യുഎഇയിൽ അസ്ഥിരകാലാവസ്ഥ തുടരുകയാണ്. അസ്ഥിര കാലാവസ്ഥ തുടരുന്നതിനാൽ അതീവ ജാഗ്രത പാലിക്കണം. പുറത്തിറങ്ങും മുൻപ് കാലാവസ്ഥ മുന്നറിയിപ്പുകൾ ശ്രദ്ധിക്കണമെന്നും എൻസിഎം അറിയിച്ചു.ദുബായ്, അൽഐൻ, ഷാർജ, ഫുജൈറ എന്നിവിടങ്ങളിൽ മഴയ്ക്കു സാധ്യതയുണ്ട്. വെള്ളക്കെട്ടിലൂടെ വാഹനം ഓടിക്കുന്നത് ഒഴിവാക്കണം.

റേഡിയോകളിലെ കാലാവസ്ഥ മുന്നറിയിപ്പുകളും റോഡിലെ ട്രാഫിക് സൈൻ ബോർഡുകളിലെ നിർദേശങ്ങളും കർശനമായി പാലിക്കണം. രാജ്യം ഔദ്യോഗികമായി അറിയിക്കുന്ന കാലാവസ്ഥ മുന്നറിയിപ്പുകൾ അനുസരിക്കണമെന്ന് ആഭ്യന്തര മന്ത്രാലയവും അറിയിച്ചു.

കഴിഞ്ഞ ദിവസവും രാജ്യത്തിന്റെ വിവിധ ഭാഗങ്ങളിൽ മഴ പെയ്തു. റാസൽഖൈമയിൽ കനത്ത മഴ പെയ്യുന്നതിന്റെ ദൃശ്യങ്ങൾ എൻസിഎം പുറത്തു വിട്ടിരുന്നു. മഴയ്ക്കൊപ്പം ആലിപ്പഴവും പെയ്യുന്നതിനാൽ വാഹനങ്ങൾക്ക് കേടുപാടുകൾക്ക് സാധ്യതയുണ്ട്. മലഞ്ചരിവുകളിലും വാദികൾക്ക് സമീപവും പോകരുത്. മിന്നൽ പ്രളയത്തിനുള്ള സാധ്യതയുണ്ട്. വെള്ളക്കെട്ടിന്റെ ആഴം അറിയാത്തതിനാൽ വാഹനങ്ങളുമായി ഇറങ്ങുന്നത് ഒഴിവാക്കണം.

താഴ്‌വരകൾ, ഡാമുകൾ, വെള്ളം ഒഴുകി ഇറങ്ങുന്ന മറ്റു പ്രദേശങ്ങൾ എന്നിവിടങ്ങളിലേക്കു പോകരുതെന്നു റാസൽഖൈമ പൊലീസ് അറിയിച്ചു. വാഹനങ്ങളുമായി ഇറങ്ങുന്നവർ വൈപ്പർ, ഹെഡ്‌ലൈറ്റ്, ടയർ എന്നിവ പ്രവർത്തനക്ഷമമാണെന്ന് ഉറപ്പാക്കണം. അമിത വേഗം പരമാവധി ഒഴിവാക്കണം.

മുന്നിലുള്ള വാഹനവുമായി കൂടുതൽ അകലം പാലിക്കണം. ഇന്ന് വരെ മഴയ്ക്കുള്ള സാധ്യത നിലനിൽക്കുന്നു. മേഘാവൃതമായ കാലാവസ്ഥയും ഇടിമിന്നലോടുകൂടിയ മഴയും ശനിയാഴ്ച വരെ യുഎഇയെ ബാധിക്കുമെന്ന് പ്രതീക്ഷിക്കുന്നു. പ്രത്യേകിച്ച് കിഴക്കൻ പ്രദേശങ്ങളായ ഫുജൈറയിലും അബുദാബി, അൽ ഐൻ എന്നിവിടങ്ങളിലെ തെക്കൻ പ്രദേശങ്ങളിലും.