സൗദി ബത്ഹയിൽ തീ പൊള്ളലേറ്റ് പ്രവാസി മരണപ്പെട്ടിരിക്കുകയാണ്. തൃശൂർ കോതപറമ്പ് സ്വദേശി പാണ്ടപറമ്പത്ത് മുഹമ്മദ് റാഫി ആണ് മരിച്ചത്. അമ്പത് വയസായിരുന്നു. ജലദോഷത്തിന് ആവി പിടിക്കുന്നതിനിടെ ആണ് മുഹമ്മദ് റാഫിക്ക് ഗുരുതരമായി പൊള്ളലേൽക്കുന്നത്. സൗദി അറേബ്യയിലെ ബത്ഹയിൽ ബുധനാഴ്ച രാത്രിയാണ് സംഭവം. ഗ്യാസ് സ്റ്റൗ കത്തിച്ച് അതിന് മുകളിൽ കെറ്റിലിൽ വെള്ളം ചൂടാക്കി തലയിൽ പുതപ്പിട്ട് ആവി പിടിക്കുകയായിരുന്നു ഇദ്ദേഹം.

ഇതിനിടെ പുതപ്പിലേക്ക് തീ പടർന്ന് പിടിക്കുകയായിരുന്നു. രാത്രി സമയമായതിനാൽ റൂമിലുള്ള മറ്റുള്ളവരെല്ലാം ഉറക്കത്തിലായിരുന്നു. ആരും തന്നെ സംഭവം അറിഞ്ഞിരുന്നില്ലെന്നാണ് വിവരം. തീ പുതപ്പിൽ പടർന്നുപിടിച്ചപ്പോൾ ശരീരമാസകലം പൊള്ളലേറ്റതാണ് മരണത്തിന് കാരണമായത്.

ശുമൈസി ആശുപത്രിയിലുള്ള മൃതദേഹം റിയാദിൽ തന്നെ ഖബറടക്കുന്നതിനുള്ള നടപടിക്രമങ്ങളുമായി റിയാദ് കെ.എം.സി.സി സെൻട്രൽ കമ്മിറ്റി വൈസ് ചെയർമാൻ മഹ്‍ബൂബ് ചെറിയവളപ്പ് രംഗത്തുണ്ട്. പിതാവ് - ഇസ്മായിൽ, മാതാവ് - സൈനബ . ഗനിയയാണ് ഭാര്യ. റിസ്‌വാന ഫാത്തിമ, മുഹമ്മദ് ഫർഹാൻ, മുഹമ്മദ് റൈഹാൻ എന്നിവർ മക്കളാണ്.