യുഎഇ ഭരണാധികാരികളുടെ അനൗദ്യോഗിക സന്ദർശനങ്ങൾ സ്വദേശികളും പ്രവാസികളും ഉൾപ്പെടെ വളരെ കൗതുകത്തോടെ ആണ് നോക്കി കാണുന്നത്. വീണ്ടും എല്ലാവരേയും ഞെട്ടിച്ച് യുഎഇ വൈസ് പ്രസിഡൻ്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം. സാധാരണ ഒരു പൗരനെ പോലെ എമിറേറ്റിന്റെ പല പ്രധാനപ്പെട്ട സ്ഥലങ്ങളിലും അദ്ദേഹത്തെ വളരെ യാദൃശ്ചികമായി കണ്ടവർ നിരവധിയാണ്.

സുരക്ഷാ പിരിമുറുക്കങ്ങളൊന്നുമില്ലാതെ ഏതാനും ദിവസങ്ങൾക്ക് മുമ്പ് റസ്റ്ററന്റിൽ അദ്ദേഹം അപ്രതീക്ഷിത സന്ദർശനം നടത്തിയ വാർത്ത പുറത്തുവന്നിരുന്നു. എന്നാൽ ഇപ്പോൾ വീണ്ടും പൊതുജനമധ്യത്തിൽ എത്തിയിരിക്കുകയാണ് ദുബായ് ഭരണാധികാരി. വെള്ളിയാഴ്ച എമിറേറ്റിലെ ദുബായ് ഹിൽസ് മാളിൽ ഷോപ്പിങ് നടത്തുന്നവരും ഭക്ഷണം കഴിക്കുന്നവരുമാണ് ഇപ്രാവശ്യം അദ്ദേഹത്തെ അടുത്തു കാണാനുള്ള ഭാഗ്യം ലഭിച്ചത്. അടുത്തിടെ മാൾ ഓഫ് എമിറേറ്റ്സിലെ കഫെയിൽ അദ്ദേഹം എത്തി എല്ലാവരെയും ഞെട്ടിച്ചിരുന്നു.

ഷെയ്ഖ് മുഹമ്മദ് ബിൻ റാഷിദ് അൽ മക്തൂം ദുബായിലെ പ്രശസ്തമായ ഫ്രഞ്ച് കഫേയായ ലഡൂറിയിലേക്കാണ് കടന്നുചെന്നത്. അവിചാരിതമായി പ്രിയ ഭരണാധികാരി റസ്റ്ററൻ്റിൽ മേശയ്ക്കരികിൽ ഇരുന്നപ്പോൾ ഭക്ഷണം ആസ്വദിച്ചിരുന്നവരും ജീവനക്കാരുമെല്ലാം ആശ്ചര്യപ്പെട്ടു. അതുപോലെ ഏതാനും ദിവസങ്ങൾക്ക് മുമ്പ് അറ്റ്‌ലാന്റിസ് ദ് പാമിലെ നോബു റസ്റ്ററന്റിൽ ദുബായ് ഭരണാധികാരി അപ്രതീക്ഷിത സന്ദർശനം നടത്തിയിരുന്നു. സുരക്ഷാ പിരിമുറുക്കങ്ങളൊന്നുമില്ലാതെ റസ്റ്ററന്റിലെത്തിയ അദ്ദേഹത്തെ കണ്ട് അവിടെയുള്ളവർ അപ്പാടെ ഞെട്ടി.

തിരിച്ചറിഞ്ഞവർ മൊബൈൽ ഫോണിലെ ക്യാമറകൾ ഓണാക്കി തങ്ങളുടെ പ്രിയ ഭരണാധികാരിയുടെ ദ്യശ്യങ്ങൾ പകർത്താൻ തുടങ്ങി. ആളും ആരവവും ഇല്ലാതെ ജാപ്പനീസ് റസ്റ്ററന്റായ നോബുവിൽ അദ്ദേഹം ഇരുന്നു. ഇതിനു മുൻപും നോബുവിൽ ഷെയ്ഖ് മുഹമ്മദിനെ കണ്ടവരുണ്ട്. ഷെയ്ഖ് മുഹമ്മദിന്റെ വരവ് നോബു അവരുടെ സമൂഹ മാധ്യമ പേജിൽ ആഘോഷമാക്കി.