യുഎഇയിൽ ഉല്ക്കമഴ ദൃശ്യമാകും, ഓഗസ്റ്റ് 12ന് ദൃശ്യമാകുന്ന ഈ പ്രതിഭാസം നിരീക്ഷിക്കാന് വിപുലമായ സൗകര്യങ്ങളൊരുക്കി, വാനനിരീക്ഷണത്തില് താല്പ്പര്യമുള്ളവര്ക്കായി ദൂരദര്ശനികളും സജ്ജീകരിച്ചു
യുഎഇയിൽ വേനൽക്കാലം കടുത്തിരിക്കെ ആകാശവിസ്മയങ്ങളിലൊന്നായ ഉല്ക്കമഴയും എത്തുന്നു. മണിക്കൂറില് 50-100 ഉല്ക്കകള് ആകാശത്ത് ദൃശ്യമാകുമെന്നാണ് കണക്കുകൂട്ടല്. ഓഗസ്റ്റ് 12നാണ് ഉല്ക്കമഴ ദൃശ്യമാകുന്നത്. ഈ പ്രതിഭാസം പൊതുജനങ്ങൾക്ക് നിരീക്ഷിക്കാന് വിപുലമായ സൗകര്യങ്ങളാണ് യുഎഇ ഒരുക്കിയിരിക്കുന്നത്.
വര്ഷം തോറുമുള്ള പെഴ്സീയിഡ്സ് ഉല്ക്കകള് ഓഗസ്റ്റ് 12ന് അര്ധരാത്രി മുതല് പുലര്ച്ചെ മൂന്ന് മണി വരെ ദൃശ്യമാകുമെന്നാണ് പ്രതീക്ഷിക്കുന്നത്. വര്ഷത്തിലെ ദീര്ഘവും കൂടുതല് വ്യക്തവുമായ ഉല്ക്ക വര്ഷമാണ് 12ന് ദൃശ്യമാകുക. ഉല്ക്കവവര്ഷം വീക്ഷിക്കാന് മലീഹ ആര്ക്കിയോളജിക്കല് സെന്റര് പ്രത്യേക സംവിധാനമൊരുക്കിയിട്ടുണ്ട്. മെലീഹ ക്യാമ്പ് സൈറ്റില് വൈകുന്നേരം ആറ് മണി മുതല് ഉല്ക്കവര്ഷം കാണാനുള്ള തയ്യാറെടുപ്പുകള് തുടങ്ങും.
വാനനിരീക്ഷണത്തില് താല്പ്പര്യമുള്ളവര്ക്കായി ദൂരദര്ശനികളും സജ്ജീകരിച്ചിട്ടുണ്ട്. എല്ലാ പ്രായത്തിലുള്ളവര്ക്കും കുടുംബാംഗങ്ങള്ക്കും പങ്കെടുക്കാവുന്ന പരിപാടിയില് ഭക്ഷണവും ഒരുക്കുമെന്ന് സംഘാടകര് അറിയിച്ചു. ഡിസ്കവര് ശുറൂഖിന്റെ വെബ്സൈറ്റ് വഴി ബുക്കിങിന് സൗകര്യമുണ്ട്.
അതേസമയം യുഎഇയിൽ ചൂട് കനക്കുകയാണ്. കഴിഞ്ഞ മാസം യുഎഇയിൽ താപനില അൻപത് ഡിഗ്രി സെന്റിഗ്രേഡിന് മുകളിലെത്തിയിരുന്നു. സമീപകാലത്ത് രാജ്യത്ത് രേഖപ്പെടുത്തിയ ഏറ്റവും ഉയർന്ന താപനിലയാണിത്. അബുദാബി അൽ ദഫ്റ മേഖലയിലെ ബഡാ ദഫാസിലാണ് താപനില 50.1 ഡിഗ്രി സെൽഷ്യസ് രേഖപ്പെടുത്തിയത്. കഴിഞ്ഞ വർഷവും അബുദാബിയുടെ പടിഞ്ഞാറൻ പ്രദേശമായ അൽ ദഫ്റയിൽ താപനില 49 ഡിഗ്രി സെൽഷ്യസ് കടന്നിരുന്നു.
https://www.facebook.com/Malayalivartha