16 വർഷത്തെ പ്രവാസ ജീവിതം, സെയില്സ്മാനായിരിക്കെ തേടി വന്നത് ആ മഹാഭാഗ്യം, ബിഗ് ടിക്കറ്റ് ഡ്രീം കാര് നറുക്കെടുപ്പില് ഒന്നാം സമ്മാനം നേടി റേഞ്ച് റോവര് വേലാര് കാര് സ്വന്തമാക്കി പ്രവാസി
അബുദാബി ബിഗ് ടിക്കറ്റിൽ ഭാഗ്യപരീക്ഷണം നടത്തുന്നതിൽ പ്രവാസികൾ കുതിക്കുകയാണ്. കഴിഞ്ഞ വർഷങ്ങളിലേതിന് സമാനമായി തന്നെ അറബികളെപ്പോലും പിന്നാലാക്കി യാണ് പ്രവാസികൾ വൻ തുകകൾ സമ്മാനമായി നേടുന്നത്. മലയാളികള് ഉള്പ്പെടെ നിരവധി പേര്ക്ക് വന്തുകയുടെ സമ്മാനങ്ങള് നല്കി അവരുടെ ജീവിതങ്ങള് മാറ്റി മറിച്ച ബിഗ് ടിക്കറ്റിൽ ഈ വർഷവും കാട്ടയ്ക്ക് തന്നെ ഭാഗ്യപരീക്ഷണം നടത്തുകയാണ് പ്രവാസികൾ.
എങ്ങാനും ഭാഗ്യദേവത കടാക്ഷിച്ചാൽ പിന്നെ കഷ്ടപ്പെട്ട് പ്രവാസ ജീവിതം തള്ളി നീക്കേണ്ടതില്ലോ എന്ന് ഓർത്ത് മിക്ക പ്രവാസികളും സുഹൃത്തുക്കളുമായി ചേർന്ന് ടിക്കറ്റ് എടുക്കുന്നുണ്ട്. ഇന്ത്യക്കാർ മാത്രമല്ല മറ്റ് രാജ്യങ്ങളിലെ പ്രവാസികളും ഭാഗ്യം പരീക്ഷിക്കുന്നവരാണ്. ഇപ്പോൾ ബേക്കറിയില് സെയില്സ്മാന് ജോലി ചെയ്യവെ അബുദാബി ബിഗ് ടിക്കറ്റ് ഒരു പ്രവാസിയുടെ കൂടി ജീവിതം മാറ്റിമറിച്ചിരിക്കുകയാണ്.
ഇക്കഴിഞ്ഞയാഴ്ച നടന്ന അബുദാബി ബിഗ് ടിക്കറ്റ് ഡ്രീം കാര് നറുക്കെടുപ്പില് ഒന്നാം സമ്മാനം നേടി, റേഞ്ച് റോവര് വേലാര് കാര് സ്വന്തമാക്കിയത് പാകിസ്ഥാന് സ്വദേശിയായ യാസിര് ഹുസൈന് എന്ന പ്രവാസിയാണ്. ഒരു ബേക്കറിയില് സെയില്സ്മാനാണ് അദ്ദേഹം. 16 വര്ഷം മുമ്പാണ് യുഎഇയില് എത്തിയത്. ഇപ്പോള് അബുദാബിയില് താമസിക്കുന്നു. മുമ്പൊരിക്കല് ബിഗ് ടിക്കറ്റിനെ കുറിച്ച് ഓണ്ലൈന് പരസ്യങ്ങളില് നിന്ന് അറിഞ്ഞ അദ്ദേഹം കഴിഞ്ഞ പത്ത് വര്ഷമായി ഇടയ്ക്കൊക്കെ ടിക്കറ്റെടുത്ത് ഭാഗ്യം പരീക്ഷിക്കുമായിരുന്നു.
നറുക്കെടുപ്പിലെ വിജയം തികച്ചും അപ്രതീക്ഷിതമായിരുന്നുവെന്ന് യാസിര് ഹുസൈന് പറയുന്നു. "ജോലി ഇല്ലാത്ത സമയങ്ങളില് ബിഗ് ടിക്കറ്റ് നറുക്കെടുപ്പ് ഓണ്ലൈനായി തത്സമയം കാണാറുണ്ടായിരന്നു. എന്നാല് അന്ന് നറുക്കെടുപ്പിന്റെ കാര്യം മറന്നുപോയിരുന്നു. പിന്നീട് സമ്മാന വിവരം അറിയിച്ചുകൊണ്ട് ബിഗ് ടിക്കറ്റ് പ്രതിനിധിയുടെ ഫോണ് കോള് ലഭിച്ചപ്പോഴാണ് കാര്യം ഓര്മവന്നത്".
കാര് വില്ക്കാനാണ് പദ്ധതിയെന്നും കിട്ടുന്ന പണം കൊണ്ട് നാട്ടില് തന്റെ സ്വപ്നഭവനം സ്വന്തമാക്കാനാണ് പ്ലാനെന്നുമാണ് അദ്ദേഹം പറഞ്ഞത്.
'ഭാഗ്യം പരീക്ഷിച്ചുകൊണ്ടേയിരിക്കുക, ബിഗ് ടിക്കറ്റ് തീര്ച്ചയായും നിങ്ങളുടെ ജീവിതവും മാറ്റിമറിക്കും' എന്നാണ് ബിഗ് ടിക്കറ്റ് ഉപഭോക്താക്കളോട് യാസിറിന് പറയാനുള്ളത്. 150 ദിര്ഹമാണ് ഒരു ടിക്കറ്റിന്റെ വില. ക്യാഷ് ടിക്കറ്റുകള് പോലെ തന്നെ രണ്ട് ടിക്കറ്റുകള് ഒരുമിച്ച് വാങ്ങുന്നവര്ക്ക് മൂന്നാമതൊരു ടിക്കറ്റ് തികച്ചും സൗജന്യമായി ലഭിക്കും.
https://www.facebook.com/Malayalivartha