യുഎഇ റെസിഡന്സ് വിസ വിവരങ്ങള് ഇനി എളുപ്പത്തിൽ പുതുക്കാം, ഈ അഞ്ച് രേഖകള് ഉണ്ടെങ്കിൽ ഓണ്ലൈൻ വഴി സാധിക്കും
പ്രവാസികൾക്ക് സുതാര്യമാകും വിധമുള്ള മാറ്റങ്ങളാണ് വിസ നടപടികളിലും, എമിറേറ്റ്സ് ഐ.ഡി പുതുക്കുന്നതിലും യുഎഇ നടപ്പിലാക്കിയിരിക്കുന്നത്. ഇത് പ്രവാസികളെ സംബന്ധിച്ച് വലിയൊരു ആശ്വാസമാണ്. അത്തരത്തിൽ പ്രവാസികൾക്ക് ആശ്വാസമാകുന്ന നീക്കമാണ് ഇപ്പോൾ യുഎഇ നടത്തിയിരിക്കുന്നത്. രാജ്യത്തെ താമസക്കാര്ക്ക് അഞ്ച് രേഖകള് ഉണ്ടെങ്കിൽ വളരെ എളുപ്പത്തിൽ ഓണ്ലൈൻ വഴി റെസിഡന്സ് വിസ വിവരങ്ങള് ഇനി പുതുക്കാൻ സാധിക്കും.
ഫെഡറല് അതോറിറ്റി ഫോര് സിറ്റിസണ്ഷിപ്പ്, കസ്റ്റംസ്, പോര്ട്ട് സെക്യൂരിറ്റിയുടെ പുതിയ നിര്ദേശ പ്രകാരം റെസിഡന്സ് വിസയിലെ വിവരങ്ങളില് തിരുത്തലുകള് വരുത്തിയാല് പുതുക്കിയ വിവരങ്ങള് ചേര്ത്ത പുതിയ എമിറേറ്റ്സ് ഐഡിക്കായി തനിയെ തന്നെ അധികൃതരുടെ അടുക്കല് അപേക്ഷ എത്തപ്പെടും.
റെസിഡന്സ് വിസയിലെ വ്യക്തിഗത വിവരങ്ങളിലെ തിരുത്തലുകള്, പ്രൊഫഷണല് പദവികളിലെ തിരുത്തലുകള്, പാസ്പോര്ട്ട് വിവരങ്ങളില് മാറ്റം വരുത്തല്, ദേശീയതയില് മാറ്റം വരുത്തല് മുതലായ കാര്യങ്ങളാണ് അതോറിറ്റിയുടെ ഓണ്ലൈന് സങ്കേതങ്ങള് വഴി ഉപഭോക്താവിന് ചെയ്യാന് സാധിക്കുന്നത്. അതോറിറ്റിയുടെ വെബ്സൈറ്റ് വഴിയോ UAEICP സ്മാര്ട്ട് ആപ്ലിക്കേഷന് വഴിയോ ഉപഭോക്താക്കള്ക്ക് ഈ സേവനങ്ങള് ആക്സസ് ചെയ്യാന് കഴിയും.
റെസിഡന്സ് വിസ വിവരങ്ങള് പുതുക്കാനായി ഒരു കളര് ഫോട്ടോ, പാസ്പോര്ട്ടിന്റെ കോപ്പി, സ്പോണ്സറുടെ ഒപ്പോട് കൂടിയ വിവരങ്ങള് മാറ്റാനുളള അപേക്ഷ, എമിറേറ്റ്സ് ഐ.ഡിയുടെ കോപ്പി എന്നീ രേഖകളാണ് ആവശ്യമായിട്ടുളളത്. ഈ സേവനത്തിനുള്ള അപേക്ഷാ ഫീസ് 200 ദിര്ഹമാണ്. ഓണ്ലൈന് വഴി ഇത്തരം കാര്യങ്ങള് ചെയ്യുന്നതിന് പ്രയാസമുളളവര്ക്ക് കസ്റ്റമര് ഹാപ്പിനെസ് സെന്ററുകളേയോ, ടൈപ്പിങ് ഓഫീസുകളെയോ സമീപിച്ച് തങ്ങളുടെ വിവരങ്ങളില് തിരുത്തലുകള് വരുത്താവുന്നതാണ്.
https://www.facebook.com/Malayalivartha