അബുദാബിയില് വാണിജ്യകേന്ദ്രത്തിൽ വൻ തീപിടുത്തം, സമീപത്തെ കെട്ടിടത്തിലെയും ഓഫീസുകളിലെയും മുഴുവൻ ജീവനക്കാരെയും ഒഴിപ്പിച്ചു, പരിസരത്തെ റോഡുകളിൽ ഗതാഗതം തടസപ്പെട്ടു
യുഎഇയിലെ അബുദാബിയില് വൻ തീപിടുത്തം. നിരവധി ജീവനക്കാർ തൊഴിലെടുക്കുന്ന മുസഫയിലുണ്ടായ തീപിടുത്തത്തിൽ വാണിജ്യകേന്ദ്രം ഏതാണ്ട് പൂർണമായും കത്തിയമർന്നു. മുസഫ വ്യവസായ മേഖലയിൽ പ്രവർത്തിക്കുന്ന ഫർണീച്ചർ ഷോറൂമിൽ നിന്നാണ് തീപടർന്നത്. കഴിഞ്ഞ ദിവസം ഉച്ചക്ക് പന്ത്രണ്ടോടെയാണ് ഈ കെട്ടിടത്തിൽ പ്രവർത്തിക്കുന്ന ഫർണീച്ചർ ഷോറൂമിൽ തീപിടിത്തമുണ്ടായത്.
അബൂദബിയിലെ മേഴ്സിഡസ് ബെൻസിന്റെ സർവീസ് കേന്ദ്രം പ്രവർത്തിക്കുന്നതും ഇതേ കെട്ടിടത്തിലാണ്. തീപിടുത്തത്തിൽ ഇതുവരെ ആളപായം റിപ്പോർട്ട് ചെയ്തിട്ടില്ല. തീപിടിച്ച കെട്ടിടത്തിലെയും സമീപത്തെ കെട്ടിടത്തിലെയും ഓഫീസുകളിൽ നിന്ന് മുഴുവൻ ജീവനക്കാരെയും സിവിൽ ഡിഫൻസ് സുരക്ഷിതമായി ഒഴിപ്പിച്ചു.
കെട്ടിടത്തിലെ കാർഷോറൂമിലുമുണ്ടായിരുന്ന കാറുകളും പുറത്തേക്ക് മാറ്റി. പരിസരത്തെ റോഡുകളിൽ ഗതാഗതം തടസപ്പെട്ടു. അബൂദബി പൊലീസും അബൂദബി സിവിൽ ഡിഫൻസും സംയുക്തമായാണ് രക്ഷാപ്രവർത്തനത്തിന് നേതൃത്വം നൽകിയത്. എന്നാൽ അഗ്നിബാധയിൽ വൻതുകയുടെ നഷ്ടം കണക്കാക്കുന്നു.
നഷ്ടം സംബന്ധിച്ച ഔദ്യോഗിക കണക്കുകൾ ലഭ്യമായിട്ടില്ല. അഗ്നിബാധയുടെ കാരണം സംബന്ധിച്ച് അന്വേഷണം പുരോഗമിക്കുകയാണ്. ഔദ്യോഗിക പ്ലാറ്റ്ഫോമുകളില് നിന്നുള്ള വിവരങ്ങള് മാത്രമെ വിശ്വസിക്കാവൂ എന്ന് ബന്ധപ്പെട്ട അധികൃതര് അറിയിച്ചു.
https://www.facebook.com/Malayalivartha