യുഎഇയിൽ ഫ്ലാറ്റ് സമുച്ചയത്തിൽ വൻ തീപിടുത്തം. നിരവധി മലയാളികൾ കുടുംബമായി താമസിക്കുന്ന അജ്മാനിലെ മുപ്പത് നില കെട്ടിടത്തിലാണ് തീപിടുത്തമുണ്ടായത്. വിവരമറിഞ്ഞപ്പോൾ തന്നെ ഇവിടെ നിന്ന് നൂറുകണക്കിന് കുടുബങ്ങളെ ഒഴിപ്പിച്ചത് കൊണ്ട് വൻ ദുരന്തം ഒഴിവായി. നിലവിൽ ആളപായം ഒന്നും റിപ്പോർട്ട് ചെയ്തിട്ടില്ല.

ഫ്ലാറ്റിലുണ്ടായ അഗ്നിബാധയുടെ ചിത്രങ്ങളും പുറത്തുവന്നിട്ടുണ്ട്. രാത്രി പന്ത്രണ്ടോടെ അജ്മാൻ വൺ ടവേഴ്സ് എന്ന താമസ സമുച്ചയത്തിലെ രണ്ടാം നമ്പർ ടവറിലാണ് തീപിടിത്തുണ്ടായത്. ഒരു മണിക്കൂറിനകം കെട്ടിടത്തിൽ താമസിക്കുന്നവരെ പൂർണമായും ഒഴുപ്പിക്കാൻ കഴിഞ്ഞു.

സമീപത്തെ മറ്റ് കെട്ടിടങ്ങളിലേക്ക് പടരും മുമ്പ് തീ നിയന്ത്രണവിധേയമാക്കാൻ സാധിച്ചതായി അധികൃതർ പറഞ്ഞു. മുകൾ നിലയിലാണ് ആദ്യം തീ പടർന്ന് പിടിച്ചതെന്നാണ് ചിത്രങ്ങളിൽ നിന്നും വ്യക്തമാകുന്നത്. തീപിടിത്തത്തില് കെട്ടിടത്തിന് സാരമായ കേടുപാടുകള്‍ സംഭവിച്ചിട്ടുണ്ട്. അതേസമയം, തീപിടിത്തതിന്റെ കാരണം സംബന്ധിച്ച് അന്വേഷണം പുരോഗമിക്കുകയാണ്.