പ്രവാസികൾ ധാരാളമുള്ള ഗൾഫ് രാജ്യമാണ് യുഎഇ. ഇവിടേക്ക് തൊഴിലന്വേഷിച്ചെത്തുന്നവരുടെ എണ്ണത്തിൽ വലിയ വർദ്ധനവാണ് രേഖപ്പെടുത്തിയിരിക്കുന്നത്. അതിനാൽ പലരും വിസിറ്റ് വിസയിൽ ജോലി തേടി മറ്റ് രാജ്യങ്ങളിലേക്ക് പോകുന്നതിലും കൂടുതലായി ഇവിടേക്ക് എത്തുന്നുയെന്ന പ്രത്യേകതയുമുണ്ട്. പ്രവാസികൾ‍ യുഎഇയിൽ ധാരളമുള്ളതിനാൽ വിസിറ്റ് വിസയിൽ ഇവരുടെ കുടുംബാംഗങ്ങളും സുഹൃത്തുക്കളും എല്ലാം തൊഴിലന്വേഷകരായിട്ടും അല്ലാതെയും ഒക്കെ എത്താറുണ്ട്.

ഇത്തരക്കാർ വലിയ അനുഗ്രമാണ് യുഎഇ 3 മാസ കാലാവധിയുള്ള വിസിറ്റ് വീസ പുനരാരംഭിച്ചത്. ഈ വിസ പുനരാരംഭിച്ചതോടെ ആവശ്യക്കാരുടെ എണ്ണം വന്‍തോതില്‍ വര്‍ധിച്ചു. ദിവസം ശരാശരി 20 അപേക്ഷകള്‍ പ്രോസസ് ചെയ്യുന്നതായി ഏജന്റുമാര്‍ പറയുന്നു. ലിഷർ വീസ എന്ന പേരിലാണ് ഇപ്പോൾ ഈ 90 ദിവസ കാലാവധിയുള്ള ഈ വിസ അറിയപ്പെടുന്നത്. രാജ്യം വിടാതെ തന്നെ തുല്യ കാലയളവിലേക്ക് പുതുക്കാമെന്നതാണ് ഈ വിസയുടെ ആകർഷണം. പലരും ഈ വിസ പുനരാരംഭിച്ചത് ഇപ്പോഴും അറിഞ്ഞു എന്നുകാണില്ല.

കൊവിഡ് മഹാമാരി ശക്തമായ സമയത്താണ് യുഎഇ മൂന്നുമാസത്തെ സന്ദര്‍ശന വിസ അനുവദിക്കുന്നത് താത്കാലികമായി നിര്‍ത്തിവച്ചത്. 2023 മെയ് അവസാനത്തോടെ പുനരാരംഭിച്ചപ്പോള്‍ തൊഴിലന്വേഷകരുടെ എണ്ണം വര്‍ധിച്ചതിനാല്‍ വിസ അപേക്ഷകളും കൂടി. 90 ദിവസം വരെ യുഎഇയില്‍ തങ്ങാനും ജോലി കണ്ടെത്താന്‍ സാവകാശം ലഭിക്കുകയും ചെയ്യുമെന്നതിനാലാണ് തൊഴിലന്വേഷകര്‍ ഈ വിസ തിരഞ്ഞെടുക്കുന്നതിന് പ്രാമുഖ്യം നല്‍കുന്നത്.

കൊവിഡ് സമയത്ത് മൂന്ന് മാസത്തെ വിസ നിര്‍ത്തലാക്കി 60 ദിവസത്തെ വിസ അവതരിപ്പിച്ചിരുന്നു.നിലവില്‍ മൂന്ന് തരം സിംഗിള്‍ എന്‍ട്രി വിസിറ്റ് വിസകളുണ്ട്. 30, 60, 90 ദിവസങ്ങള്‍ ഇഷ്ടാനുസരണം തിരഞ്ഞെടുക്കാം. മൂന്ന് മാസത്തെ വിസ രണ്ട് കാറ്റഗറികളിലായാണ് അനുവദിക്കുന്നത്. യുഎഇ നിവാസികള്‍ക്ക് 1,000 ദിര്‍ഹം നിക്ഷേപിച്ച് അടുത്ത കുടുംബാംഗങ്ങളെയും സുഹൃത്തുക്കളെയും സ്‌പോണ്‍സര്‍ ചെയ്യുന്നതാണ് ഇതിലൊന്ന്.

ഇതിന് ജീവനക്കാരന്റെ ഏറ്റവും കുറഞ്ഞ ശമ്പളം വിവിധ തൊഴില്‍വിഭാഗങ്ങളിലായി 6,000 ദിര്‍ഹം മുതല്‍ 8,000 ദിര്‍ഹം വരെ ആയിരിക്കണമെന്ന നിബന്ധനയുണ്ട്.1,000 ദിര്‍ഹം റീഫണ്ടബിള്‍ ഡെപ്പോസിറ്റിനൊപ്പം വിസയുടെ വില ഏകദേശം 800 ദിര്‍ഹമാണ്. ട്രാവല്‍ ഏജന്റ് വഴി ഏതൊരാള്‍ക്കും വിസിറ്റ് വിസ ലഭിക്കുന്നതാണ് രണ്ടാമത്തെ കാറ്റഗറി. സ്‌പോണ്‍സര്‍ ട്രാവല്‍ ഏജന്റ് ആയിരിക്കും സ്‌പോണ്‍സര്‍. പാസ്‌പോര്‍ട്ട് പകര്‍പ്പും ഫോട്ടോയും മാത്രമാണ് ഇതിന് ആവശ്യമായ രേഖകള്‍. 1,200 ദിര്‍ഹം മുതല്‍ 1,400 ദിര്‍ഹം വരെയാണ് വിസ ചെലവ്.