വിമാനത്താവളത്തിലെ യാത്ര നടപടികൾക്കായി കുറച്ച് അധികം സമയം വേണ്ടിവരാറുണ്ട്. യാത്രക്കാരുടെ തിരക്ക് മൂലം ചെക്ക് ഇൻ ചെയ്യാനും, ബോർഡിങ് പാസ് വാങ്ങാനും എല്ലാം പലപ്പോഴും ബുദ്ധിമൂട്ടായി വന്നേക്കാം. എന്നാൽ പ്രവാസികൾ ഇനി അതിൽ ടെൻഷൻ അടിക്കേണ്ട. വിമാത്താവളത്തിലെത്താതെ തന്നെ ഇതെല്ലാം പൂർത്തിയാക്കാം. പിന്നെ യാത്രക്കായി മാത്രം എത്തിയാൽ മതിയാകും. സിറ്റി ചെക്ക് ഇൻ സംവിധാനം ദുബായിലും അബുദാബിയിലും തുടങ്ങിയതിന് പിന്നാലെ ഷാർജയിലും ഒരുക്കിയിരിക്കുകയാണ് എയർ അറേബ്യ.

അൽ മദീന ഷോപ്പിങ് സെന്ററിന് എതിർ ഭാഗത്ത് മുവെയ്‌ലയിലാണ് പുതിയ സൗകര്യം ഏർപ്പെടുത്തിയത്. രാവിലെ 10 മുതൽ രാത്രി 10വരെ ചെക്ക് ഇൻ കേന്ദ്രം പ്രവർത്തിക്കും. വിമാനത്താവളത്തിലെ ചെക്ക് ഇൻ നടപടികൾ ലഘൂകരിക്കുന്നതിന്റെ ഭാഗമായാണ് പുതിയ സംവിധാനം ഏർപ്പെടുത്തിയിരിക്കുന്നത്. യാത്രയുടെ 24 മണിക്കൂർ മുൻപ് മുതൽ 8 മണിക്കൂർ മുൻപ് വരെ ചെക്ക് ഇൻ ചെയ്യാം.

വിമാനത്താവളത്തിലെ ചെക്ക് ഇന്നിൽ ലഭിക്കുന്ന എല്ലാ സൗകര്യങ്ങളും സിറ്റി ചെക്ക് ഇന്നിൽ ലഭിക്കും. യാത്രക്കാർക്ക് അവരുടെ ലഗേജുകൾ ചെക്ക് ഇൻ കേന്ദ്രത്തിൽ നൽകാം, ബോർഡിങ് പാസും വാങ്ങാം. ഇഷ്ടമുള്ള സീറ്റ് തിരഞ്ഞെടുക്കാനും ഇവിടെ സൗകര്യമുണ്ട്.സിറ്റി ചെക്ക് ഇൻ ചെയ്തവർക്ക് യാത്രയുടെ ഒരു മണിക്കൂർ മുൻപ് മാത്രം വിമാനത്താവളത്തിൽ എത്തി നേരെ വിമാനത്തിന്റെ സുരക്ഷാ പരിശോധനയിലേക്ക് പോയാൽ മതി.

അധിക ബാഗേജ് ആവശ്യമായവർക്ക് പണം നൽകി വാങ്ങാം. സമയം ലാഭിക്കുന്നതിനൊപ്പം വിമാനത്താവളത്തിലെ നീണ്ട വരിയിൽ നിൽക്കേണ്ടിയും വരില്ല.ഷാർജയിൽ നിന്ന് പുറപ്പെടുന്നവർക്ക് ഷാർജ, റാസൽഖൈമ, അജ്മാൻ, അൽഐൻ എന്നിവിടങ്ങളിലെ 6 സിറ്റി ചെക്ക് ഇൻ കേന്ദ്രങ്ങളിൽ എവിടെ നിന്നു വേണമെങ്കിലും ബോർഡിങ് പാസ് വാങ്ങാം.

റാസൽഖൈമ, അജ്മാൻ, ഫുജൈറ, ഉമ്മുൽഖുവൈൻ തുടങ്ങിയ എമിറേറ്റിലുള്ളവരും ഷാർജ വിമാനത്താവളത്തെയാണ് ആശ്രയിക്കുന്നത്. 24 മണിക്കൂർ മുൻപ് ചെക്ക് ഇൻ ചെയ്യാമെന്നതിനാൽ മറ്റ് എമിറേറ്റിലുള്ളവരുടെ വിമാന യാത്ര കൂടുതൽ എളുപ്പമായി. അല്ലെങ്കിൽ യാത്രയുടെ ദിവസം പൂർണമായും വിമാനത്താവളത്തിൽ നഷ്ടപ്പെടുന്ന സാഹചര്യമുണ്ടായിരുന്നു. തിരക്കും ഗതാഗത കുരുക്കും ഭയന്ന് നേരത്തെ ഇറങ്ങേണ്ട സാഹചര്യം ഇനിയില്ല.