വേനൽക്കാല അവധിയും പെരുന്നാളും ഒന്നിച്ചെത്തിയതോടെ നിരവധി പേർ അവധിയാഘോഷമാക്കാനായി നാട്ടിലേക്കും വിദേശ രാജ്യങ്ങളിലേക്കും പോകുന്നതിന്റെ തിരക്കിലാണ്. അതിനാൽ യുഎഇലെ എല്ലാ പ്രധാന വിമാനത്താവളങ്ങളിലും വൻ തിരക്കാണ് അനുഭവപ്പെടുന്നത്. പ്രത്യേകിച്ച് ദുബൈ,ഷാർജ എയർപ്പോർട്ടുകളിൽ. ഏറ്റവും തിരക്കേറിയ വിമാനത്തവാളമായതിനാൽ ദുബൈ വിമാനത്താവളത്തിലെ തിരക്ക് അധികൃതർ പ്രതീക്ഷിച്ചിരുന്നതാണ്.

എന്നാൽ ഷാർജ അന്താരാഷ്ട്ര വിമാനത്താവളത്തിൽ ഇത്രയും അധികം തിരക്ക് പ്രതീക്ഷിച്ചിരുന്നില്ല. വേനൽക്കാല യാത്രക്കാർ 40 ലക്ഷം കവിയുമെന്നാണ് ഷാർജ എയർപോർട്ട് അതോറിറ്റി അറിയിച്ചിരിക്കുന്നത്. സ്മാർട് ഗേറ്റുകൾ ഉപയോഗിച്ചു തിരക്ക് കുറയ്ക്കുന്നത് അടക്കമുള്ള സൗകര്യങ്ങൾ യാത്രക്കാർക്ക് വിമാനത്താവളത്തിൽ ഏർപ്പെടുത്തിയതായി എയർപോർട്ട് അതോറിറ്റി മേധാവി അലി സാലിം അൽ മിദ്ഫ അറിയിച്ചു.

തിരക്ക് നിയന്ത്രിക്കാൻ വിമാനത്താവള അധികൃതർ മാത്രമല്ല വിമാനക്കമ്പനികളും യാത്രക്കാര്‍ക്കായി പല സംവിധാനങ്ങളുമൊരുക്കിയിട്ടുണ്ട്. ചെക്ക് ഇൻ നടപടികൾ യാത്രക്കാർക്ക് കൂടുതൽ എളുപ്പമാക്കാനാണ് വിമാനക്കമ്പനികളുടെ ശ്രമം.ഇതിനായി എയർ അറേബ്യ യാത്രക്കാർക്കായി ഷാർജയിൽ മൂന്നാമത്തെ പുതിയ സിറ്റി ചെക്ക് ഇൻ സംവിധാനം ആരംഭിച്ചു.

ഇന്ന് മുതൽ അൽമുസല്ലയിലെ മതാജിർ ഷോപ്പിങ് കേന്ദ്രത്തിലാണ് എയർപോർട്ടിലേക്ക് പുറപ്പെടും മുമ്പേ, ലഗേജ് നൽകി ബോർഡിങ് പാസ് എടുക്കാൻ സൗകര്യം ഏർപ്പെടുത്തുന്നത്. എയർ അറേബ്യ ഷാർജയിൽ ഏർപ്പെടുത്തുന്ന മൂന്നാമത്തെ സിറ്റി ചെക്ക് ഇൻ സംവിധാനമാണ് മുസല്ലയിലെ മതാജിർ ഷോപ്പിങ് കേന്ദ്രത്തിലേത്. രാവിലെ പത്ത് മുതൽ രാത്രി 11 വരെ ഇവിടെ യാത്രക്കാർക്ക് ലഗേജുകൾ ഏൽപിച്ച് ബോർഡിങ് പാസ് കൈപറ്റാൻ സാധിക്കും.

വിമാനത്താവളത്തിലേക്കുള്ള യാത്ര എളുപ്പമാക്കാനും എയർപോർട്ട് ചെക്ക് ഇൻ കൗണ്ടറുകളിലെ നീണ്ട ക്യൂ ഒഴിവാക്കാനും ലക്ഷ്യമിട്ടാണ് സിറ്റി ചെക്ക് ഇൻ കൗണ്ടറുകൾ ഒരുക്കിയിട്ടുള്ളത്.അതേസമയം ബാഗേജുകൾ വീടുകളിൽ എത്തി ശേഖരിക്കുന്ന ഹോം ചെക്ക് ഇൻ സൗകര്യം ഇത്തിഹാദ് വിമാനത്തിലെ യാത്രക്കാർക്ക് അബുദാബിയിൽ ആരംഭിച്ചിട്ടുണ്ട്. യാത്രയ്ക്ക് 5–24 മണിക്കൂറിനിടയ്ക്ക് ലഭിക്കുന്ന ഈ സേവനത്തിനു മൊറാഫിക് ആപ്പ് വഴി മുൻകൂട്ടി ബുക്ക് ചെയ്യണം.

ഹോം ചെക്ക് ഇൻ വഴി 2 ബാഗുകൾ സ്വീകരിക്കുന്നതിനു 185 ദിർഹമാണ് നിരക്ക്. 3–4 ബാഗുകൾക്ക് 220, 5–6 ബാഗുകൾക്ക് 280, 7–8 ബാഗുകൾക്ക് 340 ദിർഹം എന്നിങ്ങനെ നൽകണം. 24 മണിക്കൂറും ചെക്ക് ഇൻ ഇത്തിഹാദ് എയർവേയ്സ്, എയർ അറേബ്യ, വിസ് എയർ, ഈജിപ്ത് എയർ എന്നീ വിമാനങ്ങളിലെ യാത്രക്കാർക്ക് മിനാ തുറമുഖത്തുള്ള സിറ്റി ചെക്ക് ഇൻ സേവനം 24 മണിക്കൂറും പ്രയോജനപ്പെടുത്താം. വിവരങ്ങൾക്ക് 800 6672347 നമ്പറിൽ ബന്ധപ്പെടാം.