സൗദി അറേബ്യയിൽ അടുത്തിടെയായി ജോലിക്കിടെ ഉണ്ടായ അപകടങ്ങളിൽപ്പെട്ട് പ്രവാസികളുടെ ജീവൻ നഷ്ടപ്പെടുന്നത് പതിവ് സംഭവമാകുകയാണ്. നിങ്ങളുടെ ചെറിയ അശ്രദ്ധപോലും വൻ അപകടങ്ങൾക്ക് കാരണമാകാം. ഇപ്പോൾ ജോലിക്കിടെ വൈദ്യുതി കേബിളിൽ നിന്നും ഷോക്കേറ്റ് കൊല്ലം സ്വദേശി മരണപ്പെട്ടു. ഹുഫൂഫ് ശാരി സിത്തീനിൽ താമസിക്കുന്ന കൊല്ലം പള്ളിമുക്ക് സ്വദേശി ജമാൽ സലീമാണ് അപകടത്തിൽ മരിച്ചത്.

കൺസഷൻ തൊഴിലാളിയായിരുന്നു. കഴിഞ്ഞ ദിവസം രാവിലെ ജോലി സ്ഥലത്തുവെച്ചാണ് അപകടമുണ്ടായത്. മൃതദേഹം മറവ് ചെയ്യുന്നതിനുള്ള നിയമനടപടികൾ ഐ എസി എഫ് വെൽഫെയർ സമിതിയുടെ അംഗങ്ങളായ അബ്ദുസലാം കോട്ടയം, ഹാഷിം മുസ്ലിയാർ തുടങ്ങിയവരുടെ നേതൃത്വത്തിൽ പുരോമുക്കുകയാണ്.

കഴിഞ്ഞ ദിവസം ജോലി ചെയ്യുന്നതിനിടെയുണ്ടായ അപകടത്തിൽപ്പെട്ട് മറ്റൊരു പ്രവാസിയുടെ ജീവൻ നഷ്ടപ്പെടുകയുണ്ടായി.ഭാരമുള്ള ഇരുമ്പ് കഷണങ്ങൾ ദേഹത്ത് വീണ് ഉത്തർപ്രദേശ് അസംഗഢ് സ്വദേശി ദിൽഷാദ് അഹമ്മദാണ് ആണ് ജുബൈലിൽ മരിച്ചത്. 55 വയസായിരുന്നു. സ്വകാര്യ കമ്പനിയിലെ ജോലിക്കിടെ ആണ് അപകടമുണ്ടായത്. വലിയ ഭാരമുള്ള ഇരുമ്പ് കഷണങ്ങൾ ശരീരത്തിലേക്ക് വീണ് ഗുരുതരമായി അഹമ്മദിന് പരുക്കേൽക്കുകയായിരുന്നു.

ഉടൻ തന്നെ റോയൽ കമീഷൻ ആശുപത്രിയിൽ പ്രവേശിപ്പിച്ചെങ്കിലും അദ്ദേഹത്തിന്റെ ജീവൻ രക്ഷിക്കാനായില്ല. ജുബൈലിലെ സ്വകാര്യ കമ്പനിയിൽ പെട്രോൾ എൻജിൻ മെക്കാനിക്കായി ജോലി ചെയ്തുവരികയായിരുന്നു മരണപ്പെട്ട ദിൽഷാദ് അഹ്‌മദ്‌. മൃതദേഹം റോയൽ കമീഷൻ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. മരണാനന്തര നടപടികൾക്ക് നേതൃത്വം നൽകുന്ന പ്രവാസി വെൽഫെയർ ജനസേവന വിഭാഗം കൺവീനർ സലിം ആലപ്പുഴ അറിയിച്ചു.