അഞ്ച് പൈസ ഈ ദിവസങ്ങളിൽ കൊടുക്കേണ്ട...! യുഎഇയിലെ പ്രവാസികൾ ഈ അവസരം പാഴാക്കരുത്, ബലിപെരുന്നാൾ അവധി ദിവസങ്ങളിൽ സൗജന്യ പാര്ക്കിംഗ് പ്രഖ്യാപിച്ച് യുഎഇയിലെ എമിറേറ്റുകൾ
യുഎഇയിൽ ബലിപെരുന്നാൾ ദിനങ്ങളിൽ സ്വദേശികൾക്കും പ്രവാസികൾക്കുമായി ചില കാര്യങ്ങളിൽ യുഎഇ ഭരണകൂടം ഇളവുകൾ
പ്രഖ്യാപിക്കാറുണ്ട്. ഇത്തവണയും അങ്ങനെയുള്ള പ്രഖ്യാപനമൊക്കെ നടന്നു. ബലി പെരുന്നാള് അവധി ദിനങ്ങളിൽ സ്വദേശികള്ക്കും പ്രവാസികൾക്കും ആശ്വാസമായി ദുബൈ സൗജന്യ പാര്ക്കിംഗ് പ്രഖ്യാപിച്ച പിന്നാലെ മറ്റ് എമിറേറ്റുകൾ കൂടെ സൗജന്യ പാര്ക്കിംഗ് പ്രഖ്യാപിച്ചിട്ടുണ്ട്.
പെരുന്നാൾ പ്രമാണിച്ച് അബൂദബിയിലും ഷാർജയുമാണ് കഴിഞ്ഞ ദിവസം മുതൽ പാർക്കിങ് സൗജന്യമാക്കിയത്. അബൂദബിയിൽ റോഡ് ടോളും സൗജന്യമായിരിക്കും. അബൂദബിയിൽ മവാഖിഫ് പാർക്കിങ്ങുകളും, ട്രക്കുകൾക്കായുള്ള മുസഫയിലെ പാർക്കിങ്ങുകളും സൗജന്യമായിരിക്കും. അബൂദബിയിലെ ഗതാഗത സേവനങ്ങൾക്കുള്ള ഉപഭോക്തൃ കേന്ദ്രങ്ങൾ ബലിപെരുന്നാൾ അവധി ദിനങ്ങളിൽ പ്രവർത്തിക്കില്ലെന്ന് സംയോജിത ഗതാഗത കേന്ദ്രം അറിയിച്ചിട്ടുണ്ട്.
ജൂണ് 27 മുതല് 30 വരെയുള്ള നാല് ദിവസത്തേക്കാണ് ദുബായിലെ പൊതുവായ പാര്ക്കിംഗ് ഏരിയകളില് സൗജന്യ പാര്ക്കിംഗ് അനുവദിക്കുക. ദുബായ് റോഡ്സ് ആന്റ് ട്രാന്സ്പോര്ട്ട് അതോറ്റിയാണ് ഇതുമായി ബന്ധപ്പെട്ട പ്രഖ്യാപനം നടത്തിയത്. അതേസമയം ബഹുനില പാര്ക്കിംഗ് കെട്ടിടങ്ങളില് സൗജന്യ പാര്ക്കിംഗ് ഇളവ് ബാധകമായിരിക്കില്ല. ചൊവ്വാഴ്ച മുതല് തുടര്ച്ചയായ 4 ദിവസങ്ങളില് ദുബായിലെ മറ്റിടങ്ങളില് പാര്ക്കിംഗ് ഫീസ് നല്കേണ്ടതില്ലെന്ന് ആര്ടിഎ അറിയിച്ചത്.
അവധിക്കാലത്ത് വാഹന പരിശോധന, സേവന കേന്ദ്രങ്ങള് എന്നിവയുടെ പ്രവൃത്തി സമയം മാറുമെന്നും ആര്ടിഎ അറിയിച്ചു. വാഹനങ്ങളുടെ സാങ്കേതിക പരിശോധന ഈ മാസം 30 ന് പുനരാരംഭിക്കും. അല് കിഫാഫ് ഒഴികെയുള്ള എല്ലാ ഉപയോക്തൃ കേന്ദ്രങ്ങളും 30 വരെ അടച്ചിടും. ഉമ്മു റമൂല്, ദെയ്റ, അല് ബര്ഷ, ആര്ടിഎ ഹെഡ് ഓഫീസ് എന്നിവിടങ്ങളിലെ സ്മാര്ട്ട് കസ്റ്റമര് സെന്ററുകള് പതിവുപോലെ മുഴുവന് സമയവും പ്രവര്ത്തിക്കുമെന്നും അധികൃതര് അറിയിച്ചു.
അതിനിടെ, പെരുന്നാള് തിരക്ക് കണക്കിലെടുത്ത് ദുബായിലെ ഗതാഗത സംവിധാനങ്ങളുടെ സമയക്രമങ്ങളിലും മാറ്റങ്ങള് വരുത്തിയിട്ടുണ്ട്. ജൂലൈ ഒന്ന് വരെ മെട്രോ സര്വീസ് രാവിലെ അഞ്ച് മുതല് അടുത്ത ദിവസം പുലര്ച്ചെ ഒരു മണി വരെ പ്രവര്ത്തിക്കും.
ജൂലൈ രണ്ടിനു രാവിലെ എട്ട് മുതല് പിറ്റേദിവസം പുലര്ച്ചെ ഒരു മണി വരെയാണ് പ്രവര്ത്തിക്കുക. ജൂലൈ ഒന്ന് വരെ ട്രാം രാവിലെ 6 മുതല് പിറ്റേദിവസം പുലര്ച്ചെ ഒന്ന് വരെ പ്രവര്ത്തിക്കും. ജൂലൈ രണ്ടിന് രാവിലെ ഒന്പത് മുതല് പിറ്റേന്ന് പുലര്ച്ചെ ഒന്ന് വരെയാണ് ട്രാമിന്റെ സമയം.
https://www.facebook.com/Malayalivartha
