നാട്ടിലേക്ക് പോകാൻ വല്ല പ്ലാനുമുണ്ടോ, അതോ സ്വന്തം ആവശ്യങ്ങൾക്കായി വല്ല ഷോപ്പിങിനും പ്ലാനുണ്ടോ..ഉണ്ടെങ്കിൽ വേഗം ദുബൈക്ക് വിട്ടോ. നല്ല ചുളുവിലയ്ക്ക് നിങ്ങൾക്ക് സാധനങ്ങൾ വാങ്ങി മടങ്ങിവരാം. എമിറേറ്റിലെ ഏറ്റവും വലിയ ഷോപ്പിങ് വീക്ക് എൻഡ് പ്രഖ്യാപിച്ചിരിക്കുകയാണ് ദുബായ്. ഇതുവഴി 90 ശതമാനം വരെ വിലക്കിഴിവ് ഉപഭോക്താക്കൾക്ക് സ്വന്തമാക്കാം. 26 മുതൽ 28വരെയാണ് 3 ഡേ സൂപ്പർ സെയിൽ.

പ്രധാന ബ്രാൻഡുകളുടെ ഔട്‌ലെറ്റുകളിലും ഷോപ്പിങ് മോളുകളിലും വിലക്കിഴിവ് ലഭിക്കുമെന്നു ദുബായ് ഫെസ്റ്റിവൽസ് ആൻഡ് റിട്ടെയിൽ എസ്റ്റാബ്ലീഷ്മെന്റ് അറിയിച്ചു. ദുബൈ ഫെസ്റ്റിവല്‍സ് ആന്റ് റീട്ടെയില്‍ എസ്റ്റാബ്ലിഷ്‍മെന്റ് സംഘടിപ്പിക്കുന്ന ഈ വ്യാപാര മേളയില്‍ ഫാഷന്‍, ബ്യൂട്ടി, ഫര്‍ണിച്ചര്‍, ലൈഫ്‍സ്റ്റൈല്‍, ഇലക്ട്രോണിക്സ് എന്നിങ്ങനെ വിവിധ വിഭാഗങ്ങളിലുള്ള ഉത്പന്നങ്ങള്‍ കുറഞ്ഞ നിരക്കില്‍ സ്വന്തമാക്കാന്‍ സാധിക്കുമെന്ന് സംഘാടകര്‍ അറിയിച്ചു.

കിക്കോ മിലാനോ, സെഫോറ, ബാത്ത് ആൻഡ് ബോഡി വർക്ക്, 1915, റിവോലി, ഹോംസ് ആർ യൂസ്, ഐക്കിയ, ജഷൻമാൾ, മാർക്ക് ആൻഡ് സ്പെൻസേഴ്സ്, ലക്കോസ്റ്റെ, ബെറ്റർ ലൈഫ്, ഷറഫ് ഡിജി, അൽദോ, അൽ ജാബർ ഒപ്റ്റിക്കൽസ് തുടങ്ങിയ ബ്രാൻഡുകളിലാണ് ആനുകൂല്യം.

മോൾ ഓഫ് എമിറേറ്റ്സ്, മിർദിഫ്, ദെയ്റ,ഷിൻഡഗ സിറ്റി സെന്ററുകൾ, ദുബായ് ഫെസ്റ്റിവൽ സിറ്റി മോൾ, ദുബായ് ഫെസ്റ്റിവൽ പ്ലാസ, നക്കീൽ മോൾ, ഇബൻ ബത്തൂത്ത, സർക്കിൾ മോൾ, മർകാത്തോ, ടൗൺ സെന്റർ, ദ് ബീച്ച്, ബ്ലൂ വാട്ടേഴ്സ്, സിറ്റി വോക്ക്, ദി ഔട്‌ലെറ്റ് വില്ലേജ് തുടങ്ങിയ സ്ഥലങ്ങളിലാണ് ഷോപ്പിങ് ഉൽസവം നടക്കുന്നത്. 300 ദിർഹത്തിൽ അധികം ചെലവഴിക്കുന്ന ഷെയർ ആപ് ഉപഭോക്താക്കൾക്ക് 10 ലക്ഷം പോയിന്റ് നേടാനുള്ള അവസരവും ഉണ്ട്. അപ്പോൾ ഈ അവസരം ആരും പാഴാക്കേണ്ട.