സ്വകാര്യ മേഖല ജീവനക്കാർക്കുള്ള ബലിപെരുന്നാൾ അവധി ദിനങ്ങൾ യുഎഇ, സൗദി അറേബ്യ, ഒമാൻ എന്നീ രാജ്യങ്ങൾ പ്രഖ്യാപിച്ചു. കഴിഞ്ഞ ദിവസമാണ് ഒമാൻ അവധി ദിനങ്ങൾ പ്രഖ്യാപിച്ചത്. ഒമാൻ ന്യൂസ് ഏജൻസി പുറത്തുവിട്ട അറിയിപ്പ് പ്രകാരം ഒമാനിൽ പെരുന്നാൾ അവധി തുടങ്ങുന്നത് ജൂൺ 27ന് ആണ്. അതിനാൽ ബലിപെരുന്നാളിനോടനുബന്ധിച്ച് സ്വകാര്യമേഖലയിലെ ജീവനകാർക്കുള്ള ശമ്പളം ജൂൺ 25ന് മുമ്പായി വിതരണം ചെയ്യണമെന്ന് അധികൃതർ അവാശ്യപ്പെട്ടു.

നാല് ദിവസമായിരിക്കും സ്വകാര്യ മേഖല ജീവനക്കാർക്കുള്ള ബലിപെരുന്നാൾ അവധി ലഭിക്കുക. അതായത് ജൂൺ 27 ചൊവ്വാഴ്ച മുതൽ ജൂലൈ ഒന്നാം തീയ്യതി ശനിയാഴ്ച വരെയായിരിക്കും അവധി ദിനങ്ങൾ. വാരാന്ത്യ അവധി ദിനങ്ങൾ ഉൾപ്പടെയാണ് അവധി ലഭിക്കുന്നത്. അതിനാൽ അഞ്ച് ദിവസം തുടർച്ചയായി അവധി ഇത്തവണ ലഭിക്കും. അവധിക്ക് ശേഷം ജൂലൈ രണ്ട്, ഞായറാഴ്ച പൊതു, സ്വകാര്യ മേഖലകളുടെ പ്രവർത്തനം പുനഃരാരംഭിക്കുമെന്നാണ് അറിയിച്ചിരിക്കുന്നത്.

യുഎഇയിൽ ഇത്തവണ സ്വകാര്യ മേഖലയ്ക്ക് നാല് ദിവസത്തെ ബലി പെരുന്നാളവധിയാണ് പ്രഖ്യാപിച്ചിട്ടുള്ളത്. ഈ മാസം 27 മുതൽ 30 വരെ അവധിയായിരിക്കുമെന്ന് മന്ത്രാലയം അറിയിച്ചു. ശനി, ഞായർ വാരാന്ത്യ അവധിയുള്ളവർക്ക് ഇത് ആറ് ദിവസത്തെ അവധിയായി നീളുന്നു.ശമ്പളത്തോട് കൂടി ഏറ്റവും ദൈർഘ്യമേറിയ അവധിയാണ് ഇത്തവണ സ്വകാര്യ മേഖലയിലെ പ്രവാസികൾക്ക് ലഭിക്കുന്നത്. ജീവനക്കാർ ജൂലൈ 3നാണ് വീണ്ടും ജോലിക്കെത്തുക.

ബലിപെരുന്നാൾ അവധിക്ക് മുമ്പുള്ള വാരാന്ത്യം കഴിഞ്ഞ് ഇടയ്ക്ക് ഒരു ദിവസം ( 26 ന്) ജോലി ചെയ്യേണ്ടതുണ്ട്. മലയാളികളുൾപ്പെടെ ചില പ്രവാസികൾ ഈ ദിവസം അവധിയെടുത്ത് ഒൻപത് ദിവസത്തെ ഇടവേളയിൽ നാട്ടിൽ പോയി വരാൻ ആലോചിക്കുന്നു. വേനൽക്കാല അവധിക്ക് നാട്ടിലേയ്ക്ക് പോകാൻ തീരുമാനിച്ചവർ ബലി പെരുന്നാൾ അവധികൾ കൂടി ചേർത്ത് യാത്ര തിരിക്കാനാണ് ഉദ്ദേശിക്കുന്നത്.

പത്തൊൻപതാം തീയതി ദുൽഹജ് ആദ്യ ദിവസമാണെന്ന് സൗദി അറിയിച്ചിരുന്നു. ഇതനുസരിച്ച് ഗൾഫിൽ അറഫാ ദിനം 27 നും ബലി പെരുന്നാളിന്റെ ആദ്യ ദിനം 28നും ആയിരിക്കും.സൗദി അറേബ്യയിൽ സ്വകാര്യ നോൺ - പ്രോഫിറ്റ് മേഖലയിലെ തൊഴിലാളികൾക്ക് നാലു ദിവസത്തെ പെരുന്നാൾ അവധി ആണ് സൗദി മാനവ വിഭവ ശേഷി, സാമൂഹിക വികസന മന്ത്രാലയം പ്രഖ്യാപിച്ചിരിക്കുന്നത്.

ജൂൺ 30 വാരാന്ത്യ അവധി ആയതിനാൽ അതിന് പകരം മറ്റൊരു ദിവസം അവധി നൽകണം. പൊതുമേഖല ജീവനക്കാർക്ക് വാരാന്ത്യ അവധി കൂടി ഉൾപ്പെടുത്തിയാൽ രണ്ടാഴ്‌ചയോളം പെരുന്നാൾ അവധി ലഭിക്കും. എന്നാൽ സ്വകാര്യ നോൺ - പ്രോഫിറ്റ് മേഖലയിലെ തൊഴിലാളികൾക്ക് അറഫാ ദിനം മുതൽ ദുൽഹജ്ജ് 12 വരെയുള്ള നാലു ദിവസത്തെ അവധിയായിരിക്കും ലഭിക്കുന്നത്.