യുഎഇ ഭരണാധികാരികളുടെ അനൗദ്യോഗിക സന്ദർശനങ്ങൾ പ്രവാസികൾ ഉൾപ്പെടെ ഉള്ളവർ വളരെ കൗതുകത്തോടെ ആണ് നോക്കി കാണുന്നത്. ഓർക്കാപ്പുറത്ത് കൺമുന്നിൽ ഇവരെ കണ്ടാൽ ആരാണ് അല്ലേ ആശ്ചര്യപ്പെടാത്തത്. എന്നാൽ ഇത്തവണ ദുബായ് ഭരണാധികാരിയും യുഎഇ വൈസ് പ്രസിഡൻ്റും പ്രധാനമന്ത്രിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം എല്ലാവരെയും ഒന്നുകൂടെ ഞെട്ടിച്ചിരിക്കുകയാണ്. സുരക്ഷാ പിരിമുറുക്കങ്ങളൊന്നുമില്ലാതെ റസ്റ്ററന്റിലെത്തിയ അദ്ദേഹത്തെ കണ്ട് അവിടെയുള്ളവർ അപ്പാടെ ഞെട്ടി.

തിരിച്ചറിഞ്ഞവർ മൊബൈൽ ഫോണിലെ ക്യാമറകൾ ഓണാക്കി തങ്ങളുടെ പ്രിയ ഭരണാധികാരിയുടെ ദ്യശ്യങ്ങൾ പകർത്താൻ തുടങ്ങി. അറ്റ്‌ലാന്റിസ് ദ് പാമിലെ നോബു റസ്റ്ററന്റിൽ ആണ് ദുബായ് ഭരണാധികാരി അപ്രതീക്ഷിത സന്ദർശനം നടത്തിയത്. ആളും ആരവവും ഇല്ലാതെ ജാപ്പനീസ് റസ്റ്ററന്റായ നോബുവിൽ അദ്ദേഹം ഇരുന്നു. ഇതിനു മുൻപും നോബുവിൽ ഷെയ്ഖ് മുഹമ്മദിനെ കണ്ടവരുണ്ട്.

ഷെയ്ഖ് മുഹമ്മദിന്റെ വരവ് നോബു അവരുടെ സമൂഹ മാധ്യമ പേജിൽ ആഘോഷമാക്കി. ആയിരക്കണക്കിന് ആളുകളാണ് വിഡിയോയും ചിത്രങ്ങളും കണ്ടത്. അറ്റ്ലാന്റിസിലെ 22ാം നിലയിലാണ് നോബു. വിനോദ സഞ്ചാരികളുടെയും സെലിബ്രിറ്റികളുടെയും ഇഷ്ട ജാപ്പനീസ് റസ്റ്ററന്റുകളിൽ ഒന്നാണിത്.

നേരത്തെ അദ്ദേഹം ദുബായിലെ ഒരു ലോക്കൽ ഹൈപ്പർ മാർക്കറ്റിൽ എത്തിയ വീഡിയോ സമൂഹമാധ്യമങ്ങളിൽ വൈറലായി മാറിയിരിരുന്നു. ഹൈപ്പർമാർക്കറ്റിൻ്റെ അൽ ഖൗനീജ് ഔട്ട്ലെറ്റിൽ ആളുകൾക്കിടയിലൂടെ സാധാരണ ഒരു പൗരനെ പോലെ സാധനങ്ങൾ നോക്കി നടക്കുന്ന ദുബായ് ഭരണാധികാരിയെ കണ്ടവർക്ക് അത്ഭുതമായിരുന്നു.

പ്രിയപ്പെട്ട നേതാവിനെ അടുത്തുകാണാൻ കഴിഞ്ഞ ആവേശത്തിലായിരുന്നു ഷോപ്പിലെത്തിയവർ. അദ്ദേഹത്തിൻ്റെ ചിത്രങ്ങളും വീഡിയോയും സമൂഹമാധ്യമങ്ങളിൽ വൈകാതെ വൈറലാവുകയും ചെയ്തു. അദ്ദേഹത്തെ സ്വാഗതം ചെയ്യാൻ കഴിഞ്ഞത് ബഹുമതിയായി കാണുന്നുവെന്നായിരുന്നു ദുബായ് ഭരണാധികാരിയുടെ സന്ദർശനത്തെക്കുറിച്ച് ജിഎംജി കമ്പനിയുടെ സിഇഒ മുഹമ്മദ് എ ബേക്കർ ട്വീറ്റ് ചെയ്തത്.