി രൂപയുടെ സമ്മാനങ്ങള്‍ പ്രഖ്യാപിച്ചിട്ടുളളത്. ഇതിന് പുറമെ 25 ജീവനക്കാരുടെ മാതാപിതാക്കളെ ആഘോഷങ്ങളിൽ പങ്കെടുക്കാൻ യുഎഇയിൽ എത്തിക്കുകയും ചെയ്‍തു.

ഷാർജ ആസ്ഥാനമായുള്ള ഏരീസ് ഗ്രൂപ്പാണ് കമ്പനിയുടെ സിൽവർ ജൂബിലി ജീവനക്കാരുടെ കൂടി ആഘോഷമാക്കി മാറ്റിയത്. തൊഴിലാളികളാണ് കമ്പനിയുടെ നിർണായകശക്തി.അവരോടുളള നന്ദിസൂചകമായാണ് സമ്മാനങ്ങള്‍ പ്രഖ്യാപിച്ചതെന്ന് ഏരീസ് ഗ്രൂപ്പ് സ്ഥാപകചെയർമാന്‍ സോഹന്‍ റോയ് പറഞ്ഞു. ഇത്തരം പ്രവൃത്തികളിലൂടെ ജീവനക്കാരും കുടുംബവും തമ്മിലുളള ബന്ധം ശക്തിപ്പെടും. ഏരീസ് ഗ്രൂപ്പിന്‍റെ ഭാഗമായതില്‍ അവർ അഭിമാനിക്കുമെന്നും അദ്ദേഹം പറഞ്ഞു.

കമ്പനിയിൽ മൂന്ന് വർഷവം അതിൽ കൂടുതലും പൂർത്തിയാക്കിയിട്ടുള്ള ജീവനക്കാർക്ക് അവരുടെ അധ്വാനത്തിന്റെ അംഗീകാരമാണിതെന്ന് അധികൃതർ പറയുന്നു. മലയാളിയായ സോഹൻ റോയിയുടെ ഉടമസ്ഥതയിലുള്ള കമ്പനിയാണ് ഏരീസ് ഗ്രൂപ്പ്. സ്ഥാപനത്തിന്റെ ഭാഗമായ ജീവനക്കാരുടെ മാതാപിതാക്കൾക്ക് പേരന്റൽ അലവൻസ് പ്രഖ്യാപിക്കുക വഴി നേരത്തെ തന്നെ ഏരീസ് ഗ്രൂപ്പ് വാർത്തകളിൽ ഇടംപിടിച്ചിരുന്നു.

ജീവനക്കാരുടെ നേട്ടങ്ങളിൽ അവരുടെ കുടുംബങ്ങൾക്കുള്ള പങ്ക് തിരിച്ചറിഞ്ഞുകൊണ്ടാണ് ഇത്തരമൊരു അലവൻസ് മാതാപിതാക്കൾക്ക് നൽകുന്നതെന്ന് കമ്പനി പറയുന്നു. ഒപ്പം മക്കളെ വളർത്തി വലുതാക്കി വിദ്യാഭ്യാസം നൽകി ജോലി നേടാൻ അവരെ പ്രാപ്‍തരാക്കിയതിനുള്ള കൃതജ്ഞത കൂടിയാണിത്.

കമ്പനി ഇരുപത്തി അഞ്ചാം വാർഷികം ആഘോഷിക്കുമ്പോൾ ജീവനക്കാരുടെ മാതാപിതാക്കളോട് നന്ദി അറിയിക്കുകയാണ് ഏരീസ് ഗ്രൂപ്പെന്ന് സോഹൻ റോയ് പറഞ്ഞു. 1998ൽ സ്ഥാപിതമായതു മുതൽ ലാഭത്തിന്റെ അൻപത് ശതമാനം ജീവനക്കാരുമായി പങ്കിടുന്ന നയമാണ് ഏരീസ് ഗ്രൂപ്പ് സ്വീകരിക്കുന്നത്.

ലോകത്തിലെ ഏറ്റവും വലിയ ഷിപ്പ് ഡിസൈന്‍ & ഇന്‍സ്‌പെക്ഷന്‍ സ്ഥാപനങ്ങളില്‍ ഒന്നായ ഏരീസ് ഗ്രൂപ്പില്‍ ആഗോളതലത്തില്‍ 25 രാജ്യങ്ങളില്‍ 2200 ന് മുകളില്‍ ജീവനക്കാരാണുള്ളത്. മറൈന്‍, ഓയില്‍ & ഗ്യാസ് , ഓഫ്‌ഷോര്‍ , വിനോദം ഉള്‍പ്പെടെയുള്ള വിവിധ മേഖലകളില്‍ സജീവ സാന്നിധ്യമായ ഏരീസ് ഗ്രൂപ്പ് ക്ലയിന്റുകള്‍ക്ക് മികച്ച സേവനം നല്‍കുന്നതിലും അഭിമാനകരമായ നേട്ടമാണ് കൈവരിച്ചിരിക്കുന്നത്.

നിരവധി ജീവകാരുണ്യ പദ്ധതികളാണ് സ്ഥാപനത്തിന്റെ നേതൃത്വത്തില്‍ നടന്നുവരുന്നത്. ജീവനക്കാരുടെ മാതാപിതാക്കള്‍ക്ക് പെന്‍ഷന്‍, പങ്കാളികള്‍ക്ക് ശമ്പളം, ഭവന രഹിതര്‍ക്ക് വീട്, ജീവനക്കാരുടെ കുട്ടികള്‍ക്ക് വിദ്യാഭ്യാസ അലവന്‍സും മറ്റു സ്‌കോളര്‍ഷിപ്പുകളും, ജീവനക്കാരുടെ മാനസിക ഉല്ലാസത്തിനായുള്ള പരിപാടികള്‍ തുടങ്ങിയവ അവയില്‍ ചിലതാനു ...പ്രകൃതിക്ഷോഭത്തിലൂടെ ഉപജീവനമാര്‍ഗം നഷ്ടപ്പെട്ടവരുടെ പുനരധിവാസം, പിന്നാക്ക മേഖലകളില്‍ സ്‌കൂളുകള്‍ , സാമ്പത്തികമായി പിന്നാക്കം നില്‍ക്കുന്ന കുടുംബങ്ങളിലെ വിദ്യാര്‍ത്ഥികള്‍ക്ക് സ്‌കോളര്‍ഷിപ്പുകള്‍ തുടങ്ങി നിരവധി സിഎസ്ആര്‍ പ്രവര്‍ത്തനങ്ങളും സ്ഥാപനത്തിന്റെ നേതൃത്വത്തില്‍ നടന്നുവരുന്നു.