യുഎഇയുടെ മറ്റ് മേഖലകളിൽ കനത്ത വേനൽചൂട് തുടരുന്നതിനിടയിൽ അൽഐൻ മേഖലയിൽ കനത്തമഴ. കഴിഞ്ഞ ദിവസം ഇന്ന് വൈകുന്നേരത്തോടെയാണ് അൽഐൻ മേഖലയിൽ ശക്തമായ മഴ ലഭിച്ചത്. മഴക്ക് സാധ്യതയുള്ളതിനാൽ അബൂദബി എമിറേറ്റിന്റെ കിഴക്കൻ നഗരമായ അൽഐനിൽ ഓറഞ്ച് യെല്ലോ അലർട്ടുകൾ പ്രഖ്യാപിച്ചിരുന്നു. അൽഐന്റെ അൽഹിയാർ, മലാഖിത്, അൽഫുഅ, നാഹിൽ, അൽഫഖ പ്രദേശങ്ങളിൽ ശക്തമായ മഴ ലഭിച്ചു.

വിനോദ സഞ്ചാരമേഖലയായ ജബൽ ഹഫീത്ത് മലയോരങ്ങളിലും മഴ ശക്തമായിരുന്നു. ദൂരക്കാഴ്ചയെ ബാധിക്കുന്ന വിധം മഴ ശക്തമായതിനാൽ അൽഐൻ-ദുബൈ റോഡിലെ വേഗതപരിധി കുറച്ചതായി അബൂദബി പൊലീസ് അറിയിച്ചു. ഈ മേഖലയിൽ ഇന്ന് രാത്രിയിലും അസ്ഥിരകാലാവസ്ഥ തുടരുമെന്നാണ് മുന്നറിയിപ്പ്. മഴയും കാറ്റും തുടരും എന്നതിനാൽ യെല്ലോ അലർട്ട് പ്രഖ്യാപിച്ചിട്ടുണ്ട്.

എന്നാൽ യുഎഇയുടെ മറ്റ് മേഖലകളിൽ കനത്ത വേനൽചൂട് തുടരുകയാണ്. കഴിഞ്ഞ ദിവസം രാജ്യത്ത് താപനില വീണ്ടും 50ന് മുകളിലെത്തി. അൽ ദഫ്‌റയിൽ 50.2 ഡിഗ്രി സെൽഷ്യസ് രേഖപ്പെടുത്തി. രാജ്യത്തെ ഏറ്റവും ഉയർന്ന താപനിലയാണിത്. ഈ വർഷം ഇത് രണ്ടാം തവണയാണ് ഇവിടെ ഇത്രയും ഉയർന്ന അന്തരീക്ഷ ഊഷ്മാവ് അനുഭവപ്പെടുന്നത്.

കഴിഞ്ഞ കുറച്ചുദിവസങ്ങളായി ഉയർന്ന താപനില 49-50 സെൽഷ്യസായതിനാൽ യുഎഇ നിവാസികൾ ചുട്ടുപൊള്ളുകയാണ്.ഉച്ചസമയങ്ങളിൽ സൂര്യപ്രകാശം നേരിട്ട് ശരീരത്തിലേൽക്കുന്നത് ഒഴിവാക്കണമെന്ന് നിർദേശമുണ്ട്. വ്യാഴാഴ്ച രാവിലെ മൂടൽമഞ്ഞ് കാരണം യുഎഇയുടെ ദേശീയ കാലാവസ്ഥാ കേന്ദ്രം മഞ്ഞ, ചുവപ്പ് അലർട്ട് പുറപ്പെടുവിച്ചിരുന്നു. അബുദാബിയിലെ ചില പ്രദേശങ്ങളിൽ ദൃശ്യപരത നന്നേ കുറവായിരുന്നു.

ദൂരക്കാഴ്ച കുറവായതിനാൽ വാഹനമോടിക്കുന്നവർ ജാഗ്രത പാലിക്കണമെന്നും ഇലക്ട്രോണിക് ഇൻഫർമേഷൻ ബോർഡുകളിൽ പ്രദർശിപ്പിച്ചിരിക്കുന്ന വേഗപരിധി പാലിക്കാനും അധികാരികൾ അഭ്യർത്ഥിച്ചു. വരും ദിവസങ്ങളിലും രാവിലെ ചില തീരപ്രദേശങ്ങളിൽ മൂടൽമഞ്ഞ് രൂപപ്പെടാൻ സാധ്യതയുണ്ട്.