നിയമലംഘകരെ വെറുതെ വിടാൻ സൗദി ഭരണകൂടം ഉദ്ദേശിച്ചിട്ടില്ല. ഇപ്പോൾ ഉള്ളത് കൂടാതെ ഏഴ് നിയമലംഘനങ്ങൾ കൂടി ക്യാമറ കണ്ണുകളിലൂടെ പകർത്താൻ ഒരുങ്ങുകയാണ് അധികൃതർ. സൗദി ട്രാഫിക് വിഭാഗം മേധാവിയാണ് നിയമലംഘനങ്ങൾ ഓട്ടോമാറ്റിക് ക്യാമറകൾ പിടികൂടുമെന്നത് അറിയിച്ചത്. ഗതാഗത മര്യാദകൾ കർശനമാക്കുകയാണ് ലക്ഷ്യം. ജൂൺ നാല് മുതൽ ഇതിനായി ഓട്ടോമാറ്റിക് ക്യാമറകളും പൊലീസ് വാഹനങ്ങളിലെ ക്യാമറകളും ഇതിനായി ഉപയോഗിക്കും.

റോഡിലെ മഞ്ഞവരകൾ ക്രോസ് ചെയ്ത് വാഹനമോടിക്കുന്നതും പാർക്കിങ് നിയമ ലംഘനങ്ങളും ഇനി ക്യാമറകൾ പിടിക്കും. ഫൂട്‍പാത്തിലൂടെ വാഹനമോടിക്കൽ, വ്യക്തതയില്ലാത്ത നമ്പർപ്ലേറ്റ് ഉപയോഗിച്ച് വാഹനമോടിക്കൽ എന്നിവയ്ക്ക് പിഴയും ഈടാക്കും.

റോഡിലെ യെല്ലോ ലൈനിന് പുറത്തു കൂടി വാഹനമോടിക്കൽ, പാർക്കിങിന് നിശ്ചയിച്ച സ്ഥലത്തല്ലാതെ വാഹനം പാർക്ക് ചെയ്യൽ, ഭാരപരിശോധനാ കേന്ദ്രങ്ങളിൽ ട്രക്കുകൾ നിർത്താതിരിക്കൽ എന്നിവ കാമറകൾ വഴി പിടിക്കും. രാത്രിയിലും മോശം കാലാവസ്ഥയിലും ലൈറ്റ് ഉപയോഗിക്കാതിരിക്കൽ, മോശം കാലാവസ്ഥയിൽ വലിയ വാഹനങ്ങൾ ലാസ്റ്റ് ട്രാക്കിലൂടെ ഓടിക്കാതിരിക്കൽ എന്നിവയും നിയമ ലംഘനമാണ്. ഇവക്കെല്ലാം ജൂൺ നാലു മുതൽ പിഴ ഈടാക്കും.