എല്ലാ മേഖലകളിലും സ്വദേശിവൽക്കരണം നടപ്പാക്കിയും മറ്റ് നടപടികളിലൂടെയും പ്രവാസികളെ പ്രതിസന്ധിയിലാക്കുന്ന നടപടികളാണ്കുവൈറ്റ് ഭരണകൂടം നടപ്പാക്കുന്നത്. സമീപകാലത്ത് മറ്റ് പല ഗൾഫ് രാജ്യങ്ങളും പ്രവാസികളോട് ഉദാരമായ നയം സ്വീകരിക്കുമ്പോൾ ഓരോ ദിവസം കഴിയുന്തോറും തങ്ങളുടെ നയങ്ങൾ കൂടുതൽ ശക്തമാക്കുകയാണ് കുവൈത്ത്.

പ്രവാസി ഡ്രൈവിംഗ് ലൈസൻസിന്റെ കാലാവധി മൂന്ന് വർഷത്തിൽ നിന്ന് ഒരു വർഷമായി കുറച്ച കുവൈത്ത് ട്രാഫിക് വിഭാഗത്തിന്റെ തീരുമാനവും ഇതിൽ ഉൾപ്പെടുന്നു.ഈ തീരുമാനം 2023 ഏപ്രിൽ 26 മുതൽ പ്രാബല്യത്തിൽ വന്നു. രാജ്യത്തെ സാധാരണക്കാരായ പ്രവാസികളാണ് നടപടികൾ കടുപ്പിക്കുന്നത് മൂലം കൂടുതൽ പ്രതിസന്ധിയിലായിരിക്കുന്നത്.

ട്രാഫിക് നിയമലംഘനത്തിനെതിരെ കർശന നടപടികളുമായി കുവൈത്ത് ആഭ്യന്തര മന്ത്രാലയം. ഗതാഗത നിയമം ലംഘിച്ച 360 ഡ്രൈവിംഗ് ലൈസൻസുകൾ റദ്ദാക്കി. പ്രവാസികൾക്ക് അനുവദിച്ച ഡ്രൈവിംഗ്‌ ലൈസൻസുകളുടെ പരിശോധന തുടരുമെന്നാണ് സൂചന. പോയന്റ്‌ സമ്പ്രദായ പ്രകാരമാണ് കുവൈത്തിൽ ലൈസൻസുകൾ റദ്ദാക്കിയത്.

ഒരുവർഷത്തിനിടെ 14 ൽ കൂടുതൽ ബ്ലാക്ക് പോയന്റുകൾ ലഭിച്ചാൽ ആദ്യതവണ ഒരു മാസത്തേക്കും, രണ്ടാം തവണ 12 പോയന്റുകൾ കിട്ടിയാൽ ആറുമാസവും, മൂന്നാം തവണ 10 പോയന്റുകൾ എത്തിയാൽ ഒമ്പതുമാസവും, നാലാമത്തെ തവണ എട്ട് പോയന്റ് രേഖപ്പെടുത്തിയാൽ ഒരു വർഷവും, അഞ്ചാം തവണ ആറ് പോയന്റുകൾ ലഭിച്ചാൽ ഡ്രൈവിംഗ് ലൈസൻസുകൾ സ്ഥിരമായും റദ്ദാക്കും. റോഡ് സുരക്ഷ ഉറപ്പാക്കാനും അപകടങ്ങൾ കുറക്കുന്നതിന്റെയും ഭാഗമായാണ് നടപടി. ഈ വർഷം ഇതുവരെയായി 1220 ലൈസൻസുകളാണ് റദ്ദാക്കിയത്.