വേനലവധി ആഘോഷിക്കാനായി കേരളത്തിൽ എത്തിയ പ്രവാസി കുടുംബങ്ങൾ തിരികെ ഗൾഫ് നാടുകളിലേക്ക് മടങ്ങാനുള്ള ഒരുക്കത്തിലാണ്. ഗൾഫിൽ സ്കൂൾ തുറക്കുന്നത് സെപ്തംബർ ആദ്യമാണ്. തിരിച്ച് ഗൾഫിലേക്ക് പോകാൻ വേണ്ടി ടിക്കറ്റുകൾ പരിശോധിക്കുമ്പോൾ ആണ് പലരുടേയും കണ്ണുകൾ തള്ളുന്നത്.ഇത്തരത്തിൽ വലിയ നിരക്കാണ് വിമാനക്കമ്പനികൾ ഈടാക്കുന്നത്. ഇപ്പോൾ ടിക്കറ്റ് നിരക്ക് അരലക്ഷവും പിന്നിട്ട് ഇപ്പോൾ മുക്കാൽ ലക്ഷവും കടന്നുപോയിരിക്കുകയാണ്.

മറ്റ് സംസ്ഥാനങ്ങളിൽ നിന്നും ടിക്കറ്റ് എടുക്കുന്നതിനേക്കാൾ ഇരട്ടിയിലധികം രൂപയാണ് കേരളത്തിൽ നിന്നും യാത്ര ചെയ്യുമ്പോൾ ഈടാക്കുന്നത്. മുംബൈയിൽ നിന്നും 19,000 രൂപയ്ക്ക് ദുബായിലേക്ക് ടിക്കറ്റ് കിട്ടും. എന്നാൽ കേരളത്തിൽ നിന്നും അങ്ങനെ അല്ല. ദുബായിലേക്ക് പോകണമെങ്കിൽ 78,000 രൂപ വരെയാണ് ഈടാക്കുന്നത്. മുംബൈയിൽ നിന്നും ദുബായിലേക്ക് 13466 രൂപയ്ക്ക് ആണ് ഒമാൻ എയർ ടിക്കറ്റ് നൽകുന്നത്.

മുംബൈയും കേരളവും തമ്മിലുള്ള നിരക്ക് പരിശോധിക്കുമ്പോൾ ആറിരട്ടിയിലധികം രൂപയുടെ വിത്യാസം ആണ് ഉള്ളത്. തിരുവനന്തപുരത്ത് നിന്ന് റിയാദിലേക്ക് എയർ അറേബ്യ 78, 972 രൂപയാണ് ഇടാക്കുന്നത്. സെപ്തംബർ മാസത്തിൽ വലിയ നിരക്കാണ് ഈടാക്കുന്നത്. എമറൈറ്റ്സ് 72,143 രൂപ, എത്തിഹാദ് 70,426 രൂപ എന്നിങ്ങനെയാണ് കേരത്തിൽ നിന്നും ഗൾഫിലേക്ക് പോകുമ്പോൾ നൽകേണ്ട ടിക്കറ്റ് നിരക്ക് വരുന്നത്.

എയർ ഇന്ത്യ മുംബൈയിൽ നിന്ന് അബുദാബിയിലേക്ക് 24,979 രൂപയാണ് ഈടാക്കുന്നത്. എന്നാൽ കേരളത്തിൽ നിന്നും ദുബായിലേക്ക് എയർ ഇന്ത്യയിൽ പോകണം എങ്കിൽ 47, 662 രൂപ എയർ ഇന്ത്യക്ക് നൽകേണ്ടി വരും.ടിക്കറ്റ് നിരക്ക് വർധിപ്പിക്കാനുള്ള അധികാരം വിമാനക്കമ്പനികൾക്കാണ് ഉള്ളത്. യുപിഎ ഭരണകാലത്താണ് കേന്ദ്ര സർക്കാൻ ഈ അവകാശം വിമാനക്കമ്പനികൾക്ക് നൽകിയത്. പ്രവാസികൾക്ക് ഏറെ ബുദ്ധിമുട്ടുണ്ടാക്കുന്ന നടപടിയായിട്ടു പോലും കേന്ദ്രം വിഷയത്തിൽ ഇടപെടാൻ തയ്യാറായിട്ടില്ല.

വിഷയത്തിൽ കേരളത്തിൽ നിന്നുള്ള ജനപ്രതിനിധികൾ വിമാന ടിക്കറ്റ് നിരക്ക് വർധനവിൽ ഇടപെടാത്തത് മൂലം വലിയ പ്രതിഷേധത്തിലാണ് പ്രവാസികൾ. ഈ മാസം കേരളത്തിലേക്ക് വരാൻ ആഗ്രഹിക്കുന്ന സൗദിയിലെ പ്രവാസികൾക്ക് 5289 രൂപയ്ക്ക് എയർ ഇന്ത്യ എക്‌സ്പ്രസ് നിരക്കുകൾ ലഭ്യമാക്കിയിട്ടുണ്ട്. ൺ വേ ടിക്കറ്റ് എടുക്കുന്നവർക്ക് ഇത്ര കുറഞ്ഞ നിരക്ക് സമീപകാലത്ത് ഉണ്ടായിട്ടില്ലെന്ന് ടിക്കറ്റിങ് രംഗത്തുള്ളവർ പറയുന്നു.

ദമാമിൽ നിന്ന് കരിപ്പൂരിലേക്ക് ഈ മാസം വിവിധ ദിവസങ്ങളിൽ 240 റിയാലിന് ഇക്കോണമി ക്ലാസ് ടിക്കറ്റുകൾ ലഭ്യമാണ്. ഓഗസ്റ്റ് 08, 15, 16, 20 22, 23, 29 തിയ്യതികളിലാണ് ഈ നിരക്കുകൾ കാണിക്കുന്നത്. മറ്റുള്ള ദിവസങ്ങളിൽ ദമാമിൽ നിന്ന് 350, 450 റിയാലിനും ടിക്കറ്റുകൾ ലഭ്യമാണ്. ദമാമിൽ നിന്ന് രാത്രി 12.10നാണ് ഈ വിമാനം കരിപ്പൂരിലേക്ക് പുറപ്പെടുന്നത്. രാവിലെ 7.05ന് എത്തിച്ചേരും. ഹാൻഡ് ബാഗേജിനു പുറമേ 30 കിലോ വരെ ലഗേജും സൗജന്യമാണ്.